प्रकाशको ‘बोल माया’

विमल खतिवडा

काठमाडौँ — फरक गीत गाउन रुचाउने लोकदोहोरी गायक प्रकाश सपुत मार्मिक गीत लिएर दर्शक श्रोतामाझ आएका छन् ।

आफ्नै शब्द र संगित रहेको ‘बोल माया’ गीतले अहिले सबैको ध्यान तानेको छ। सातायता युट्युव ट्रेन्डिङको पहिलो स्थानमा रहन सफल गीत बैदेशिक रोजगारीमा जानेहरुको कथामा आधारित छ।
बैदेशिक रोजगारमा जाँदा घट्ने घट्नाक्रमलाई समेटेर तयार पारिएको गीतको भिडियोले सबैलाई भावुक बनाउँछ। गीतमा सपुतसँगै नारायण रायमाझी र शान्तिश्री परियारको आवाज सुन्न सकिन्छ। गीतमा सपुतसँगै अञ्जली अधिकारी, देबेन्द्र बाबु र सीतारे गन्धर्वले अभिनय गरेका छन्।

प्रकाशित : जेष्ठ ११, २०७५ १७:१६
प्रतिक्रिया
पठाउनुहोस्

प्रदेश १ को वर्षे अधिवेशन डाकियो

लीलावल्लभ घिमिरे

विराटनगर — प्रदेश प्रमुख गोविन्दबहादुर तुम्वाहाङले जेठ १७ गते बिहीबार अपराह्न ३ बजे प्रदेशसभाको वर्षे अधिवेशन आह्वान गरेका छन् ।


बुधबार बसेको मन्त्रिपरिषद्‍को बैठकले अधिवेशन बोलाउन प्रदेश प्रमुख तुम्वाहाङलाई प्रदेशसभाको दोस्रो अधिवेशन जेठ १७ गतेका लागि सिफारिस गरेको थियो। प्रदेश प्रमुखका सचिव रामकृष्ण गुरागाईले शुक्रबार प्रदेशसभाको वर्षे अधिवेशन आह्वान गरिएको पत्र प्रदेशसभा सचिवालयमा पठाएको सचिवालय सचिव केदारप्रसाद पनेरुले बताए।

यो अधिवेशनमा आगामी आर्थिक वर्ष २०७५/७६ को नीति तथा कार्यक्रम पेस हुने छ। सरकारले असार १ गते बजेट सार्वजनिक गर्ने तयारी गरिरहेको छ। बजेटका अलावा प्रदेश सरकारलाई आवश्यक पर्ने विधेयकहरु पनि ल्याउने तयारी गरिएको छ। अहिले अधिवेशनमा प्रदेशको स्थायी राजधानी र नाम तोक्न समेत सांसदहरुले दबाब दिइरहेका छन्।

प्रदेश प्रमुख तुम्वाहाङले बिहीबार धनकुटामा वर्षे अधिवेशनमा स्थायी राजधानी र नाम तोक्न सकिने संकेत समेत गरेका थिए। प्रदेशमा मुख्यमन्त्री शेरधन राईले समेत यही अधिवेशनबाट स्थायी राजधानी र नामाङ्कको विषय टुङ्गो लगाउने प्रयासमा आफू रहेको पहिला नै बताइसकेका छन्।

प्रदेश सभाको पहिलो अधिवेशनले प्रदेशसभा नियमावलीसहित १२ वटा विधेयक पारित गरेको थियो। पहिलो अधिवेशन ९३ दिनसम्म चलेको थियो। माघ २२ गते सुरु भएको पहिलो अधिवेशनमा ३९ वटा बैठक बसेका थिए।
विज्ञ समूह गठन
बुधबार बसेको मन्त्रिपरिषद् बैठकले सात सदस्यीय विज्ञ समूह गठन गर्ने निर्णय गरेको छ। रमेशचन्द्र पौडेलको संयोजकत्वमा गठित समितिमा सुयष प्याकुरेल, उत्तरकुमार रेग्मी र सोमनाथ अधिकारी छन्। अन्य सदस्यपछि थप हुने सरकार प्रवक्ता आन्तरिक मामिला तथा कानुनमन्त्री हिक्मतकुमार कार्कीले बताए।

योजना आयोग गठन नहुँदासम्म समितिले सरकारलाई सहयोग गर्ने छ। संयोजक पोडेललाई योजना, प्याकुरेललाई ब्यापार, रेग्मीलाई पूर्वाधार र अधिकारीलाई कृषि, जलश्रोत र पर्यटन हेर्ने जिम्मा दिएको छ। यसैगरी बैठकले बाढीप्रकोप नियन्त्रण निर्देशिका र योजना छनोट कार्यविधि समेत पास गरेको छ।

प्रकाशित : जेष्ठ ११, २०७५ १६:५१
पूरा पढ्नुहोस्
प्रतिक्रिया
पठाउनुहोस्