ओलीलाई विद्यावारिधि क्रिस्चियन धर्म प्रचारकबाट

कान्तिपुर संवाददाता

काठमाडौँ — प्रधानमन्त्री केपी शर्मा ओलीले क्रिस्चियन धर्म प्रचारक विश्वविद्यालयको मानार्थ विद्यावारिधि उपाधि लिएको खुलेको छ । शिक्षाका नाममा धर्मप्रचार गर्दै आएको दक्षिण कोरियाको काङ्नाम विश्वविद्यालयले काठमाडौंमा बुधबार प्रधानमन्त्री ओलीलाई मानार्थ विद्यावारिधि प्रदान गरेको हो । 

ZenTravel

काङ्नामको धर्मप्रचार गर्ने स्वार्थ थाहा पाएपछि ‘विशेष आवश्यकता शिक्षा’ (स्पेसल निड्स एजुकेसन/एसएनई) मा गरिएको सहकार्य त्रिभुवन विश्वविद्यालयले तोडेको थियो । काङ्नामले एसएनई विषय पठनपाठनका निम्ति सहकार्य गर्ने गरी डेढ दशकअघि त्रिविसित समझदारी (एमओयू) गरेको थियो । त्रिवि शिक्षाशास्त्र संकायअन्तर्गत उक्त विषय सानोठिमी क्याम्पसमा स्नातक तहमा पठनपाठन गरिएको थियो । काङ्नाम विश्वविद्यालयले पन्ध्रदेखि बीस जना विद्यार्थीलाई मासिक चार हजार रुपैयाँ छात्रवृत्तिसमेत दिएको थियो ।

Meroghar


सहमतिअनुसार नेपालको विद्यार्थी र शिक्षकलाई कोरिया भ्रमण गराइएको थियो । काङ्नामले कोरियाका विद्यार्थी र अन्य टोलीलाई नेपाल भ्रमण पनि गराएको थियो । ‘कोरियाली टोली केही दिन काठमाडौंको औपचारिक कार्यक्रममा रहन्थ्यो,’ त्रिविका तत्कालीन विभागीय प्रमुख प्राध्यापक चन्द्ररमण पराजुली भन्छन्, ‘त्यसपछि टोली पोखरा भ्रमण गर्ने भनेर जान्थ्यो र कुनै दुर्गम गाउँ पुग्थ्यो । उनीहरूको मुख्य उद्देश्य धर्म प्रचार रहेछ भन्ने केही वर्षपछि थाहा पायौं ।’
प्राध्यापक पराजुलीले पनि विभागीय प्रमुखका रूपमा दक्षिण कोरिया भ्रमण गरेका थिए ।

‘विश्वविद्यालयका तर्फबाट एमओयू गर्ने बेला पूर्वजानकारी भएन,’ पराजुलीले भने, ‘सहमतिअनुसार विद्यार्थीले छात्रवृत्तिसहित विशेष शिक्षा विषय पढ्ने मौका पाए भन्ने मात्रै सोच्यौं । कार्यत्रम लागू भएको केही समयपछि हामी तीन जना कोरिया पुग्यौं । विभिन्न शैक्षिक संस्था घुमाइयो । आइतबारका दिन क्रिस्चियनको पूजापाठ गर्ने ठाउँमा लगियो । नेपालमा नेतृत्व गर्ने प्राध्यापक काङ स्वयं पास्टर रहेछन् । त्यो विश्वविद्यालय क्रिस्चियानिटीका निम्ति समर्पित रहेछ ।’

विश्वविद्यालयसित सहसम्बन्ध देखाएर नेपालको ग्रामीण भेग भ्रमण गर्ने काङ्नाम विश्वविद्यालयको स्वार्थ थाहा पाएपछि एमओयू तोडिएको प्राध्यापक पराजुलीले बताए । ‘कोरियाली टोली हरेक पटक पोखरा जान्थ्यो, त्यसमा पनि निश्चित गाउँ गन्तव्य हुन्थ्यो,’ अवकाश प्राप्त प्राध्यापक पराजुलीले भने, ‘त्यतिखेर विभागीय प्रमुखमै थिएँ । एक दिन कक्षामा उपस्थित हुन नसक्ने जनाउ दिएको थिएँ । कारणवश मेरो कक्षा समय नसकिँदै विभागमा पुगेँ । मेरो अनुमति नलिई अपरिचित व्यक्ति काङ्नाम विश्वविद्यालयको प्रतिनिधि भन्दै छिरेर मोटिभेसन कक्षा लिइरहेको भेटेँ । पालेले बदमासी गरेको रहेछ । मैले त्यो व्यक्तिलाई तुरुन्तै निकालिदिएँ ।’

त्यसपछि त्रिविले सन् २०१४ मा दक्षिण कोरियाको छाङहोङ नेसनल युनिभर्सिटीसित एमओयू गरी विशेष आवश्यकता शिक्षा (एसएनई) सञ्चालन गर्‍यो । सन् २०१८ सम्म अन्तर्राष्ट्रिय सहयोगका लागि अगुवा विश्वविद्यालय परियोजना (लुपिक) चल्यो । हाल त्रिविमा स्नातकोत्तर (एमएड) र स्नातक (बीएड) तहमा विशेष शिक्षा विषय पढाइ भइरहेको छ । विद्यार्थीले छात्रवृत्तिसमेत पाएका छन् । छाङहोङ नेसनल युनिभर्सिटी कोरियामै ६ जनाले विशेष शिक्षामा विद्यावारिधि (पीएचएडी) शोध यही वर्ष पूरा गर्दै छन् ।

त्रिवि उपकुलपति तीर्थराज खनियाँले प्रधानमन्त्री ओलीलाई काङ्नाम युनिभर्सिटीले मानार्थ विद्यावारिधि दिने कुरा कार्यक्रमको दुई दिनअघि मात्र थाहा पाएको बताए । ‘काङ्नाम विश्वविद्यालय धर्म प्रचारक संस्था हो भन्ने मलाई थाहा थिएन,’ खनियाँले कान्तिपुरसित भने, ‘काङ्नामसित त्रिविले समझदारी तोड्नुको कारण मलाई थाहा छैन । त्यही विश्वविद्यालयले प्रधानमन्त्रीलाई मानार्थ विद्यावारिधि प्रदान गर्ने खबर कार्यक्रमको दुई दिनअघि मात्र थाहा पाएँ । कार्यक्रममा बाध्यतावश सहभागी हुनुपर्‍यो ।’

काङ्नाम विश्वविद्यालयको वेबसाइटमा उल्लेख भएअनुसार उक्त विश्वविद्यालय सन् १९४६ मा स्थापना भएको हो । ‘काङ्नाम विश्वविद्यालय प्राइभेट क्रिस्चियन युनिभर्सिटी हो,’ विश्वविद्यालयका प्रेसिडेन्टको भनाइ उल्लेख छ, ‘स्वर्गको पूजा र मानव जातिप्रति स्नेह गर्नु यसको उद्देश्य हो ।’

प्रकाशित : जेष्ठ १७, २०७६ ०७:५२
ADVERTISEMENT
प्रतिक्रिया
पठाउनुहोस्
ADVERTISEMENT

सकियो सगरमाथा आरोहण

कान्तिपुर संवाददाता

काठमाडौँ — तीन महिनाअघि सुरु भएको वसन्तकालीन हिमाल आरोहण बिहीबार सकिएको छ । यस सिजनमा कम्तीमा ६ सय व्यक्तिले सगरमाथाको सफल आरोहण गरेका छन् । पर्यटन विभागकी निर्देशक मीरा आचार्यका अनुसार अन्य हिमालमा २ सय हाराहारीले सफल आरोहण गरेको अनुमान छ । 

निर्देशक आचार्यले एक साताभित्र आरोहणमा सहभागी स्वदेशी, विदेशी र शेर्पाको संख्या सार्वजनिक हुने बताइन् । ‘आरोहणमा खटाइएका सम्पर्क अधिकृतले जानकारी गराउने क्रम जारी छ, केही दिनभित्रै आरोहणको जानकारी सार्वजनिक गर्छौं,’ उनले भनिन् ।

यस सिजनमा सगरमाथामा नौ जनाको मृत्यु भएको छ । सबै हिमालमा गरी मृत्यु हुनेको संख्या १७ पुगेको छ । विभागले यसपटक ३२ वटा हिमालका लागि १ सय १६ आरोहण दललाई अनुमति दिएको थियो । ती दलमा ८ सय ९५ जना थिए । सगरमाथाका लागि मात्रै ३ सय ८१ जनाले अनुमति लिएका थिए । सरकारले ४ सय १४ हिमाल आरोहणका लागि खुला गरेको छ ।

यसैबीच सर्वोच्च शिखरमा मानव पाइला पुगेको दिन मे २९ को अवसर पारेर बुधबार सरकारले निजी संस्थासँगको साझेदारीमा १२ औं अन्तर्राष्ट्रिय सगरमाथा दिवस मनाएको छ । त्यस समारोहमा सगरमाथासहित विश्वका १४ वटा अग्ला हिमाल आरोहण गर्ने दक्षिण कोरियाली आरोही उम होङ गिललाई १ लाखसहित राष्ट्रिय सगरमाथा पुरस्कार प्रदान गरिएको थियो ।

सञ्चार तथा सूचना प्रविधिमन्त्री गोकुलप्रसाद बाँस्कोटाले यस वर्षको तेन्जिङ हिलारी पुरस्कार अस्ट्रेलियाका एन्थोनी गोडेन, नेपाली आरोही माया शेर्पा र नेपाल सरकारका अधिकृत ज्ञानेन्द्र श्रेष्ठलाई संयुक्त रूपमा प्रदान गरे । तीनै जनाले जनही ५० हजार र कदरपत्र पाएका हुन् । प्रथम सगरमाथा आरोही एड्मन्ड हिलारीकी छोरी शेरा हिलारी र आरोही निमा जाङ्बु शेर्पालाई पनि कदरपत्रद्वारा सम्मान गरिएको थियो । आरोही दावा तामाङलाई नगद २५ हजारसहित पुरस्कृत गरियो ।

सगरमाथा दिवसकै अवसरमा राजधानी काठमाडौंमा पहिलोपटक एकदिने अन्तर्राष्ट्रिय हिमालय पर्यटन सम्मेलन पनि भएको छ । अन्तर्राष्ट्रिय हिमालय पर्यटन समूहले आयोजना गरेको सम्मेलनमा एक दर्जन मुलुकका ३ सयभन्दा बढी पर्यटन व्यवसायी, सरकारी कर्मचारीलगायत सहभागी थिए । सम्मेलनको उद्घाटन गर्दै परराष्ट्रमन्त्री प्रदीप ज्ञवालीले नेपालको अर्थतन्त्रको आधार पर्यटन क्षेत्र रहेकाले सरकार यसमा केन्द्रित रहेको बताए ।

प्रकाशित : जेष्ठ १७, २०७६ ०७:४८
पूरा पढ्नुहोस्
प्रतिक्रिया
पठाउनुहोस्
×