रसुवागढीमा सुक्खा बन्दरगाह बन्ने निश्चित

नेपाल इन्टरमोडल यातायात विकास समितिका निर्देशक लक्ष्मणबहादुर बस्नेतले फाइनल डिजाइनपत्र स्वीकृतसँगै बन्दरगाहको निर्माण प्रक्रिया अघि बढेको जानकारी दिए । चीनले बढीमा तीन महिनामा लागत इस्टमेट तयार हुने जानकारी दिएको छ । विस्तृत डिजाइन तीन महिनामा पूरा गरेर त्यसको एक महिनामा निर्माण कम्पनीको छनोट गरिने जानकारी बस्नेतले दिए । चीनले २०१४ मा बन्दरगाह बनाउन प्ररम्भिक सहमति जनाएको थियो । भूकम्पलगत्तै सिन्धुपाल्चोकको तातोपानी नाका बन्द भएपछि चीले केरुङको विकासलाई बढी प्राथमिकता दिँदै आएको छ । जनवरी १५ अर्थात् गत १ गते चीनको छेन्दु भएको पछिल्लो सम्झौतामा मुलुकका दुवै अधिकारीबीच हस्तान्तरण गरेका थिए । नेपालको तर्फबाट बस्नेतले हस्ताक्षर गरेका थिए । गुरु योजनामा भने २०१५ बन्दरगाह ८ हेक्टर क्षेत्रफलमा निर्माण हुनेछ । बन्दरगाहको डिजाइन, इस्टमेट, लगानी तथा निर्माण सबै चीनले नै गर्नेछ ।

संरचना निर्माणका लागि लाङटाङ राष्ट्रिय निकुञ्जबाट ५ र सर्वसाधाणको ३ हेक्टर जमिन अधिग्रहण गरिसकिएको छ । बन्दरगाहमा एउटा मुख्य भवन हुनेछ । त्यसमा प्रशासनिक कार्यकक्ष, क्वारेनटाइन, बैंक, ल्याब, सुरक्षालगायतका कार्यालयहरू रहनेछन् । बन्दरगाहमा ३ सय १५ भन्दा बढी कन्टेनरहरू पार्किङ गर्न सक्ने क्षमता हुनेछ । ७ सय ५० वर्ग मिटरको क्षेत्रफलमा गोदामघर निर्माण हुनेछ । सामान जाँच टर्मिनल, चेकपोस्टलगायतका आधारभूत संरचना निर्माण हुनेछ । चीनलेले आफ्नो भूभाग रसुवागढी नाकाबाट करिब ३० किलोमिटर टाढा केरुङमाथि पाङसिङमा आधुनिक बन्दरगाह निर्माण गरिरहेको छ । चीनको सिगात्सेदेखि केरुङसम्मको दूरी ४ सय ५० किमि छ ।

चीनले सन् २०२० सम्म केरुङलाई रेल सञ्जालमा जोड्ने लक्ष्य राखेको छ । पछिल्लो समय चीनसँग स्थल मार्गबाट हुँदै आएको प्रमुख व्यापार यही नाका भएकाले यसको व्यावसायिक महत्त्व बढदै गएको छ । रेलबाट ल्याएको सामानलाई सीधै ट्रकमा लोड गरी सुख्खा बन्दरगाहमा ल्याएर आवश्यक प्रक्रिया पूरा गर्न सजिलो हुने बस्नेतले बताए । यो रसुवागढीबाट स्याफ्रु, मैलुङ, त्रिशूली, गल्छी हुँदै भारत जोड्ने सबैभन्दा छोटो रुटको सडक हुनेछ ।