अभिभावकले छाडेपछि बिचल्ली

बाबु जेलमा र आमा अर्को विवाह गरेपछि खोलागाउँका चार बालबालिका अलपत्र परेका छन् ।
उनीहरू माग्दै गुजारा गरिरहेका छन् । खोलागाउँ-९ मानकोटका प्रेम परियार तीन वर्षदेखि जेलमा छन् । उनी जेल परेको एक वर्ष नबित्दै पत्नीले अर्कैसँग विवाह गरेपछि बालबालिकाहरू बिचल्लीमा परेका हुन् । आमाबाबु नभएपछि १२ वर्षका मनोज, १० वर्षकी रुपा, ८ वर्षका दीपक र ६ वर्षका रवि परियार बिचल्लीमा छन् । बालबालिकाहरूले दैनिक माग्दै गुजारा निर्वाह गरिरहेको आफन्त गणेश परियारले बताए । 'गाउँघरमा माग्दै गुजारा गरिरहेका छन्,' उनले भने, 'जाडामा बालबालिकाहरूको बिचल्ली भएको छ ।' उनीहरूका बाबु प्रेम कर्तव्य ज्यान मुद्दामा जिल्ला कारागारमा सजाय भोगिरहेका छन् ।
चारैजना बालबालिका पढाइबाट वञ्चित भएका छन् । मागेरै गुजारा चलाउने उनीहरूले राम्ररी खानसमेत नपाएको परियारले बताए । स्वास्थ्य समस्या आउँदा गाउँलेहरूले चन्दा संकलन गरी उपचार गर्ने गरेका छन् । उनीहरू बस्दै आएको घर वषर्ातको समयमा भत्किएपछि नजिकका विद्यालय तथा सार्वजनिक स्थानमा सुत्ने गरेका छन् । 'कहिलेकाहीं आफन्तको घरमा सुत्छन्, कहिल्यै भने बाहिरै सुत्ने गरेका छन्,' उनले भने, 'उनीहरूको पालनपोषण तथा पढाइका लागि कसैले सहयोग गरिदिए हुन्थ्यो ।'

प्रकाशित : पुस १३, २०७० १३:३६