विद्वानहरूको देश बनाउनुपर्छ : प्रधानमन्त्री

कान्तिपुर संवाददाता

काठमाडौँ — प्रधानमन्त्री केपी शर्मा ओलीले नेपाललाई निरक्षरहरूको नभई विद्वान्हरूको देश बनाउनुपर्ने बताएका छन् । विद्यालय भर्ना अभियानका सन्दर्भमा बुधबार बालुवाटारमा नेकपा निकट युवा र विद्यार्थीर्सँगको अन्तरक्रियामा प्रधानमन्त्री ओलीले विद्वान् पुर्खाको ‘जेनेटिक मेमोरी’ उपयोग हामीले गर्नुपर्ने बताए ।

‘विद्वान् पुर्खाका सन्तान हामी केही समय निरक्षर रह्यौं । अब यो अवस्था रहिरहन सक्दैन,’ उनले भने ।

प्रधानमन्त्री ओलीले बालबालिका विद्यालय भर्नाका लागि अभिभावक सचेतना सञ्चालन गर्नुपर्नेमा जोड दिए । ‘शिक्षाको महत्त्व अभिभावकलाई बुझाउनुपर्छ,’ उनले भने, ‘त्यसपछि मात्र उनीहरूले छोराछोरी पढ्न पठाउँछन् ।’

प्रधानमन्त्री ओलीले युवा र विद्यार्थीलाई सिर्जनशील बन्न र समाजसुधारका काममा लाग्न कुनै अवरोध नरहेको बताए । ‘अब राजनीतिक संघर्ष र आन्दोलन गर्नुपर्ने दिन सकिएका छन्,’ आन्दोलनको स्वरूप फेरिएको उल्लेख गर्दै भने, ‘युवाले समाज सुधारका लागि शिक्षा, स्वास्थ्य, श्रम, सीप र उत्पादनजस्ता कुरामा ध्यान दिनुपर्छ ।’

प्रधानमन्त्री ओलीले विद्यार्थी भर्ना अभियान गत वर्षदेखि विशेष रूपले सुरु गरिएको उल्लेख गर्दै विद्यार्थी र युवा घरघरमै गएर बालबालिकालाई विद्यालयमा भर्ना हुन प्रेरित गर्नुपर्ने बताए ।

‘विकास र समृद्धिको महत्त्वपूर्ण माध्यम शिक्षा हो । हामीले समृद्धि हासिल गर्न शिक्षाको स्तर उठाउनुपर्छ । यसका लागि तपाईंहरूको भूमिका महत्त्वपूर्ण हुन्छ । विद्यालय उमेरका कोही बालबालिका विद्यालयबाहिर हुनु हुँदैन,’ उनले भने ।

शिक्षा, विज्ञान तथा प्रविधिमन्त्री गिरिराजमणि पोखरेलले अन्तर्क्रिया सहजीकरण गरेका थिए । मन्त्रालयले वैशाख १५ गतेसम्म विद्यार्थी भर्ना अभियान जारी गरेको छ ।

प्रकाशित : वैशाख ४, २०७६ १९:०५
प्रतिक्रिया
पठाउनुहोस्

निर्वाचनका लागि काँकडभिट्टा नाका सिल, यात्रुलाई सास्ती (तस्बिरहरु)

पर्वत पोर्तेल

काँकडभिट्टा — भारतमा जारी लोकसभा निर्वाचनका कारण नेपाल–भारत सीमा नाका बन्द हुँदा यात्रु तथा पर्यटकलाई सीमा वारपार गर्न सास्ती भएको छ ।

बिहीबार पश्चिम बंगालको दार्जिलिड, जलपाइगुडी र रायगंज जिल्लामा निर्वाचन हुँदैछ । पहिलो चरणमा बंगालको आलिपुरद्वार र कोचबिहार जिल्लामा निर्वाचन सम्पन्न भइसकेको छ । निर्वाचनका कारण भारतीय सुरक्षा निकायले मंगलबार बेलुकाबाटै नाका बन्द गराएको थियो । जसका कारण सयौं यात्रु अलपत्र परेका थिए ।

तर, बुधबार दिउँसोदेखि नेपाल तथा भारतीय सुरक्षाकर्मीबीचको सहकार्यमा यात्रुलाई वारपार गराइएको थियो । भारततिर जाने यात्रुलाई भारतीय मतदाता परिचय पत्रका आधारमा प्रवेश गर्न सीमा सुरक्षा बल सहमत भएको थियो । भारतबाट आउने यात्रुको हकमा भने कुनै कागजात जरुरी नभएको सुरक्षा अधिकारीले जनाए ।

भारतीय सीमा सुरक्षा बल (एसएसबी) का महानिरीक्षक श्रीकुमार बन्दोपाध्यायले खुला सीमानाका कारण निर्वाचनमा हुनसक्ने अवान्छित गतिविधि नियन्त्रणका लागि नाका बन्द गरिएको जनाए । निर्वाचनका दिन बिहानैदेखि यात्रुसहित सवारी आवागमनलाई पूर्ण रुपमा निषेध गरिने जनाइएको छ । निर्वाचन सम्पन्न भएपछि शुक्रबार बिहानदेखि नाका खुला गरिने छ ।

उनका अनुसार निर्वाचनका सुरक्षाका लागि निर्वाचन हुने तीन जिल्लामा विशेष सुरक्षा योजना लागू गरिएको छ । तीन जिल्लामा करिव विभिन्न ९ कम्पनी सुरक्षाकर्मी परिचालन गरिने छ । उनले नेपाल–भारत सीमा सुरक्षित रहेको तर भुटान र बंगलादेशसंगका सीमा क्षेत्रहरु असुरक्षित रहेकाले ती क्षेत्रहरुमा निगरानी बढाइएको जनाए ।

नाकाबन्दीका कारण मेची भन्सार र भद्रपुर छोरी भन्सार कार्यालयको आयात निर्यात पनि ठप्प छ । भारत तथा नेपाली बजारहरु पनि प्रायः सुनसान छन् ।


प्रकाशित : वैशाख ४, २०७६ १८:५२
पूरा पढ्नुहोस्
प्रतिक्रिया
पठाउनुहोस्