‘ब्ल्याक प्यान्थर’ लाई साग अवार्ड

कलाकारहरूको बेजोड अभिनयका लागि उक्त अवार्ड दिइएको बताइएको छ । निर्देशक रायन कुग्लरको उक्त सुपरहिरोमा आधारित फिल्म ओस्कारमा समेत उत्कृष्ट फिल्मसहित अन्य महत्त्वपूर्ण विधामा मनोनयनमा परेको छ, जहाँ ‘ब्ल्याक प्यान्थर’ को भिडन्त ‘रोमा’ र ‘द फेभरेट’ जस्ता बढी विधामा मनोनयनमा रहेका फिल्मसँग हुनेछ ।

सागमा उत्कृष्ट अभिनेता र अभिनेत्रीको अवार्ड क्रमश: रामी मलेक र ग्लेन क्लोजले जिते । ‘बोहेमन र्‍याप्सोडी’ मा मुख्य गायकको भूमिकामा रहेका मलेक उत्कृष्ट अभिनेताका लागि ओस्कारमा पनि छानिएका छन् भने ७१ वर्षीया क्लोज फिल्म ‘द वाइफ’ का लागि पुरस्कृत भएकी हुन् । सोही फिल्मका लागि उनले यसअघि गोल्डेन ग्लोब र क्रिटिक्स च्वाइसको अवार्ड पनि जितिसकेकी छन् ।

अप्रत्याशित अवार्ड भने सह अभिनेत्रीको अवार्डले दिलायो । हरर थ्रिलर जानराको फिल्म ‘अ क्वाइट प्लेस’ बाट एमिली ब्लन्टले उक्त अवार्ड जितेकी थिइन् । उनलाई सागमा ‘मेरी पोपिन्स रिटन्र्स’ का लागि अभिनेत्रीको विधामा समेत राखिएको थियो । जुन अवार्ड उनले क्लोजका लागि गुमाउनुपर्‍यो ।

एमिली भने ओस्कारको कुनै पनि विधामा मनोनयनमा परेकी छैनन् । साग अवार्ड जितेपछि एमिलीले फिल्मका निर्देशक तथा आफ्ना पतिलाई धन्यवाद व्यक्त गरेकी थिइन् । सहअभिनेताका लागि भने अपेक्षाकृत रूपमा नै ‘ग्रीन बुक’ बाट महर्साला अलीले जिते । दुई वर्षअघि उनले नै ‘मुनलाइट’ बाट उत्कृष्ट अभिनेताको ओस्कार हात पारेका थिए ।