कान्तिपुर वेबसाईट
AdvertisementAdvertisement

मुग्लिन पुल आजदेखि दैनिक १० घण्टा बन्द

हरिराम उप्रेती

गोरखा — मुग्लिनमा नवनिर्मित पुल सञ्चालनमा ल्याउने तयारीका लागि दिनमा दुईपटक गरी १० घण्टा सवारी आवागमन बन्द गरिने भएको छ । पृथ्वी राजमार्गमा काठमाडौं, धादिङ र चितवनलाई गण्डकी प्रदेशसँग त्रिशूलीमाथिको पुलले जोडेको छ ।

पृथ्वी राजमार्गअन्तर्गत मुग्लिनमा निर्माण भएको ‘आर्क ब्रिज’ । तस्बिर : हरिराम उप्रेती/कान्तिपुर

पुरानो पुलको विकल्पमा निर्मित ‘आर्क ब्रिज’ सञ्चालनका लागि नदीको वारिपारि दुवैतर्फ सडक सतह कटिङ गरी टेवा पर्खाल लगाउने र सडक कालोपत्रे गर्नुपर्ने भएकाले आवागमनको समय निश्चित गरिएको पुल योजना मध्यक्षेत्र सेक्टर नम्बर २ ललितपुरका योजना प्रमुख अंगलाल रोकायाले बताए ।

उनका अनुसार बिहीबारदेखि १५ दिनसम्म दैनिक राति ९ देखि २ बजेसम्म र दिउँसो ११ देखि ३ बजेसम्म सडकमा आवागमन अवरुद्घ रहनेछ । दिनको समयमा सकेसम्म यात्रुलाई मर्का नपर्ने तवरले सवारी छाड्ने तयारी भएको उनले बताए । ‘केही भाग कटान गर्नुपर्नेछ । ढुंगा झरेर गाडीहरूलाई लाग्ला भनेर सचेत गराउन सूचना जारी गरेका हौं,’ उनले भने, ‘समय निश्चित गरिएपछि यात्रुहरू पनि सोहीअनुसार तयारी गरेर यात्रा गर्छन् ।’


निर्माण सम्पन्न भएको पुललाई सडकसँग जोड्ने काममात्र बाँकी रहेको उनले बताए । ‘दुवैतर्फ सडक दुई मिटर डाउन गर्ने र कालोपत्रेको गर्ने हो,’ उनले भने । सबै काम सकेर असार दोस्रो साताबाट पुल सञ्चालनमा ल्याउने तयारी रहेको उनले बताए । १२ करोड लागतको पुल निर्माणको जिम्मा एलाइट एडभेञ्चर लोहनी जेभीले पाएको थियो ।


‘नयाँ डिजाइनमा बनेको पुल हो । यसको आयु ७० वर्षको हुन्छ,’ प्रमुख रोकायाले भने, ‘यसमा गाडी गुडदा भाइब्रेसन पनि आउँदैन ।’ फुटपाथसहित ११ मिटर चौडा पुल ७.५ मिटरमा गाडी गुड्ने गरी डबल लेनको छ । पुलको लम्बाइ १ सय ६० मिटर छ ।


२०७१ बाट निर्माण सुरु भएको पुल सम्झौताअनुसार गत असारमै निर्माण सम्पन्न हुनुपर्ने थियो । पछिल्लोपटक गत वैशाखबाटै सञ्चालनमा ल्याइने भनिए पनि केही प्राविधिक कारणले ढिलाइ भएको ठेकेदार कम्पनीका प्रतिनिधि मोतीलाल शर्माले बताए । ‘ठूलो नदी र अग्लोमा काम गर्न कामदार पनि डराए,’ उनले भने, ‘आउँछन्, भाग्छन्, कामदार चेन्ज हुने समस्या निर्माण सम्पन्न हुँदासम्म खेप्नुपर्‍यो ।’


निश्चित समयावधिका लागि उक्त खण्ड बन्द भएपछि गण्डकी प्रदेशको राजधानी पोखरासँगै १० जिल्लामा आउजाउ गर्ने यात्रु समस्यामा पर्नेछन् । हाल सञ्चालनमा रहेको पुरानो पुल निकै जीर्ण बनेपछि नयाँ प्रविधिको ‘आर्क ब्रिज’ निर्माण भएको हो । नयाँ पुल सञ्चालनमा आएसँगै पुरानो पुल विस्थापित हुनेछ । पुलले चितवनको मुग्लिन र तनहुँको आँबुखैरेनी गाउँपालिकालाई जोड्छ ।

प्रकाशित : जेष्ठ १६, २०७६ १२:३९
प्रतिक्रिया
पठाउनुहोस्

दक्षिण अफ्रिकाको सामना गर्दै इंग्ल्यान्ड

एएफपी

लन्डन — इंग्ल्यान्डले चार वर्षदेखि बुनेको आफ्नो योजनाको त्यति बेला वास्तविक परीक्षण गर्नेछ जति बेला सन् २०१९ को विश्वकपको ओभलमा हुने उद्घाटन खेलमा टिमले दक्षिण अफ्रिकाको सामना गर्नेछ ।

सन् २०१५ मा अस्ट्रेलिया र न्युजिल्यान्डमा भएको विश्वकपमा इंग्ल्यान्ड लज्जास्पद ढंगले पहिलो चरणबाटै बाहिरिएको थियो । त्यसयता इंग्लिस क्रिकेटले सेतो बलमा खेलिने खेललाई फरक नजरले हेर्नेक्रम सुरु गरेको हो ।

त्यसको नतिजा भने गज्जब छ । कप्तान इयान मोर्गनको टिम अहिले एकदिवसीय वरीयताको शीर्षस्थानमा छ । यसक्रम इंग्ल्यान्डले दुई अवसरमा सबैभन्दा उच्च स्कोरको कीर्तिमान बनाइसकेको छ । त्यसमध्ये अस्ट्रेलियाविरुद्ध उसले बनाएको छ विकेटमा ४ सय ८१ रननै पछिल्लो समयको उच्च कीर्तिमान स्कोर हो । इंग्लिस ब्याटिङ निकै मजुबत छ । त्यसमा समावेश छन्, जेसन रोय, जोनी बरिस्टो, जोए रुट, जोस बटलर र कप्तान मोर्गन आफैं ।

यी खेलाडीले कति सक्षम छन् भने उनीहरूमध्ये कोही एकले एक सानो मोडबाट खेललाई नै आफ्नो पक्षमा परिवर्तन गर्न सक्छन् । ‘टिममा एक–से–एक विश्वस्तरीय खेलाडी रहेको हुनाले सबै उत्साही छन्,’ इंग्लिस लेग स्पिनर अदिल रशिदको भनाइ छ, ‘विपक्षी टिमले ३ सय ७० रनभन्दा माथिको लक्ष्य खडा गरेपछि त्यसलाई पछ्याउन सक्ने ब्याट्सम्यान टिममा रहेको विश्वासले हामी ढुक्क हुनसक्छौं ।’ रशिदका अनुसार सबै खेलाडी अहिले आत्मविश्वासी छन् ।

उनले थपेका छन्, ‘हामीले गर्न सक्छौं भन्ने आत्मविश्वासले हामीलाई फरक बनाएको छ । पछिल्ला चार वर्षमा हामी जे गर्न जान्यौं र सक्यौं, यसपल्टको विश्वकपमा त्यही दोहोरिने छ ।’ रशिद आफैं पनि निर्णायक मोडमा विकेट लिन माहिर छन् । दक्षिण अफ्रिकाका लागि भने विश्वकप पीडाको कथाले भरिएको प्रतियोगिता हो । चार वर्षअगाडि यही टिमले सेमिफाइनल यात्रा तय गरेको हुनेले धेरैको विश्वास बढेको छ, यो टिमले अब केही गर्नसक्छ भनेर ।

दक्षिण अफ्रिकी प्रशिक्षक ओटिस गिब्सन के मान्छन् भने आयोजक र शीर्ष वरीयताको टिम हुनाले सबैखाले दबाब इंग्ल्यान्डमै हुनेछ । उनले भनेका छन्, ‘इंग्ल्यान्डले अहिले जसरी भनिरहेको छ, त्यसअनुसार त टिमले विश्वकप नै जितिसकेको छ । स्टुवार्ट ब्रोड र जेम्स एन्डरसन जस्ता पुराना बलरले त इंग्ल्यान्डले केही खराब गरेन भने उपाधि सजिलै जित्ने भनेका छन् । तर मेरो विचारमा सबै यस्तो हुन्न । दबाब उल्ट इंग्ल्यान्डमै हुनेछ ।’

वेस्ट इन्डिजका पूर्व बलर रहेको गिब्सन मान्छन्, ‘विश्वकप जित्न नम्बर एक वरीयताकै टिम हुनुपर्छ भन्ने छैन । सबै टिमसामु उपाधि जित्ने समान अवसर छ ।’ फाफ डु प्लेसिसको नेतृत्वमा रहेको टिममा यसपल्ट एबी डी भिलियर्स जस्ता स्टार खेलाडी छैनन् । तर टिमसँग क्विन्टन डी ककजस्ता प्रतिभाशाली खेलाडी छ । चोटका कारण डेल स्टेयन पनि टिममा छैनन् । तर पछिल्लो समय दक्षिण अफ्रिकालाई उनीबिना खेल्ने बानी भइसकेको छ ।

प्रकाशित : जेष्ठ १६, २०७६ १२:१५
पूरा पढ्नुहोस्
प्रतिक्रिया
पठाउनुहोस्
×