पाँचथर हत्याकाण्ड : घाइते बालिकाको अवस्था सामान्य

अर्जुन राजवंशी

दमक — पाँचथरको मिक्लाजुङ गाउँपालिकामा ९ जनाको हत्या हुँदा भागेर बाच्न सफल १२ वर्षीया बालिका सीता खजुमको स्वास्थ्य अवस्था सामान्य रहेको छ । उनको झापाको दमकस्थित लाइफ लाइन अस्पतालमा उपचार भइरहेको छ ।

पाँचथर मिक्लाजुङ गाउँपालिकामा अज्ञात व्यक्तिको हतियार प्रहारबाट ९ जनाको हत्या हुँदा भागेर बाँच्न सफल बालिका सीता खजुम झापाको दमकस्थित लाइफ लाइन अस्पतालमा उपचारार्थ । तस्बिर : अर्जुन/कान्तिपुर

सोमबार राति मिक्लाजुङ ३ आरुबोटेमा अज्ञात व्यक्तिले धारिलो हतियार प्रहार गरी दुई परिवारका ९ जनाको हत्या गरेका थिए । घटनास्थलबाट भागेर बाँच्न सफल खजुमको दायाँ हातमा चोट लागेको छ । बालिकाको हातको कुइनोमा चार टाँचा लगाइएको छ । कडा सुरक्षाबीच बालिकाको उपचार भइरहेको छ ।


मंगलबार दिउँसो बालिकाको स्वास्थ्य अवस्थाबारे प्रदेश १ का प्रहरी प्रमुख प्रहरी नायब महानिरीक्षक केदार रिजालले अस्पतालमै आएर जानकारी लिएका छन् । अनुहार छोपेर आएका व्यक्तिले आफन्तलाई धारिलो हतियार प्रहार गरेको देखेपछि भाग्ने क्रममा बालिकाको हातमा चोट लागेको डीआईजी रिजालले बताए ।

बालिकाको अवस्थाबारे जानकारी लिएपछि पत्रकारहरूसँग कुरा गर्दै डीआईजी रिजालले हत्याकाण्डको अनुसन्धानमा कुनै कसर बाँकी नराखेको बताए । उनले तीन वटै घटनास्थलमा कुनै त्रुटि नहुने गरी अनुसन्धान अघि बढाएको बताए ।


सोमबार राति स्थानीय धनराज शेर्मा र उनका ससुरा बमबहादुर फियाकको परिवारका ९ जनाको अज्ञात व्यक्तिले हत्या गरेको प्रहरीले जनाएको छ । मंगलबार नै उक्त घटनामा संलग्न रहेको भनी आशंका गरिएका मानबहादुर माखिम झुण्डिएको अवस्थामा मृत फेला परेका थिए ।


डीआईजी रिजालले माखिम मृत भेटिएको स्थल र उक्त घटनाबारे पनि विशेष महत्त्वका साथ अनुसन्धान गर्ने काम गरिरहेको बताए ।

प्रकाशित : जेष्ठ ७, २०७६ १९:४२
प्रतिक्रिया
पठाउनुहोस्

चन्द समूहका ५ नेता पक्राउ

कलेन्द्र सेजुवाल

सुर्खेत — कर्णाली प्रहरीले प्रदेशका विभिन्न ठाउँबाट नेत्रविक्रम चन्द नेतृत्वको नेकपाका ५ नेतालाई पक्राउ गरेको छ । पक्राउ पर्नेमा केन्द्रीय सदस्यदेखि जिल्ला तहका नेता रहेका छन् ।

कर्णाली प्रदेश प्रहरी कार्यालयका अनुसार मंगलबार बिहान सुर्खेतको भेरीगंगा नगरपालिका-५ भर्लेनीबाट केन्द्रीय सदस्य एवं भेरी ब्युरो इन्चार्ज बलबहादुर वली र भेरी ब्युरो सदस्य तथा सुर्खेत जिल्ला सेक्रेटरी खड्कबहादुर खड्का पक्राउ परेका छन् ।

उनीहरूबाट पार्टीका विभिन्न दस्ताबेजसमेत बरामद गरिएको प्रदेश प्रहरी प्रमुख डीआईजी महेशविक्रम शाहले बताए । 'लुकिछिपी बैठक तथा अन्य गतिविधि गरिरहेको सूचनाको आधारमा प्रहरीको विशेष टोलीले उनीहरूलाई पक्राउ गरेको हो,' उनले भने, 'सरकारले विप्लव समूहमाथि प्रतिबन्ध लगाएपछि समूहका नेता-कार्यकर्ता पक्राउ पर्ने क्रम जारी छ ।'

प्रहरीले जाजरकोट जिल्ला जनसरकार प्रमुख हरिचन्द्र जैशी, मुगु जिल्ला कमिटी सदस्य अजपाल बुढा र मुगु जिल्ला कमिटी सदस्य दीपकबहादुर साउदलाई पनि पक्राउ गरेको छ ।

उनीहरूलाई राज्यविरुद्धको अपराधमा अदालतबाट म्याद थप गराई अनुसन्धान भइरहेको मंगलबार प्रदेश प्रहरी कार्यालयमा आयोजित पत्रकार सम्मेलनमा डीआईजी शाहले जानकारी दिए ।

प्रकाशित : जेष्ठ ७, २०७६ १९:२८
पूरा पढ्नुहोस्
प्रतिक्रिया
पठाउनुहोस्
×