प्रधानमन्त्रीले तस्करी बन्द भएको बताएकै भोलिपल्ट ७ किलो सुन बरामद

जनकराज सापकोटा

काठमाडौँ — प्रधानमन्त्री केपी शर्मा ओलीले सोमबार सरकारले ३८ किलो सुन आउने प्वाल टालिसकेको बताएकै भोलिपल्ट प्रहरीले रसुवाको टिमुरेबाट सात केजी अवैध सुन बरामद गरेको छ । प्रधानमन्त्रीले कम्युनिष्ट पार्टी स्थापनाको ७० औं दिवसको अवसरमा सोमबार काठमाडौंमा आयोजित कार्यक्रममा सुन तस्करीका कारोबारीहरु आत्तिएको बताएका थिए ।

तस्बिर : बलराम घिमिरे, कान्तिपुर, रसुवा

सरकारले संगठित सुन तस्करीविरुद्ध कुनै कसुर बाँकी नराखेको बताइरहँदा पछिल्ला महिनामा एकपछि अर्को अवैध सुन बरामदका घटनाहरु लगातार बाहिर आइरहेका छन्। मंगलबारको घटना त्यसैको पछिल्लो निरन्तरता हो। सोमबारमात्रै प्रहरी महानिरीक्षक सर्वेन्द्र खनालले एक वर्षे समीक्षा सुनाउने क्रममा संगठित सुन तस्करीविरुद्ध कुनै कसुर बाँकी नराखिएको बताएका थिए।

महानिरीक्षक खनालले यस्तो बताएकै भोलिपल्टै चीनबाट रसुवाको केरुङ नाका हुँदै भित्रिएको ७ केजी सुन प्रहरी र सशस्त्र प्रहरीको संयुक्त टोलीले बरामद गरेको हो। प्रहरीले ८ वैशाखमा मात्रै त्रिभुवन अन्तर्राष्ट्रिय विमानस्थल हुँदै बाहिरिएका एक भियतनामी र एक कम्बोडियन महिलाबाट तीन केजी अवैध सुन बरामद गरेको थियो।

प्रहरीले सोमबार मात्रै वर्ष २०७५ मा ७८ केजी ८ सय ७६ ग्राम अवैध सुन बरामद भएको बताएको थियो। ४५ करोड ४ लाख ६० हजार ६५ रुपैयाँ बराबरको सुन बरामद गरेको प्रहरीले सोही समयमा १ सय ३७ जनालाई सुन तस्करीमा संग्लन भएको आरोपमा प्रतिवादी बनाएको थियो। प्रधानमन्त्रीले संगठित सुन तस्करी रोक्न सरकारले सफल भएको बताइरहेकै महिनामा एक पछि अर्को अवैध सुन बरामदका घटनाहरु सार्वजनिक भइरहेका छन्।

२०७४ माघ ९ मा मोरङ उर्लाबारीका गोरे भनिने चुणामणि उप्रेतीको समूहले विमानस्थल हुँदै भित्र्याएको ३३ केजी अवैध सुन हराएपछि सुरु भएको अपहरण र व्यक्ति हत्याको घटनामाथि अनुसन्धान गर्न सरकारले उच्चस्तरीय समिति नै बनाएको थियो। उक्त समितिले २०७५ साउनमा संगठित सुन तस्करीबारे साढे सात सय पृष्ठको प्रतिवेदन प्रधानमन्त्री केपी ओलीलाई बुझाएका थिए। तर, उक्त प्रतिवेदनमाथि त्यसयता न त प्रधानमन्त्री कार्यालयले थप अनुसन्धान र कारबाही सुरु गर्‍यो न यो प्रतिवेदनमा टेकेर गृह मन्त्रालयले नै कुनै कारबाही अघि बढायो। बरु प्रधानमन्त्रीले संगठित सुन तस्करीको सञ्जाल ध्वस्त भएको अभिव्यक्ति दिइरहे।

प्रधानमन्त्रीले संगठित सुन तस्करीको जालो ध्वस्त पारेको बताइरहँदा गृह मन्त्रालयले भने फागुन १३ मा प्रतिवेदन जारी गर्दै १ सय १४ केजी १ सय २३ ग्राम सुन बरामद गरेर १८ करोड ८ लाखभन्दा धेरै राजस्व असुली गरेको प्रतिवेदन सार्वजनिक गर्‍यो। गृहले जारी कार्यसमीक्षा प्रतिवेदनमा संगठित सुन तस्करीमा संग्लन ७५ प्रतिवादीमध्ये ४६ जनालाई पक्राउ गरेको जनाएको छ।

प्रधानमन्त्रीले संगठित सुन तस्करीको प्वाल टालेको बताएकै महिनामात्रै प्रहरीले श्रृंखलाबद्ध रुपमा अवैध सुन बरामद गरिरहेको देखिन्छ। ८ वैशाखमा मात्रै विमानस्थल प्रहरीले भियतनाम र कम्बोडियाबाट आएका महिलाको साथबाट तीन केजीभन्दा धेरै अवैध सुन बरामद गर्‍यो। त्यस्तै २८ चैतमा मलद्वारमा लुकाएर साढे तीन केजी अवैध सुन ल्याएका तीन चिनियाँ नागरिकलाई विमानस्थल प्रहरी र भन्सार टोलीले पक्राउ गर्‍यो। त्यसभन्दा अघि २० चैतमा प्रहरीले ५ किलो ८ सय १४ ग्राम अवैध सुनसहित तीन भारतीयलाई विमानस्थल बाहिरको पार्किङ क्षेत्रबाट पक्राउ गरेको थियो।

प्रकाशित : वैशाख १०, २०७६ १९:५०
प्रतिक्रिया
पठाउनुहोस्

विस्फोटका आरोपी ६ जनालाई पुर्पक्ष थुनामा राख्न जिल्ला अदालतको आदेश 

कान्तिपुर संवाददाता

काठमाडौँ — जिल्ला अदालत ललितपुरले नख्खुस्थित एनसेलको टावर विस्फोटका आरोपीहरुलाई पुर्पक्ष थुनामा राख्न आदेश दिएको छ । न्यायाधीश अवनी मैनाली (भट्टराई)को इजलासले चन्द समूहका नेता हेमन्तप्रकाश ओलीसहित ६ जनालाई पुर्पक्ष थुनामा पठाएको अदालतका स्रेस्तेदार चन्द्रप्रकाश तिवारीले बताए ।

महानगरीय प्रहरी अपराध महाशाखा र जिल्ला प्रहरी काभ्रेबाट खटिएको टोलीले नख्खुस्थित एनसेल कार्यालय बाहिर भएको विस्फोटमा संग्लन भएको आरोपमा गत चैत ९ गते काभ्रेबाट नेत्रविक्रम चन्द समूहका तेस्रो वरीयताका नेता हेमन्तप्रकाश ओलीसहित नौ जनालाई पक्राउ गरेको थियो ।

अदालतमा पेस गरिएकाहरुलाई प्रहरीले कर्तव्य ज्यान, बम विस्फोट र राज्य विरुद्धको अपराधमा मुद्दा चलाएको छ । प्रहरी परिसर ललितपुरले घटनाको बेलाको सिसिटिभी फुटेज र प्रतिवादीहरुसँग प्रहरीले गरेको बयानको भिडियो सामाग्री पनि अदालतमा बुझाएको छ । प्रहरी स्रोतका अनुसार सिसिटिभी फुटेजमा प्रतिवादीहरु सूर्य भुजेल र जुम्ली भनिने वीरबहादुर खडायतलाई पनि देखिएको छ । प्रहरीले वीरबहादुरले बमलाई एनसेलको कार्यालयभित्र लगेर राखेको समेत देखिएको भन्दै उनीमाथि आरोप लगाएको थियो ।

उक्त घटनामा ओलीसहित रामकृष्ण खतिवडा, शिव धिमाल, दयाहाङ भनिने डिकेन्द्र राई, ईश्वर दमाई, जुम्ली भनिने वीरबहादुर कडायतलाई थुनामा पठाएको हो । घटनामा जोडिएका सूर्य भुजेल भने सर्वोच्च अदालतबाट बन्दी प्रत्यक्षीकरणको आदेशमार्फत रिहा भएका थिए । अदालतले फरार आरोपितको हकमा समान म्याद काट्ने भनी आदेश गरेको छ ।

प्रकाशित : वैशाख १०, २०७६ १९:३३
पूरा पढ्नुहोस्
प्रतिक्रिया
पठाउनुहोस्