सिक्किमबाट सोनम

दीपक परियार

लेखनाथ — कलाकार डेनी डेन्जोङपादेखि निर्देशक उगेन छोपेलसम्म । संगीतकार रञ्जित गजमेर होऊन् या छायांकार विनोद प्रधान । अभिनेता उत्तम प्रधान र अभिनेत्री निरुता सिंहको जोडी । यी सबै नेपालीभाषी सिक्किमेली कुनैसमय नेपाली फिल्म उद्योगमा छाए ।

कहीँ कतै फिल्मका कलाकार साेनम बरफुड‍्पा र शिवानी गिरी ।

आफ्नो समयमा नेपाली फिल्म र गीतसंगीतमा गतिलो छाप छोडेर सबैको मनमस्तिष्कमा बसे । फेरि एक युवा आफ्नो भाग्य परिक्षण गर्न सिक्किमबाट नेपाल आएका छन् ।

गान्तोकका सोनम बरफुङपाले नेपाली फिल्म ‘कहीँ कतै’ बाट डेब्यु गरेका छन् । फिल्म शुक्रबारदेखि रिलिज भयो । उत्तम प्रधानपछि नेपाली फिल्म खेल्ने अभिनेता उनी भएका छन् । संयोग के छ भने, प्रधानको डेब्यु फिल्म ‘दर्पणछाया’ मा दिलीप रायमाझी को–एक्टर थिए । सोनमको डेब्यु फिल्ममा पनि रायमाझी नै छन् । प्रधानको पहिलो फिल्म सुपरहिट भयो । सोनमको के हुने हो, परिणाम आउन बाँकी नै छ ।

सोनम फिल्म खेल्नुअघि मोडलिङमा रमाइरहेका थिए । सन् २०१३ मा ‘मेगा मिस्टर नर्थ इस्ट’ मा फस्र्ट रनरअप र बेस्ट पर्सनालिटीको टाइटल जिते । ‘मिस्टर भाइब्स सिक्किम’ मा पनि सहभागी भए । उनले ‘साइनो’, ‘दर्पणछाया’ बारे सुनेका थिए । ‘लुट’ देखि नेपाली फिल्म पनि हेर्न थाले । पछिल्लो क्रममा अनमोल केसी, प्रदीप खडकाका फिल्महरू फलो गर्न सुरु गरे । एक दिन सिक्किमकै चेली उमा गिरी (बेबी) ले फेसबुकमा सोनमलाई म्यासेज गरिन्, जसमा फिल्मको अफर थियो ।

‘कहीँ कतै’ हालै पहिलोपल्ट सिक्किममा स्क्रिनिङ भयो । ‘मान्छे आउँछन् कि आउँदैनन् भन्ने खुब डर थियो,’ पोखरामा हालै सोनमले भने, ‘तर साथ मिल्यो ।’ फिल्म छायांकनका क्रममा उनलाई अप्ठेरो नपरेको होइन । सिक्किम र नेपालमा बोलिने लवजले उनलाई अप्ठ्यारो पार्‍यो । तर दिलीप रायमाझी, किशोर खतिवडा लगायतले उनलाई भरपूर सहयोग गरे ।

‘अभिनय गर्न काठमाडौं आउँदा उनले चिनेका मान्छे धेरै थिएनन् । अभिनयको अभ्यास गर्दै सिक्ने क्रममा छन् । ‘अभिनय गर्दा मलाई आनन्द लाग्छ,’ उनले भने, ‘आफूलाई जे उचित लाग्छ त्यही गर्नुपर्छ ।’ उत्तम प्रधानपछि सिक्किमलाई प्रतिनिधित्व गर्ने अर्को अभिनेता नभएकोले पनि नेपाली दर्शकलाई आफूलाई मन पराउनेमा उनी ढुक्क छन् । पहिलो फिल्म रिलिज हुने दिनमै उनले निर्देशक साजन श्रेष्ठको नयाँ फिल्ममा अनुबन्ध गर्दै छन् । निर्माता उमा बेबी सोनमको चकलेटी लुक्स दर्शकले मन पराउनेमा ढुक्क छिन् । फिल्ममा उनकी छोरी शिवानी गिरीले पनि डेब्यु गरेकी छन् । फिल्म विशुद्ध पारिवारिक प्रेमकथामा आधारित रहेको उनले बताइन् ।

प्रकाशित : श्रावण २७, २०७५ ०८:२१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

लोकार्नोमा सिंगापुरको फिल्म अब्बल

कान्तिपुर संवाददाता

लोकार्नो (स्विटजरल्यान्ड) — ७१ औं लोकार्नो फिल्म फेस्टिभलमा सिंगापुरको फिल्म ‘द ल्यान्ड इम्याजिन्ड’ ले उत्कृष्ट फिल्मको गोल्डन लियोपर्ड जितेको छ । सिउ हुवाले निर्देशन गरेको यो फिल्मको लोकार्नोमा वल्र्ड प्रिमियर गरिएको थियो ।

चिनियाँ निर्देशक जिया ज्याङ किले नेतृत्व गरेको निर्णायक मण्डलले उत्कृष्ट फिचर फिल्मको प्रतिस्पर्धामा रहेका १५ फिल्ममध्ये यसलाई चुनेको हो । समुद्रलाई धकेल्दै निकालिएको जमिनमा काम गर्ने एक हराएको मजदुरको खोजीको कथा यसमा छ । फिल्मले चिनियाँ र बंगलादेशी कामदारको खोजी गर्ने सिंगापुरको पुलिस अफिसरको यात्रालाई देखाउँछ, जो आफैं भ्रमको संसारमा प्रवेश गरेर हराउन पुग्छ ।

उत्कृष्ट निर्देशकको अवार्ड भने चिलीकी डोमिंगा सोतोमयरले पाइन् । उनले फिल्म ‘टु लेट टु डाइ योङ’ का लागि यो अवार्ड पाएकी हुन् । दक्षिण कोरियाको फिल्म ‘होटल बाई द रिभर’ का लागि कि जुबोङले उत्कृष्ट अभिनेताको अवार्ड पाए । रोमानियाको फिल्म ‘एलिस टी’ का लागि आन्द्रा गुटीले उत्कृष्ट अभिनेत्रीको अवार्ड पाइन् भने महोत्सवमा फ्रान्सेली निर्देशक योलन्द जुवरम्यानको डकुमेन्ट्री ‘एम’लाई जुरी प्राइज दिइयो ।

लोकार्नोमा विशेष मानिने दर्शकको रोजाइको फिल्मको पुरस्कार भने अमेरिकी निर्देशक स्पाइक लीको फिल्म ‘ब्ल्याक क्लान्सम्यान’ ले पायो । लोकार्नोमा यो अवार्डलाई किन पनि विशेष मानिन्छ भने यहाँ एकसाथ ८ हजार जनाले खुला आकाशमुनि बसेर फिल्म हेर्छन् । पियाजा ग्रान्डी भनिने त्यही विशेष सोमा यो फिल्म देखाइएको थियो ।

कोलोराडो पुलिसमा भर्ती भएको एक अश्वेत प्रहरीले अतिवादी गोराहरूको समूहको निगारानी गर्ने कथा यसमा छ । पुरानो कथा भए पनि लीले अन्त्यमा त्यसलाई वर्तमान अमेरिकी राष्ट्रपति डोनाल्ड ट्रमको अनुदारवादी नीतिसँग जोडेका छन् । यस वर्षको क्यान्स फिल्म फेस्टिभलमा यो फिल्मले ग्रान्ड जुरी प्राइज पाएको थियो । बेलायती फिल्म ‘रे एन्ड लिज’ ले पनि स्पेसल मेन्सन अवार्ड पायो ।

कम्पिटिसन फर फिल्म मेकर्स अफ प्रिजेन्ट नामक अर्को प्रतिस्पर्धामा सिरियाका शरणार्थी महिलाहरूबारे सारा फतेहीले बनाएको डकुमेन्ड्री ‘चाओस’ ले अवार्ड पायो । नयाँ निर्देशकको अवार्ड टर्कीका तारिक अक्तसले ‘डेड हर्स नेबुला’ का लागि पाए । साइन अफ लाइफ नामक प्रतिस्पर्धामा चीनका लिन जीको फिल्म ‘द फ्रजाइल हाउस’ उत्कृष्ट ठहरियो । छोटा फिल्मको प्रतियोगिता पार्डी डी डोमेनीमा फ्रान्सेली छोटो फिल्म ‘क्यास्टल टु क्यास्टल’ उत्कृष्ट भयो । यो प्रतियोगिताको निर्णायकमा नेपाली निर्देशक दीपक रौनियार पनि थिए ।

प्रकाशित : श्रावण २७, २०७५ ०८:१९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT