राप्तीको बाढीले बस्तीहरु डुबानमा, लमही-कोइलाबास सडक अवरुद्ध

दुर्गालाल केसी

दाङ — लगातारको वर्षाका कारण नदीमा बाढी आउँदा धेरै गाउँहरु डुबानमा परेका छन् । राप्ती नदीमा आएको बाढीले लमही–कोइलाबास सडकखण्ड अवरुद्ध भएको छ । सडकमा नदी बगेपछि यात्रुहरुको बिचल्ली भएको थियो । नेपाल प्रहरी, नेपाली सेना र सशस्त्र प्रहरीले यात्रुहरुको उद्धार गरेका थिए । राप्ती नदी गाउँतिर पसेपछि गढवा गाउँपालिका वडानम्बर ५ र ६ का गाउँहरु डुबानमा परेका छन् ।

बाढीले गढवा ५ बोधीपुरका ५० बढी घरहरू डुबानमा परेको इलाका प्रहरी गढवाले जानकारी दिएको छ । बोधीपुरका जगतराम चौधरीको घर डुबानमा परेर जोखिम भएपछि उनको १२ जनाको परिवारलाई सुरक्षित स्थानमा स्थानान्तरण गरिएको इलाका प्रहरी कार्यालय गढवाका प्रमुख प्रहरी निरीक्षक गिरिराज भण्डारीले बताए । बोधीपुरका साथै धर्मपुर, मोतिपुर, तकियापुर, सेमरी, झारबैरा गाउँ बाढीको उच्च जोखिममा रहेको उनले जानकारी दिए । जोखिम क्षेत्रमा प्रहरी तैनाथ रहेको उनले बताए ।

यसैगरी खोलामा बाढी आउँदा लमही–घोराही–तुलसीपुर सडकखण्डमा यातायात सञ्चालनमा समस्या भएको छ । शनिवार बिहानैदेखि बबई, कटुवा, गुज्रे र ग्वार खोलामा पानीको सतह बढेपछि साना सवारी साधन आवागमन अवरुद्ध भएको छ ।

केही ठुला गाडीहरु मात्रै सञ्चालन भएका छन् । लगातार पानी परिरहेकाले खोला वारपार गर्न समस्या भएको छ । हरेक खोलामा प्रहरी तैनाथ गरिएको र खोलामा सावधानी अपनाइएको जिल्ला प्रहरी प्रमुख एसपी बेलबहादुर पाण्डेले बताए । अन्य बाढीको जोखिम रहेका क्षेत्रमा पनि प्रहरीको उच्च सतर्कता रहेको उनले बताए ।

राप्ती गाउँपालिका १ शान्तिपुरका नेत्रप्रसाद खनालको कुखुरा फारममा स्थानीय गनाहा खोला पस्दा १ हजार कुखुरा र ६६ बोरा दाना बगाएको एसपी पाण्डेले बताए । बाढीले लमही नगरपालिका ५ की रिमा नेपालीको घर भत्किएको छ । उनको परिवारलाई उद्धार गरी सुरक्षित स्थानमा राखिएको छ । घोराही–तुलसीपुर सडकखण्डको ग्वारखोलाले शुक्रवार बेलुका ना ७ ख ३५६५ नम्बरको गाडी बगाएको छ । खोलामा गाडी धुने क्रममा पानीको सतह बढेपछि बगेको थियो । जेसिवीको सहायताले राती गाडी निकालिएको प्रहरीले जानकारी दिएको छ ।

निरन्तर वर्षा भइरहेकाले सतर्कता अपनाउन सबैलाई अनुरोध गरिएको प्रमुख जिल्ला अधिकारी गोविन्दप्रसाद रिजालले बताए । सडकमा निर्माणाधीन पुललाई तत्काल सञ्चालनमा ल्याउने व्यवस्था गर्न सम्बन्धित निर्माण व्यवसायीलाई निर्देशन दिएको उनले बताए ।

बाढीले क्षति नपुर्‍यायोस् भन्नेतर्फ सतर्क भइ सबै जोखिम क्षेत्रमा पूर्व तयारीसहित आवश्यक जनशक्ति पनि तयारी अवस्थामा राखिएको उनले जानकारी दिए ।

प्रकाशित : असार २८, २०७६ १५:४१
प्रतिक्रिया
पठाउनुहोस्

देउवा पक्षको भेलाको निष्कर्ष : एक वर्ष कार्यकाल लम्ब्याउने

महाधिवेशन अब ०७७ फागुन सम्ममा गर्ने तयारी 
कुलचन्द्र न्यौपाने

काठमाडौँ — कांग्रेस सभापति शेरबहादुर देउवाले एक वर्ष कार्यकाल लम्ब्याउने भएका छन् । पार्टीको १४ औं महाधिवेशन २०७७ सालको फागुनसम्ममा गर्नेगरी उनले एक वर्षको कार्यकाल बढाउन खोजेका हुन् ।

शनिबार बिहान बसेको देउवा समूहको बैठकले ७७ सालको फागुन सम्ममा महाधिवेशन गर्ने निचोड निकालेको हो । देउवाको फागुन मसान्तबाट चार वर्षको कार्यकाल सकिँदै छ ।
वरिष्ठ नेता रामचन्द्र पौडल र पूर्व महामन्त्री कृष्णप्रसाद सिटौला पक्षले महाधिवेशन ०७६ फागुन भित्रै नियमित महाधिवेशनको लागि दबाव बढाइरहेका बेला देउवा समूहको बैठकले यस्तो निचोड निकालेको हो । देउवाले आफ्नै निवास बुढानिलकण्ठमा बैठक राखेका थिए ।

पार्टीको विधानले असाधरणस्थिति भएमा केन्द्रीय कार्यसमितिको निर्णय अनुसार एक वर्षको कार्यकाल बढाउन सकिने व्यवस्था गरेको छ । संविधानको राजनीतिक दलसम्वन्धी व्यवस्थाले थप ६ महिनाको समय समेत बढाउन सक्ने व्यवस्था गरेको छ । ‘महाधिवेशनको तयारी सुरु गर्दागर्दै एक वर्षको समय लाग्छ, तर संविधान अनुसार थप ६ महिना समेत बढाउने दिशामा जान हुँदैन भनेर हामी सबैजसोले सुझाव दिएका छौं’ देउवा निकट एक सदस्यले भने ।

चालु केन्द्रीय कार्यसमितिको बैठकमै महाधिवेशनको क्यालेन्डर ल्याउन पौडेल र सिटौला पक्षले दबाब दिएका छन । देउवा यसै केन्द्रीय कार्यसमितिको बैठकमा महाधिवेशनको एजेण्डामा छलफल गर्न चाहेका थिएनन । तर, पौडेल पक्षले महाधिवेशनको क्यालेन्डरका विषयमा छलफल नहुने हो भने बैठकमै अनुपस्थित रहने चेतावनी दिएका थिए । त्यसपछि मात्रै देउवा महाधिवेशनको क्यालेन्डर ल्याउने पक्षमा जुटेका हुन् ।

बैठकले संघीय संरचना अनुसार पार्टीका तल्ला तहका संरचना सहमतिमै बनाउने निष्कर्ष निकालेको छ । सहमति नजुटेमा भने निर्वाचनमा जाने विकल्पका लागिपनि तयार रहने देउवा समूहको योजना छ । पौडेल र सिटौला पक्षले विधानका प्रावधान अनुसार निर्वाचनबाटै तल्ला तहका संरचना गठन हुनुपर्नेमा जोड दिँदै आएको छ ।

प्रकाशित : असार २८, २०७६ १५:३४
पूरा पढ्नुहोस्
प्रतिक्रिया
पठाउनुहोस्