राष्ट्रपति अमेरिका जाने

कान्तिपुर संवाददाता

काठमाडौँ — राष्ट्रपति विद्यादेवी भण्डारी संयुक्त राष्ट्रसंघीय कार्यक्रममा भाग लिन यही फागुन २६ गते अमेरिका जाने भएकी छन् । परराष्ट्र मन्त्रालयका अनुसार राष्ट्रसंघीय महिला नियोगको अन्तरसरकारी संस्था 'कमिसन अन दि स्ट्याटस अफ वुमन' ले गर्न लागेको 'वुमन इन पावर' कार्यक्रममा राष्ट्रपति सहभागी हुन लागेकी हुन् । 

फाइल तस्बिर ।

राष्ट्रपतिका साथ महिला, बालबालिका तथा ज्येष्ठ नागरिकमन्त्री थममाया थापा पनि जाने कार्यक्रम तय भएको परराष्ट्रमन्त्री प्रदीप ज्ञवालीले जानकारी दिए। पाँचदिने भ्रमणका क्रममा राष्ट्रपतिले फागुन २८ गते 'कसरी महिला नेतृत्वले संसार बदल्न सक्छन्' भन्ने विषयमा राष्ट्रसंघमा मन्तव्यसमेत दिने कार्यक्रम छ।

प्रकाशित : फाल्गुन २१, २०७५ २०:२४
प्रतिक्रिया
पठाउनुहोस्

अनावश्यक खर्चमा महानगर सचेत

समाचार प्रभाव
विद्या राई

काठमाडौँ — जलपान खर्चका विषयमा महानगर सचेत बनेको छ । गत पुस ३ गते ‘काठमाडौँ महानगरमा अचाक्ली खर्च, बैठक भत्ता मात्रै डेढ करोड’ शिर्षकको समाचार प्रकाशित भएपछि अनावश्यक खर्चमा महानगर सचेत बनेको हो । 

समाचार आएपछि महानगरमा मातहतका कर्मचारीहरूलाई मेयर विद्यासुन्दर शाक्यले जलपान खर्चमा मितव्ययी अपनाउन निर्देशन दिएका थिए । प्रवक्ता ईश्वरमान डंगोलले भने, ‘डेढ/दुई महिना भयो, जलपान खर्च नियन्त्रण गर्न मेयर साबले निर्देशन दिनुभएको थियो ।’

विशेष गरेर मेयर र उपमेयरको सचिवालयमा जलपान खर्च नियन्त्रणलाई कडाइका साथ पालना गर्न निर्देशन दिएका छन् । ‘आवश्यकता अनुसार खर्च गर्न पाउने तर जति मान्छे आयो त्यति नै खर्च भयो भनेर बिल पेस नगर्नु भनेर निर्देशन दिनुभएको छ,’ प्रवक्ता डंगोलले बताए ।
महानगरका पदाधिकारीहरूले आर्थिक वर्ष २०७४/०७५ मा दैनिक जलपान, बैठक भत्ता र सवारीमा वर्षभरी ३ करोड ८२ लाख रुपैयाँ खर्च गरेका थिए । कार्यालय खुलेको जम्मा २८४ दिनमा दिनहुँ १ लाख ३४ हजार ५ सय रुपैयाँ खर्च गरेका थिए । जलपान खर्चको विवरणमा २०७५ जेठ महिनाको खर्चलाई हेर्दा मेयर विद्यासुन्दर शाक्यले बागदरबारको कार्यालयमा मात्रै ८७ हजार रुपैयाँ जलपानमा खर्च गरेका थिए ।
उपमेयर हरिप्रभा खड्गीले २०७५ जेठ र असार महिनामा गरेर १ लाख ३२ हजार रुपैयाँ जलपानमा खर्च गरेकी थिइन् । वर्षभरी बागदरबारस्थित मेयरको कार्यकक्ष र सचिवालयमा जलपान तथा खाना खर्च ७ लाख रुपैयाँ र राष्ट्रिय सभागृहमा रहेको मेयरको अर्को कार्यालयमा ६ लाख ८९ हजार रुपैयाँ गरी १३ लाख ८९ हजार रुपैयाँ खर्च भएको थियो । यसै गरी उपमेयरको सचिवालयमा ५ लाख ५१ हजार रुपैयाँ जलपानमा खर्च भएको थियो ।
महानगरका विभाग र महाशाखाका कार्यालयहरुले पनि यो निर्देशनलाई पालना गरेका छन् । राष्ट्रिय सभागृहस्थित जिन्सी शाखा प्रमुख सुदर्शन भट्टराईले भने, ‘बैठकका बेला पनि कालो चिया मै काम चलाउनु परेको छ ।’ महानगरका कार्यालयहरूमा पहिले कर्मचारीहरूलाई कफी खुवाउने चलन थियो भने मेयरको निर्देशनपछि चिया मात्रै खुवाउँछन् ।

सामान्य लाग्ने भए पनि यो विषय कुनै न कुनै बेला खोजीको विषय बन्ने भएकाले सचेत भएको अर्का एक जना कर्मचारीले भने । ‘कहिलेकाहीँ मःम खाऔँ न भनेर महानगरकै पैसाले खाइन्थ्यो भने अहिले गोजीकै खर्च गर्छौँ’ विभाग तथा महाशाखाका कार्यालयहरूले ३० देखि ५० प्रतिशतका दरले जलपान खर्च कटौती गरेको उनले भने ।

यो पनि पढ्नुहोस्:

प्रकाशित : फाल्गुन २१, २०७५ १९:२७
पूरा पढ्नुहोस्
प्रतिक्रिया
पठाउनुहोस्