ट्रम्पले दिए पत्रकारलाई धम्की 

बीबीसी

वासिङटन — अमेरिकी राष्ट्रपति डोनाल्ड ट्रम्पले पत्रकारहरू ‘मर्यादापुर्वक’ प्रस्तुत नभए भविष्यमा पत्रकार सम्मेलन छाडेर हिड्ने धम्की दिएका छन् ।

सीएनएनका पत्रकार जिम अकोस्टाको अमेरिकी सिक्रेट सर्भिसद्वारा खोसिएको प्रेस पास फिर्ता गर्न अदालतले आदेश दिएपछि बोल्दै ट्रम्पले उक्त धम्की दिएका हुन् ।

गतसाता एक पत्रकार सम्मेलनमा राष्ट्रपति ट्रम्पसँग विवाद भएपछि अकोस्टाको प्रेस पास खोसिएको थियो । अदालतको आदेशबारे प्रतिक्रिया दिँदै ट्रम्पले त्यो ‘कुनै ठूलो विषय नभएको’ बताए ।

तटर उने भने, ‘मानिसहरूले राम्रो व्यवहार गर्नुपर्छ ।’ उनले ‘पत्रकार सम्मेलनमा सोध्नुपर्ने प्रश्न संख्याबारे आफ्ना कर्मचारीले नीति नियम बनाइरहेको’ बताए ।

‘यदि उनीहरूले नीति, नियम नमान्ने हो भने हामी त्यो विषय अदालत पुर्‍याउनेछौं र त्यसमा हामी जित्नेछौं । तर त्यो भन्दा महत्वपूर्ण कुरा हामी पत्रकार सम्मेलनबाट बाहिरिन्छौ र तपाईहरू धेरै खुशी हुन पाउनुहुन्न,’ ट्रम्पले भने, ‘तपाई ३ वा ४ प्रश्न सोध्न सक्कुहुन्न र उभिइरहन सक्नुहुन्न । तपाईहरूले मर्यादा कायम गर्ने अभ्यास गर्नुपर्छ । ’

आफ्नो प्रेस पास फिर्ता गर्न अदालतले दिएको आदेशको प्रशंसा गर्दै पत्रकार अकोस्टाले भने, ‘अब काममा फर्किऊ ।’ वासिङटनस्थित एक अदालतका न्यायाधीशले पत्रकार परिचयपत्र खोस्ने राष्ट्रपति कार्यालयको कदमबाट कानुनले पत्रकारलाई दिएको अधिकार र वाक् स्वतन्त्रताको उल्लंघन भएको बताए । अदालतको आदेशसगै राष्ट्रपति कार्यालय र राष्ट्रपतिका अन्य कार्यक्रममा प्रवशे गर्न पाउने अकोस्टाको प्रेस पास फिर्ता गर्न ह्वाइटहाउस बाध्य भएको छ ।

नोभेम्बर ८ मा भएको एक पत्रकार सम्मेलनमा राष्ट्रपति ट्रम्पसँग विवादमा उत्रेपछि अकोस्टालाई ह्वाइटहाउस छिर्न रोक लगाइएको थियो । ह्वाइट हाउसकी एक कर्मचारीले थप प्रश्न सोध्न खोजेका अकोस्टाबाट माइक्रोफोन खोस्न प्रयास गरेकी थिइन् ।

यसैबीच, अमेरिकी राष्ट्रपति डोनाल्ड ट्रम्पले सन् २०१६ को अमेरिकी राष्ट्रपतीय चुनावमा रुसको आरोपित हस्तक्षेपबारेको अनुसन्धानका क्रममा आफूलाई सोधिएका सबै प्रश्न दिएको उल्लेख गरेका छन् ।

विशेष अनुसन्धानकर्ता रोबर्ट मुलर नेतृत्वको टोलीले राष्ट्रपतिको चुनावी अभियानमा रुसी हस्तक्षेपबारे अनुसन्धान गरिरहेको छ । आफुले प्रश्नहरूको निकै सजिलो ढंगले जवाफ दिएको बताए । उनले प्रश्नको जवाफ अनुसन्धान टोलीलाई बढाउन बाँकी रहेको पत्रकारलाई बताए ।

ट्रम्पले आफ्नो चुनावी अभियान टोलीको र रुससग कुनै साँठगाँठ नभएको बताउने गरेका छन् । ट्विटरमार्फ ट्रम्पले जारी अनुसन्धानलाई ‘नचाहिँदो कार्य’ को संज्ञा दिए ।

उनले अनावश्यक लामो अनुसन्धानमा संलग्नहरु ‘देशका लागि लज्जा’ भएको टिप्पणी गरे । यसअघि ट्रम्पले पत्रकारहरुसँग ‘अनावश्यक’ अनुसन्धानका लागि ‘लाखौं लाख डलर खर्च भएको’ दाबी गरेका थिए ।

प्रकाशित : मंसिर १, २०७५ २१:१०
प्रतिक्रिया
पठाउनुहोस्

नेपाली विदेशिए, धान काट्न भारतीय खेताला भित्रिए

पर्वत पोर्तेल

(काँकडभिट्टा) — झापामा यतिबेला धान काट्ने चटारो छ । राजमार्ग दक्षिणका अधिकांश गाउँ र नगरपालिकामा धान काट्न भारतीय श्रमिक ओइरिएका छन् । विहारको कटिहार, किसनगन्ज तथा पश्चिम बंगालको इस्लामपुर, माल्दालगायत स्थानका भारतीय श्रमिकहरू डेरा लिएरै बसेका छन् ।

झापा मेचीनगरको जोरसिमल क्षेत्रमा धान काट्ने भारत विहारबाट आएका खेतालाहरु । तस्विर : पर्वत पोर्तेल/कान्तिपुर

मेचीनगर क्षेत्रमा मात्रै करिब सय जना भारतीय श्रमिक धान काटिरहेका छन् । भारत कटिहारका मोहम्मद खानले ठेक्कामा धान काट्ने गरेको बताए । मेचीनगरको जोरसिमल आसपासमा काम गरिरहेका उनले धान काटेबापत प्रतिबिघा १० हजार रुपैयाँ लिने गरेको सुनाए । उनका अनुसार धान काट्ने, उठाउने, कुन्युँ लगाउने, थ्रेसर लगाएर घर भित्र्याउनेसम्म गर्दा ५० हजारजति ज्याला लिने गरेको जनाए । ‘अहिले हामी धान काट्ने काम मात्रै गर्दै आएका छौं,’ उनले भने ।

नेपाली युवा तथा श्रमिक वर्ग विदेश जाने क्रम बढेसँगै कृषिमा श्रमिक अभाव खडकिन थालेको जानकारको भनाइ छ । ‘नेपाली श्रमिक अभाव भएपछि काम गर्ने मान्छे त चाहियो,’ स्थानीय शिक्षक दामोदर ढुंगेलले भने, ‘नेपाली श्रमिक विदेश जान थालेपछि भारतीय श्रमिक भित्रिएका छन् ।’

भारतीय खेतालाको आगमनले आफूहरू मारमा परेको स्थानीय श्रमिकको भनाइ छ । भारतीय आउन थालेपछि हाम्रो भाग खोसिएजस्तो भएको कर्ण राजवंशीले बताए । उनले भने, ‘हामीले भारतीयलाई रोक्ने प्रयत्न गर्‍यौं तर सकेनौं ।’ भारतीय श्रमिकलाई स्थानीय श्रमिकको दाँजोमा धेरै ज्याला दिने गरिएको गुनासो प्रसाद मेचेले गरे । उनले भने, ‘भारतीयलाई जति हामीलाई विश्वास गरिँदैन ।’ स्थानीय श्रमिकका अनुसार भारतीयले धान काटेर मात्रै करोडौं रुपैयाँ लैजाने गरेका छन् ।
कृषि प्राविधिक सहायक शालिग्राम भट्टराईले नेपाली श्रमिक विदेशिएका कारण भारतीयलाई निम्त्याएर काम लगाउनुपरेको बताए । उनले भने, ‘देशमा काम गर्ने मान्छे अर्कैको देशमा काम गरिरहेका छन्, अनि हाम्रामा अर्कै देशका मान्छे आएर काम गरिरहेका छन् ।’ झापामा यो वर्ष करिब ८८ हजार हेक्टरभन्दा बढी क्षेत्रमा धान लगाइएको छ ।

प्रकाशित : मंसिर १, २०७५ २०:३०
पूरा पढ्नुहोस्
प्रतिक्रिया
पठाउनुहोस्