लोकसेवा आयोगको विज्ञापन रद्द गर्न संसदीय समितिको निर्देशन

कर्मचारी करारमा नियुक्ति गर्ने व्यवस्था मिलाउन निर्देशन
ऋषिराम पौड्याल

काठमाडौँ — प्रतिनिधिसभा राज्य व्यवस्था समितिले स्थानीय तहको विभिन्न पदको लागि लोकसेवा आयोगले प्रकाशन गरेको पछिल्लो विज्ञापन रद्द गर्न निर्देशन दिएको छ ।

समितिको सोमबारको बैठकले उक्त विज्ञापन संविधानको मर्म र भावना अनुरुप नदेखिएको जनाउँदैँ विज्ञापन तत्काल रद्द गर्न गराउन संघीय मामिला तथा सामान्य प्रशासन मन्त्रालय र लोकसेवा आयोगलाई निर्देशन दिएको हो ।

यसअघि बैठकमा संघीय मामिला तथा समान्य प्रशासनमन्त्री लालबाबु पण्डितले संविधान र कानूनभित्र रही विधि र प्रक्रिया पूरा गरेर आवश्यकता र औचित्यका आधारमा विज्ञापन गरिएको भनी त्यसको प्रतिरक्षा गरे।

समितिले प्रदेश र स्थानीय तहको कार्यक्षेत्र, आवश्यकता, विशिष्टता, अपनत्व र पूर्ण सहभागितामा प्रदेश एवं स्थानीय तहको संगठन तथा व्यवस्थापन सर्वेक्षण गरी वास्तविक दरबन्दी सङ्ख्या यकिन भएपछि मात्र समानुपातिक समावेशी सिद्धान्तका आधारमा प्रचलित कानून बमोजिम रिक्त पद पदपूर्ति गर्न सबै प्रक्रिया अघि बढाउन मन्त्रालयलाई निर्देशन दिएको छ।

लोकसेवा आयोगले यही जेठ १५ गते स्थानीय तहका विभिन्न नौ हजार १६१ पदका लागि विज्ञापन खोलेको थियो। स्थानीय तहको कार्यबोझलाई मध्यनजर गरी संघको दरबन्दीमा रहेका पुल तथा फाजिलका कर्मचारीलाई काजमा खटाउन र स्थायी पदपूर्ति नभएसम्मका लागि निश्चित मापदण्डका आधारमा आ–आफनो तहमा कर्मचारी करारमा नियुक्ति गर्ने व्यवस्था मिलाउन पनि बैठकले मन्त्रालयलाई निर्देशन दिएको छ।

यसअघि बैठकमा सांसदहरुले प्रदेश लोकसेवा आयोगले गर्नुपर्ने काम संघीय लोकसेवाबाट गराउन खोज्ने तथा संविधानले आत्मसात गरेको समानुपातिक र समावेशी सिद्धान्त विपरीत गएर ठूलो सङ्ख्यामा स्थानीय तहमा कर्मचारी भर्ना गर्ने कार्यले सरकार संघीयता र संविधानको भावना विपरीत जान लागेको हो कि भन्ने भान भएको टिप्पणी गरे।
सांसद देवेन्द्रराज कँडेल, महेश्वरराज गहतराज, रेखा शर्मा, जनार्दन शर्मा, डिला संग्रौला, पम्फा भूषाल, रामसहायप्रसाद यादव, प्रेम सुवाल, छक्कबहादुर लामालगायतले लोकसेवा आयोगको पछिल्लो विज्ञापन संविधानको मर्म र भावना अनुरुप नभएकाले रद्द गर्नुको विकल्प नरहेको सुझाव दिएका थिए।
पछिल्लो विज्ञापनले संविधानले नागरिकलाई दिएको अधिकारको रक्षा कसले गर्ने भन्ने प्रश्न उठेको बताउँदैँ उनीहरुले उठेको विवादको समाधान संविधानअनुरुप नै हुनुपर्ने बताए।

प्रकाशित : जेष्ठ २७, २०७६ ११:०२
प्रतिक्रिया
पठाउनुहोस्

हावाहुरीले विद्यालयको छाना उडायो

कान्तिपुर संवाददाता

बैतडी — जिल्लामा शनिबार रातिको हावाहुरीले विभिन्न ठाउँका विद्यालय र स्थानीय बासिन्दाका घरमा क्षति पुगेको छ । विद्यालयका छाना उडेपछि पढाइ प्रभावित भएको छ । 

विद्यार्थी खुला चौरमा बसेर पढिरहेका छन् । केही विद्यालयमा एकै कोठामा सबै विद्यार्थी राखेर पठनपाठन सञ्चालन गरिएको छ । पाटन नगरपालिका ९ मा रहेको रहेको सिद्धेश्वर मावि हुक्केडाँडाको छाना उडाएको छ । ३ कोठे भवनको छाना उडाउँदा पठनपाठन प्रभावित भएको विद्यालय व्यवस्थापन समिति अध्यक्ष प्रेम भाटले बताए । उनले २ लाख ५० हजारको क्षति भएको बताए । २०१८ मा स्थापना भएको उक्त विद्यालयमा ३ सय ५ विद्यार्थी अध्ययनरत रहेको बताउँदै उनले चौरमा बसालेर पढाउनुपर्ने बाध्यता रहेको बताए ।

दोगडाकेदार गाउँपालिका ८ मा रहेको छानी आधारभूत विद्यालयको भवनको छाना उडाएको छ । कक्षा ५ का विद्यार्थी बस्ने कोठाको छानो उडाएको शिक्षिका भुवनेश्वरी भट्टले बताइन् ।

दोगडाकेदारमै रहेको चनैराज आधारभूत विद्यालयको २ कोठे भवनको छानो पनि उडाएको छ । कार्यालय भवनमा लगाइएको टिन हावाहुरीले उडाएपछि समस्या भएको विद्यालयले जनाएको छ । पाटन नगरपालिका ८, खोडपेमा रहेको भगवती महिला कृषि सहकारी संस्थाको पनि २ कोठे टिनको छाना पनि उडाएको छ । पाटनकै दलबहादुर विष्ट र गोपालसिंह महराको घरको छाना पनि हावाहुरीले उडाएको प्रहरीले जनाएको छ ।

प्रकाशित : जेष्ठ २७, २०७६ ११:०२
पूरा पढ्नुहोस्
प्रतिक्रिया
पठाउनुहोस्