वार्नरले मागे माफी

बीबीसी

नटिङघम — डेविड वार्नरले दुर्घटनावश टाउको फुटाइदिएकोमा आफ्नी आमासँग माफी मागेको जयकिसन प्लाहाले बताएका छन् । जुन ९ मा विश्वकप क्रिकेटमा भारतसँगको खेलअघि अस्ट्रेलियाली ब्याट्सम्यान वार्नरले नेट्समा प्रहार गरेको बलले बलर प्लाहाको टाउको फुटेको थियो । 

पश्चिम लन्डनमा बस्ने २३ वर्षे प्लाहाले ओभलको उक्त घटनापछि तीन दिन अस्पतालमा बिताउनुपरेको थियो । उनलाई वार्नरले प्रहार गरेको बलले टाउको फुटेको समाचार विश्वव्यापी बनेको थियो । त्यसपछि उनलाई अमेरिकादेखि नेपालसम्मकाबाट स्वास्थ्यलाभको शुभकामना सन्देश आएको थियो ।

उनले आफूसँग वार्नरले माफी मागेको बीबीसी स्पोर्टसलाई बताए । प्लाहा स्थानीय क्रिकेटर हुन् । उनले वार्नरलाई अस्ट्रेलियाले श्रीलंकासँग खेल्नु अगाडि जुन १५ मा पुनः भेटेका थिए । भेटमा वार्नरले अस्ट्रेलियाली टोलीले हस्ताक्षर गरेको टी–सर्ट उपहारमा दिएका थिए । ‘जतिखेर बलले लाग्यो, कसैले पनि टाउको फुटेको भनेर थाहा पाएनन् । म क्यामराअगाडि केही भन्न चाहन्न थिएँ, त्यसैले उनको कानमा केही भनिदिएँ,’ प्लाहाले भने, ‘वार्नरले मेरी आमासँग पनि कुराकानी गरे र माफी मागे । मेरी आमाले उनलाई शुभकामना दिए ।’

ओस्टर्ली क्रिकेट क्लबबाट खेल्ने तीव्र गतिका बलर प्लाहा नियमित प्रशिक्षणमा छन् । उनले अन्तर्राष्ट्रिय टिम आउने गर्दा बलिङ गर्ने गरेका छन् । यसअघि उनले इंग्ल्यान्ड, पाकिस्तान, न्युजिल्यान्ड, बंगलादेश, अफगानिस्तानका साथै इन्डियन प्रिमियर लिग टोली कोलकाता नाइट राइडर्सविरुद्ध पनि बलिङ गरेका थिए ।

‘त्यो फुल बल र इनस्विङगर थियो,’ प्लाहाले भने, ‘उनले त्यस्तो कडा हानेका पनि होइनन् तर त्यो ब्याटमा राम्रोसँग आएको थियो । त्यो मेरो फलो थ्रुमै आएको थियो । जति चाँडो त्यो बल मेरो नजिक आयो मैले त्यो आफ्नै अगाडि देखें । मैले त्यसलाई छल्न पनि खोजें किनभने त्यो मेरो आँखा वा कानमा आएर लाग्न सक्थ्यो । त्यो मेरो टाउकोको माथिल्लो भागमा लाग्यो र म लड्न पुगें । मैले त्यसपछि सम्झेको भनेको सबै मतिर जम्मा भइरहेको थिएँ ।’ उनले अगाडि भने, ‘म चेत नै थिएँ, त्यही भएर केही सम्झना छ । मैले तीनवटा डेविड वार्नर देखेको थिएँ । त्यही भएर केही गहिरो स्वास फेरें । मेरो हातमा रगत थियो, जसले गर्दा डर पनि लाग्यो । तर म सकारात्मक हुन खोजिरहेको थिएँ ।’

प्रकाशित : असार ६, २०७६ ०८:२०
प्रतिक्रिया
पठाउनुहोस्

फेरि चुक्यो दक्षिण अफ्रिका

एएफपी

बर्मिङघम — दक्षिण अफ्रिकी कप्तान फाफ डु प्लेसिसलाई एउटा अर्को विश्वकप संस्करणको टिमको खराब प्रदर्शनमा निराशा हुनेछ र संयोगले त्यो निराशा त्यही मैदानमा बेहोर्नुपरेको छ, जहाँ २० वर्षअगाडि दक्षिण अफ्रिकाले आफ्नो क्रिकेट इतिहासकै सबैभन्दा दुर्भाग्यपूर्ण क्षण आत्मसात् गरेको थियो ।

दक्षिण अफ्रिका बुधबारको खेलमा न्युजिल्यान्डसँग ४ विकेटले पराजित भएपछि उसको सेमिफाइनल पुग्ने सम्भावना लगभग सकिएको छ ।

तर दक्षिण अफ्रिकीलाई एउटै सान्त्वना सुख के पनि हुनेछ भने एजबास्टनमा पछिल्लोपल्ट बेहोरेको हारको पीडा त्यति धेरै थिएन, जुन त्यही वारविकसायरको मैदानमा दुई दशक अगाडि हारको छ । अस्ट्रेलियाविरुद्धको त्यस खेलमा दक्षिण अफ्रिका अकल्पनीय रनआउटको सिकार हुँदै रनरेटका आधारमा प्रतियोगिताको फाइनल प्रवेश गर्नबाट चुकेको थियो । यसपल्टको विश्वकपमा दक्षिण अफ्रिकाको सम्भावना अझै कायम छ, तर यसका लागि उसलाई प्रतियोगिताकै नाटकीय नतिजा आवश्यक हुनेछ ।

टस हारेर ब्याटिङ निम्तो पाएको दक्षिण अफ्रिकाले कठिन पिचमा संघर्ष गर्दै ६ विकेटमा २ सय ४१ रन बनाएको थियो । यही स्कोर एक समय जितका लागि पर्याप्त देखिएको थियो । न्युजिल्यान्डको जितमा नायक रहे, कप्तान केन विलियम्सन र उनले अविजित रहेर १ सय ६ रन बनाए । न्युजिल्यान्ड जितसम्म पुग्दा तीन बलको खेल मात्र बाँकी थियो । अब एबी डी भिलियर्सका प्रशंसकले उनलाई टिममा नराख्नु अहिलेको खराब प्रदर्शनको कारण भन्न सक्नेछन् ।

डी भिलियर्स संन्यासको घोषणा तोडेर टिममा फर्कन चाहन्थे तर उनको यो मनसाय निकै ढिलो आएको थियो । जति बेला आयो, त्यति बेला दक्षिण अफ्रिकी छनोटकर्ता त्यसलाई स्विकार्न सक्ने स्थितिमै थिएनन् । यता पछिल्लो खेललाई लिएर डु प्लेसिसले भने, ‘आजको खेलको एकमात्र अन्तर विलियम्सन रहे । उनी एक्लैले आजको खेलका नतिजा तय गरे । जितका लागि टिममा त्यस्ता खेलाडी आवश्यक पर्छ र हामीसँग आज त्यस्तो खेलाडी पनि रहेन ।’

विश्वकप क्रिकेटमा निकै पीडादायी इतिहास बोकेको दक्षिण अफ्रिकाका लागि पछिल्लो हार एक अर्को ‘चोकर’ छविको हुने हो वा होइन त्यो भने भविष्यले तय गर्नेछ । ‘चोकर’ त्यस्तालाई प्रयोग गरिन्छ, जसमा जितको संघारमा रहे पनि टिम पराजित रहन्छ । बुधबारको खेल भने धेरै हदसम्म एकै खेलाडीमा विलियम्सनमा टिकेको थियो । उनले फेरि एकपल्ट साबित गरे, आफू किन पछिल्लो पुस्ताका क्रिकेट खेलाडीमध्ये सर्वाधिक उत्कृष्ट हो भनेर ।

दक्षिण अफ्रिकाको विश्वकप अभियान भने प्रतियोगिता उद्घाटन हुन अगाडि नै सुरु भइसकेको थियो । टिमले चोटका कारण अनुभवी बलर डेल स्टेयनलाई गुमाउने तय थियो । दक्षिण अफ्रिकाले जोखिम मोलेर उनलाई टिममा राख्यो । उनले एक बल पनि फ्याँक्न सकेनन् र बाहिरिए । त्यसमाथि सुरुका दुई खेल गुमाएपछि दक्षिण अफ्रिका चर्को दबाबमा आएको थियो र त्यसयता उनले आफूलाई सम्हाल्न नै सकेन । बंगलादेशविरुद्ध २१ रनको हारले दक्षिण अफ्रिकी टिमलाई छियाछिया नै पार्‍यो ।

विलियम्सन ७६ रनको स्थितिमा खेलिरहेको बेला दक्षिण अफ्रिकाले रिभ्यु लिन नसक्नु पनि हारको कारण रह्यो । इमरान ताहिरको बलमा विलियम्सन ब्याटमा ‘एज’ लागेको थियो र त्यसमा विकेटकिपर क्विन्टन डी ककले क्याच पनि लिए । तर रिभ्यु मागेनन् । ‘म त्यस बेला लङअनमा थिएँ, यसबारे नजिकमा रहेर अपिल गर्न सक्ने डी कक नै थिए,’ प्लेसिसले भने, ‘तर मलाई लाग्दैन, त्यसै कारणले खेलमा हामी पराजित रह्यौं ।’

प्रकाशित : असार ६, २०७६ ०८:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT