‘नढाक न मुहार शृंगारले’
काठमाडौँ — गायक स्वप्न सुमन पत्नी(ज्योत्स्ना योगी)सँग कतै जाँदै थिए, अबेर भइसकेको थियो । निस्कने बेला ज्योत्स्ना झल्याँस्स भइन्, आँखामा गाजल नदेखेर । स्वप्नले 'मेकअप गर्नुपर्दैन, तिमी यतिकै राम्री छौ' भन्दै गर्दा ज्योत्स्ना गाँजल लगाउन कोठाभित्र दगुरिन् ।
त्यही समयमा पल्लो कोठामा गीतार बजाउँदै गर्दा फुरेको गीत हो,'जे छौ तिमी' । युवा दर्शकको मुखैमा झुन्डिएको यो गीत अहिले स्वप्नलाई नसुन्ने दर्शकबीच पनि चर्चित छ । लामो समय युट्युब ट्रेन्डिङको पहिलो स्थान ओगटेको यो गीतको चर्चा टिकटकमै बढी देखिन्छ । 'नढाक न मुहार शृंगारले, चन्द्रमामा पनि दाग हुन्छ' भन्ने पंक्तिमा थुप्रैले फिल्टर र रियल भिडियोसहितको टिकटक बनाएका छन् । बजारको सौन्दर्य दृष्टिकोणलाई प्रहार गर्ने यो पंक्ति लेख्न स्वप्नलाई १५ मिनेट लाग्यो । 'जोजो (मायाले ज्योत्स्नालाई बोलाउने नाम) तयार हुँदै गर्दा गीतको आइडिया आयो । गाजल त्यो तिम्रो मेटाइदेउनदेखि चन्द्रमामा पनि दाग हुन्छ भन्ने लाइन त्यही समयमा लेखेर सुनाएँ । उनी भावुक भइन्, मलाई पनि राम्रै लेखेछु भन्ने भयो,' स्वप्न गीत लेख्दाका क्षण सम्झिन्छन् ।
गीतका यी शब्दले दर्शकमा यस्तो जादू चलाउलान् भन्ने चाहिँ सोचेका थिएनन्, स्वप्नले । ‘आफू जे छ त्यसमै खुसी हुनुपर्छ भन्ने जनचेतनाका रूपमा गीतलाई दर्शकले लिइदिनुभएको छ । गीतसँग आफूलाई अन्तरसम्बन्धित गरिदिँदा खुसी मिल्दो रहेछ,’ स्वप्न भन्छन्, ‘बाहिरी आवरण नै सौन्दर्य होइन, आफूभित्र जे छ त्यो वास्तविक सौन्दर्य हो भनेर गीतबाट भन्न खोजेको हुँ ।’
पूरा पढ्न : ‘नढाक न मुहार शृंगारले’
प्रकाशित : चैत्र २९, २०७९ १४:५५
