नक्कली मायामा साढे ४ लाख स्वाहा !

जनकराज सापकोटा

काठमाडौँ — दोलखा शैलुङका २४ वर्षीय हरिबहादुर कार्कीलाई सुन्दर तस्बिर भएकी अपरिचित केटीले साथी बनाउन अनुरोध पठाइन् । नेपाली सेनाका जवान कार्की राम्री केटीको फोटो देखेर मख्खै परे । उनलाई गाउँकै कल्पना बस्नेत भुजेलले फेसबुक म्यासेन्जरबाट उकासिन, केटी राम्री छे । अघि बढ्दा हुन्छ ।

केटीले औधी मन पराउने कुरा कल्पनाले बताएपछि अविवाहित हरि मख्ख परे । उनीहरुबीच केही महिनासम्म लगातार सामाजिक सञ्जाल र फोनमा कुरा भयो ।

मायाप्रिती चलिरहेकै बेला एक दिन कल्पनाले सुनको लकेट ल्याएर हरिलाई दिँदै भनिन्, ‘तिम्री मायालुले पठाइदिएको ।’ मायालुबाट उपहार पाएपछि हरि त्यसै खुसी भए । माया झागिँदै गएका बेला एकदिन कल्पनाले भनिन्, ‘तिमीलाई माया गर्ने केटी दुर्घटनामा परी घाइते भएर अस्पतालमा उपचार गराइरहेकी छे । उपचार खर्च पठाइदिनुस् ।’ हरिले केही नसोची पटक–पटक गरेर मनी ट्रान्सफरमार्फत् ४ लाख ५५ हजार रुपैयाँ उपचार खर्च पठाइदिए । खर्च पठाइरहे पनि उनले माया गरेकी केटीसँग कुरा गर्न पाएनन् । हरिले एकदिन कल्पनालाई भने, ‘माया गर्ने केटीलाई भेट्नुपर्‍यो ।’ त्यसपछि कल्पना तर्किन थालिन् । कल्पनाले एकदिन सुनाइन्, ‘तिमीलाई माया गर्ने केटीको त उपचारको क्रममा भारतमा मृत्यु भयो ।’

त्यसपछि हरिलाई लाग्यो, कतै मायाको खेल नक्कली त थिएन । हरिले महानगरीय प्रहरी अपराध महाशाखामा घटनाको विवरण टिपाए । प्रहरी अनुसन्धानबाट खुल्यो, २३ वर्षीय कल्पनाले नै नक्कली फेसबुक आइडी खोलेर हरिसँग मायाको नाटक पनि गर्ने दोहोरो भूमिका खेलेकी रहिछन् । महाशाखाका एसपी सुशीलसिंह राठौरले यो ठगीको अनौठो घटना भएको सुनाए ।

राठौरका अनुसार कल्पनाले ठग्नकै निम्ती सुनजस्तै देखिने नक्कली सिक्री किनेर मायालुले पठाइदिएको भनेर हरिलाई दिएको तथ्य खुलेको बताए । प्रहरीले कल्पनालाई भक्तपुरको बालकोटबाट पक्राउ गरी ठगी मुद्दामा कारबाही अगाडि बढाएको छ ।

गत शनिबारमात्रै प्रहरीले फेसबुकमार्फत् नक्कली मायको नाटक रची भारतीय नागरिक जैन श्रीपालसँग २३ लाख ठगेको आरोपमा महोत्तरी औरी नगपालिका १ घर भई काठमाडौंको नरेफाँटमा बस्ने २१ वर्षीय युवती डायन सेकेन्डलाई पक्राउ गरेको थियो । यी दुवै घटनामा देखिने समानता भनेको, सामाजिक सञ्जालको प्रयोग र मायाको नाटक गरी पैसा धुत्ने खेल देखिन्छ ।

डायनले आफू सिंगापुरे नागरिक भएको बताउँदै भारत महाराष्ट्रका ३८ वर्षीय जैनसँग प्रेमको नाटक गरी काठमाडौं बोलाएर त्यतिका धेरै रकम ठगी गरेकी थिइन् । महाशाखाका एसएसपी सहकुल थापाले पछिल्ला घटनाहरुले ठगीको नयाँ प्रवृत्ति बढिरहेकोतर्फ संकेत गरेको बताए । उनले भने, ‘सामाजिक सञ्जाललाई हतियार बनाएर छिटो धनी बन्न खोज्ने प्रवृत्तिले अपराध जन्माइरहेको छ ।’

प्रकाशित : असार १०, २०७६ १९:३१
ADVERTISEMENT
ADVERTISEMENT
प्रतिक्रिया
पठाउनुहोस्

कारागारमा नाचगान

कान्तिपुर संवाददाता

धनकुटा — बन्द पर्खालभित्र कन्सर्ट र प्रहसन चलिरहेको थियो । मुस्किलले ५० जना अटाउने कोठा भरिभराउ थियो । कलाकारको प्रस्तुतिसँगै नाच्दै र गाउँदै साथ दिनेको कमी थिएन । 

हंस बाहिनी फिल्म शो आयोजनामा धनकुटा कारागारमा सोमबार सांगीतिक कार्यक्रम आयोजना गरिएको हो । कारागारभित्रको जीवन भोग्दै आएका कैदीबन्दीलाई सकारात्मक गोरेटोमा ल्याउन कार्यक्रम आयोजना गरिएको आयोजक संस्थाका संयोजक कृष्णप्रसाद नेपालले बताए ।

‘कारागार मानवअधिकार प्रवर्द्धनसम्बन्धी सचेतनामूलकका लागि कार्यक्रम गरिएको हो,’ उनले भने, ‘कैदीबन्दीको मानसिकतामा यस्ता कार्यले सकारात्मक परिवर्तन गराउन मद्दत मिल्ने आशा गर्न सकिन्छ ।’

उक्त अवसरमा गायिका गंगा गौतमले ‘सालको पात टपरी’ लगायत केही गीत प्रस्तुत गरिन् । यस्तै, रोहिता भट्टराई, कल्पना पाण्डे, शिव भट्टराई भोजपुरे, सुष्मा तिमल्सिना, ओम बस्नेत, निशु बस्नेतलगायतले गीत, नृत्य तथा प्रहसन प्रस्तुत गरेका थिए ।

कैदी जीवन भोग्दै आएका विक्रम लिम्बुको क्यारिकेचर स्थापित कलाकार जस्तै थियो । उनले नेता, मन्त्री तथा विभिन्न हास्य कलाकारको क्यारिकेचर प्रस्तुत गरेका थिए । अर्का कैदी सुनील तामाङले पनि कला प्रस्तुत गरे ।

दर्शकदीर्घामा रहेका प्रमुख जिल्ला अधिकारी सीताराम कार्कीले कैदीबन्दीको जीवन अर्थपूर्ण बनाउन मनोरञ्जनात्मक क्रियाकलाप फलदायी हुने प्रतिक्रिया दिए । धनकुटा ६ स्थित जीर्ण घरमा सीमित कारागारलाई व्यवस्थित गरिने कार्कीले जानकारी दिए । आगामी आर्थिक वर्षभित्र सुविधासम्पन्न कारागार भवन बनाउने तयारी गरिएको बताए ।

२५ करोड रुपैयाँको लागतमा बन्न लागिरहेको भवनमा खेलकुद मैदान, पुस्तकालय, सांगीतिक वाद्यवादन तथा आवश्यक पूर्वाधार रहने प्रजिअ कार्कीले सुनाए । प्रदेश-१ आन्तरिक मामिला तथा कानुन मन्त्रालयको सहयोगमा आयोजित कार्यक्रममा जिल्ला प्रहरी प्रमुख एसपी सुदर्शनप्रसाद कोइराला, मन्त्रालयका शाखा अधिकृत विज्ञान भण्डारीलगायतले कैदीबन्दीका लागि नयाँ शैलीको कार्य भएको प्रतिक्रिया दिए ।

ताप्लेजुङबाट सुरु गरिएको कार्यक्रम पाँचथर, इलाम, धनकुटा, तेह्रथुममा आयोजना भएको आयोजकले जनाएको छ । यसपछि क्रमशः संखुवासभा, ओखलढुंगा, खोटाङ र सोलुमा आयोजना गरिने भएको छ ।

प्रकाशित : असार १०, २०७६ १९:२७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT