कर्मचारी कसको तलब कति पुग्यो ? [तालिकासहित]

कान्तिपुर संवाददाता

काठमाडौँ — सरकारले राष्ट्रसेवक कर्मचारीको तलब १८ देखि २० प्रतिशतसम्म वृद्धि गरेको छ । आर्थिक वर्ष २०७६/७७ को बजेटमार्फत सरकारले करिब साढे ५ लाख हाराहारी संख्यामा रहेका कर्मचारीको तलब साउन १ देखि लागू हुने गरी बढाएको हो । कार्यालय सहयोगीदेखि नायब सुब्बासम्मको तलबमा २० प्रतिशत र शाखा अधिकृतदेखि मुख्यसचिवसम्मको तलब १८ प्रतिशतले वृद्धि गरिएको छ । 

झन्डै साढे दुई लाख हाराहारी रहेका सेवानिवृत्त राष्ट्रसेवकहरूको पेन्सनसमेत वृद्धि भएको छ । पूर्वराष्ट्रसेवकहरूको पेन्सनमा जुन पदबाट सेवानिवृत्त भएको हो, त्यही पदको बहालवाला कर्मचारीको बढेको तलबको ६६ प्रतिशतका दरले वृद्धि हुनेछ ।

सबभन्दा तल्लो तहको कर्मचारी कार्यालय सहयोगीको तलब १६ हजार २ सय ३० बाट ३ हजार २ सय ४६ बढेर १९ हजार ४ सय ७६ रुपैयाँ पुगेको छ । सबभन्दा माथिल्लो तह मुख्यसचिवको तलब ५५ हजार २ सयबाट ९ हजार ९ सय ३६ बढेर ६५ हजार १ सय ३५ रुपैयाँ पुगेको छ । खरिदारको तलब २२ हजार १ सय ७० बाट ४ हजार ४ सय ३४ बढेर २६ हजार ६ सय ४ रुपैयाँ पुगेको छ ।

सबै तहका कर्मचारीलाई दिइँदै आएको मासिक २ हजार रुपैयाँ महँगी भत्ता, वाषिर्क ७ हजार ५ सय कपडा भत्ता बजेटमा यथावत् राखिएको छ । दुई दर्जनभन्दा बढी कार्यालयका कर्मचारीलाई दिइँदै आएको सय प्रतिशतसम्मको प्रोत्साहन भत्तासमेत यथावत् छ ।

प्रकाशित : जेष्ठ १५, २०७६ २१:००
प्रतिक्रिया
पठाउनुहोस्

व्यक्तिगत आयमा ४ लाखसम्म कर नलाग्ने

यज्ञ बञ्जाडे

काठमाडौँ — वार्षिक चार लाख रुपैयाँसम्मको आयमा कर छुट हुने भएको छ । सरकारले बुधवार सार्वजनिक गरेको आर्थिक वर्ष ०७६/७७ को बजेट मार्फत व्यक्तिगत आयकरको सीमा ५० हजारले बढाएर वार्षिक चार लाख रुपैयाँ पुर्‍याएको हो ।

यसअघि यस्तो सीमा साढे तीन लाख रुपैयाँ थियो ।

विवाहित व्यक्ति (दम्पती) को हकमा आयकरको सीमा वार्षिक साढे ४ लाख रुपैयाँ पुगेको छ । यो पनि गत वर्षको तुलनामा ५० हजार रुपैयाँले बढी हो । यसअघि यस्तो सीमा ४ लाख रुपैयाँ थियो । उल्लिखित सीमाभित्र रहेका व्यक्तिले आयकर तिर्नु पर्दैन । उनीहरूले सामाजिक सुरक्षा बापत एक प्रतिशत कर मात्र तिरे पुग्छ ।

यसबाहेक अरू करका दरहरू यथावत् राखिएको अर्थमन्त्री युवराज खतिवडाले बताएका छन् ।

प्रकाशित : जेष्ठ १५, २०७६ २०:४३
पूरा पढ्नुहोस्
प्रतिक्रिया
पठाउनुहोस्