काठमाडौँ — धार्मिक पर्यटनको रूपमा बौद्धमार्गीलाई भित्र्याउने लक्ष्यसहित एक समूहले भियतनाम, कम्बोडिया र थाइल्यान्डमा नेपालको बौद्ध सम्पदाबारे प्रवर्द्धन गरेको छ ।
नेपाल पर्यटन बोर्डले सोसाइटी अफ ट्राभल एन्ड टुर अपरेटर्स, नेपाल (सोट्टो नेपाल) सँग सहकार्य गर्दै ‘नेपाल सेल्स मिसन २०१९’ नाम दिइएको बौद्ध पर्यटन प्रवर्द्धन भियतनामको हनोई, कम्बोडियाको नोमपेन र थाइल्यान्डको बैंककमा कार्यक्रम आयोजना गरी आइतबार स्वदेश फर्कियो । सिद्धार्थ गौतमको जन्मस्थल लुम्बिनीसम्बन्धी वृत्रचित्र तीनै स्थानमा प्रदर्शन गरिएको थियो । नेपाली टोली र स्थानीय पर्यटन व्यावसायीबीच अन्तरक्रिया पनि आयोजना गरिएको थियो ।
संस्कृति, पर्यटन तथा नागरिक उड्डयन मन्त्रालयका सह-सचिव घनश्याम उपाध्यायले नेपाल भ्रमण वर्ष २०२० राष्ट्रिय अभियानका अवसरमा स्वदेशी र विदेशी पर्यटन व्यवसायीहरूलाई थप व्यावसायिक सम्बन्ध विस्तार गर्न आग्रह गरेका थिए । सोट्टो नेपालका अध्यक्ष मधुसुदन उपाध्यायले बौद्ध धार्मिक पर्यटन केन्द्रको रूपमा नेपाल भ्रमण प्याकेज बिक्री गर्न पर्यटन व्यवसायीहरूलाई सुझाव दिएका थिए ।
थाइल्याण्डका लागि नेपालका राजदूत गणेश प्रसाद ढकालले नेपाल र थाइल्याण्डको साठी वर्ष पुरानो दौत्य सम्बन्धको स्मरण गर्दै थाइल्याण्डका जनतामा भगवान् बुद्धको जन्मस्थल लुम्बिनीप्रति अगाध आस्था रहेकोले लुम्बिनीलाई भ्रमण प्याकेजमा समावेश गर्न थाई पर्यटन व्यवसायीहरूलाई आग्रह गरे ।
सन् २०१८ मा थाईल्याण्डबाट ५३,२५० भियतनामबाट १२,४५४ र कम्बोडियाबाट ३,७९० पर्यटक नेपाल आएका थिए । नेपाल भ्रमण वर्ष २०२० को अवसरमा यो सङ्ख्यामा ठुलो वृद्धि हुने सोट्टो नेपालका अभ्यक्ष मधुसूदन उपाध्यायको विश्वास छ ।
प्रकाशित : असार २, २०७६ १८:१९
