‘लम्फू’ का गीत - मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

‘लम्फू’ का गीत 

कान्तिपुर संवाददाता

काठमाडौँ — ‘लम्फू’ का अडियो गीतहरू सार्वजनिक भएका छन् । चारै गीतमा संगीतकार अर्जुन पोखरेलको संगीत रहेको छ । ती गीत प्रमोद खरेल, शिव परियार, दुर्गा खरेल, शुरेश लामा र अप्सरा घिमिरेले गाएका हुन् ।

‘सँगै जिउने सँगै मर्ने...’, ‘तिम्लाई भुलेर...’, ’दोधार दोधारमा...’ र ‘सुको छैन यार...’ गीत फिल्ममा समावेश छन् । दिग्गज धौलारी, युवराज सापकोटा, प्रमोद ढुंगाना र नरेश भट्टराईले लेखेका गीतहरू निकै अर्थपूर्ण रहेको संगीतकार पोखरेलले दाबी गरे ।

गोपालचन्द्र लामिछानेले निर्देशन गरेको फिल्ममा सलोन बस्नेत, मरिष्का पोखरेल, चाँदनी शर्मा, कबिर खड्का, सञ्जित भण्डारी लगायतको अभिनय छ ।


प्रकाशित : माघ १६, २०७४ ०७:४५
प्रतिक्रिया
पठाउनुहोस्

‘दर्शकको उत्साह अनपेक्षित’

कान्तिपुर संवाददाता

धरान — कुनै समय पूर्वको रंगमञ्चीय राजधानी मानिन्थ्यो धरानलाई । बिस्तारै यो सेलायो । छिटफुटबाहेक यहाँ रंगमञ्चीय गतिविधि हुन छाडे । मुलुक संघीयता कार्यान्वयनतिर तीव्र रूपमा लम्किरहेको बेला रंगभूमि एकेडेमीले धरानमा रंगमञ्च ब्यँुताउने सानो प्रयास गरेको छ ।

धरान सभागृहमा एक साता मञ्चन भएको नाटक ‘इङघङ’ को एउटा दृश्य । तस्बिर : प्रदीप मेन्याङ्बो/कान्तिपुर

लिम्बू समुदायको सामाजिक परिवेश र आसपासको समाज समेटेर तयार पारेको नाटक ‘इङघङ’ (सन्देश) यहाँ एक साता चल्यो । दर्शकको मनग्गे साथले निर्देशक विष्णु मोक्तान तामाङ मुग्ध बने । ‘दर्शकको यति राम्रो साथ पाउँछ भन्ने सोचेकै थिएनौं,’ तामाङले आइतबार मञ्चन सकिएको नाटकको अनुभव सुनाए, ‘पूर्वमा रंगमञ्चको राम्रो सम्भावना छ भन्ने यसले पनि पुष्टि गर्छ ।’
धरान सभागृहको हलमा माघ ९ देखि नाटक लगातार मञ्चनमा थियो । गाउँले परिवेशमा तयार पारिएको नाटकमा दर्शकहरू घरी हाँस्थे, घरी गम्भीर बन्थे । पूर्वेली लवज, संस्कृति र भेषभूषाको प्रयोग नाटकको मौलिक पक्ष थियो । एक घण्टा ४५ मिनेटको नाटकले अशिक्षा, अन्धविश्वास र छुवाछुत जस्ता घटनालाई विषयवस्तु बनाएको थियो । साथसाथै, पछिल्लो समय आधुनिक सूचना प्रविधिले नयाँ पुस्तामा पारेको सकारात्मक र नकारात्मक दुवै असरलाई नाटकले केलाउने कोसिस गरेको थियो भने लिम्बू समुदाय र आसपासका अन्य समुदायबीचको सांस्कृतिक सामाजिक सम्बन्धलाई पनि यसले पर्गेल्ने प्रयास गरेको थियो । ‘मौलिक संस्कृतिको जगेर्ना गर्नुपर्छ भन्ने सन्देशलाई फरक ढंगले उठाउने कोसिस गरेका हौं,’ निर्देशक तामाङले भने ।
निर्देशक स्वयंसहित नाटकमा दीपेन्द्रसिंह दर्नाल, प्रेसिका निरौला, हरि इवाहाङ लिम्बू, तुलसा थापा, शंकर थापा, कुमारी राई, गेभी लिम्बू, मिलन राई, निश्चल कुलुङ, उदित इवाहाङ लिम्बूले अभिनय गरेका थिए ।
‘अढाइ दशकअघि नेपाली रंगमञ्चमा धरानको चम्किलो नाम थियो,’ नाटक लेखनसमेत गरेका तामाङले भने, ‘५० को दशकदेखि खडेरी सुरु भयो । यो खडेरीलाई हटाउन रंगभूमि एकेडेमीमार्फत सानो थालनी गरेका हौं ।’

प्रकाशित : माघ १६, २०७४ ०७:४४
पूरा पढ्नुहोस्
प्रतिक्रिया
पठाउनुहोस्
×