भद्रपुरमा आजदेखि रात्रि उडान
काठमाडौँ — पूर्वका चार जिल्लाको प्रवेशद्धार मानिने झापाको भद्रपुर विमानस्थलमा बुधबारदेखि रात्रि उडान सुरु भएको छ । यसअघि लो–भिजिविलिटी र सूर्यास्तपछि उडान हुँदैन्थ्यो । उक्त विमानस्थलमा एरिया नेभिगेशन भनिने आरएनएभी प्रविधि जडान भएकाले अब रात्रि उडान र लो–भिजिविलिटीमा पनि उडान सम्भव हुने भएको हो ।
भद्रपुर विमानस्थल प्रमुख पूर्ण चुडालका अनुसार, बुधबार बुद्ध एयरको विमानले यस प्रविधि सहायताबाट जहाज उडान र अवतरण गरेको थियो । यसअघि विमानलाई ५ हजार मिटरको भिजिविलिटी आवश्यक पर्थ्यो । अब २२ सय मिटर भिजिविलिटी भए पुग्ने भएको छ,’ विमानस्थल प्रमुख चुडालले कान्तिपुरसँग भने । भद्रपुरमा आरएनएभी प्रविधि र लाइट सिस्टम जडानमा नागरिक उड्डयन प्राधिकरणले ११ करोड खर्च गरेको जनाएको छ । रात्रिकालीन उडान उद्घाटन भने भोलि (बिहीबार) प्रधानमन्त्री केपी ओलीले गर्ने कार्यक्रम छ ।
भद्रपुरसँगै रात्रि उडान हुने विमानस्थलको संख्या ६ पुगेको छ । आरएनएभी प्रविधि जडान भएपछि धनगढी, नेपालगन्ज, भैरहवा, सिमरा, विराटनगरमा रात्रि तथा लो–भिजिविलिटीमा पनि उडान हुँदै आएको थियो । यो सूचीमा अब भद्रपुर पनि थपिएको छ । जनकपुरमा यो प्रविधि जडान गर्ने कार्य हुँदै छ । केही महिनामा सञ्चालनमा ल्याइने तयारी भइरहेको प्राधिकरणले जनाएको छ । अहिले एरिया नेभिगेशन भनिने आरएनएभी प्रविधि जडान नभएकाले तराईका भरतपुर, राजविराज तथा सुर्खेतमा रात्रिकालीन उडान सुविधा छैन । त्यस्तै पहाडी र हिमाली विमानस्थलमा पनि रात्रिकालीन उडान सेवा छैन ।
यसैबीच बुद्ध एयरले बुधबार साँझ भद्रपुरमा रात्रिकालीन सफलतापूर्वक परीक्षण उडान सम्पन्न भएको जनाएको छ । उक्त कम्पनीको काठमाडौंबाट विराटनगर गएको एटीआर ७२ विमानले परीक्षण उडान गरेको थियो । उक्त विमान भद्रपुरमा परीक्षण उडान सकेर विराटनगर पुगी काठमाडौं फर्केको छ । परीक्षण उडानमा बुद्ध एयरका वरिष्ठ क्याप्टेनहरु रञ्जनकुमार शर्मा र प्रमोद थापालगायत प्राधिकरणका कर्मचारी थिए ।
भारतको सिलगुढी, दार्जिलिङलगायत बंगलादेशलाई पनि जोड्दै आएको यो विमानस्थलमा दैनिक काठमाडौं–भद्रपुर–काठमाडौं १४ वटा उडान हुन्छन् । चुडालले अब भद्रपुरबाट पोखरा, नेपालगन्ज र भैरहवामा पनि सीधा उडान सञ्चालनको तयारी भइरहेको बताए ।
प्रकाशित : माघ १६, २०७५ १९:२२
