प्रायोजकले छाडेपछि प्रतियोगिता स्थगित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement
सगरमाथा कप क्रिकेट

प्रायोजकले छाडेपछि प्रतियोगिता स्थगित

विनोद भण्डारी

विराटनगर — सगरमाथा कप क्रिकेट प्रतियोगिता विराटनगरमा स्थगित भएको छ । प्रायोजक पछि हट्दा प्रदेश १ क्रिकेट संघको आयोजना र लेभिन स्पोर्टस कमर्सियल पाटर्नरको व्यवस्थापनमा विराटनगरको बैजनाथ रंगशलामा भइरहेको प्रतियोगिता बिचैमा स्थगन भएको हो ।


प्रतियोगिताको स्थगनसँगै होटल र यातायात व्यवसायीले बसेको, खाएको र गाडीमा गुडेको रकम असुलीका लागि आयोजक तथा व्यवस्थापकलाई सोमबार दिनभर खोजी गरेका थिए ।

यो प्रतियोगिताका लागि डाफा न्यूज, ड्रिम एलेभन र फ्यान कोडले हरेक म्याच टेलिभिजनबाट प्रत्यक्ष प्रसारण गर्ने सहमतिमा ७० हजार डलर प्रायोजन गरेका थिए । आइतबार भएको नेपाल प्रहरी र इस्टर्न रेल्वे पटनाबीचको १० औं म्याच टेलिभिजनबाट प्रत्यक्ष प्रसारण नभएको र अनलाइनमा क्रिकइन्फोबाट पनि लाइभ अपडेट नभएपछि असन्तुष्ट भएर प्रायोजक पछि हटेको बताइएको छ ।

यो प्रतियोगिताको प्रत्यक्ष प्रसारणको जिम्मेबारी ऐरिना टेलिभिजनलाई दिइएको थियो । गत आइतबार म्याच हुँदै गर्दा रंगशालामा राखिएको जेनेरेटरले काम नगरेपछि प्रत्यक्ष प्रसारण नहुँदा प्रायोजक पछि हटेर प्रतियोगिता स्थगित भएको व्यवस्थापक लेभिन स्पोटर्सका निर्देशक रोशन धितालले बताए । हरेक म्याच टेलिभिजनबाट प्रत्यक्ष प्रसारण हुँदा यूटुबबाट विश्वभर प्रसारण भएको थियो । त्यसकै आधारमा प्रायोजकले प्रतियोगिताको स्कोर बेटिङ एपलाई बिक्री गर्दै आएको थियो ।

प्रविधि र दक्ष प्राविधिकको अभावमा म्याचको प्रसारण हुन नसकेको स्वीकार्दै धितालले चाँडै प्रतियोगिता सञ्चालनका लागि पहल गर्ने बताए । प्रतियोगितामा १८ लिग म्याच र एक फाइनल म्याच हुने तय गरिएको थियो । विजेताले ३ लाख र उपविजेताले १ लाख रुपैयाँ पुरस्कार पाउने थिए ।

प्रतियोगितामा नेपालका तीन विभागीय टिम नेपाल प्रहरी, सशस्त्र प्रहरी र आर्मीसहित प्रदेश १ तथा भारतको इस्टर्न रेल्वे र ध्रुव क्रिकेट ऐकेडेमी लखनउको सहभागिता थियो । प्रायोजकको असन्तुष्टिका कारणले प्रतियोगिता बन्द भएको खबरसँगै खेलाडी र अफिसियल बसेका होटलवाला रकम असुलीका लागि प्रतियोगिताका व्यवस्थापक धिताललाई खोज्दै हिडे पछि यसको सर्वत्र चर्चा भएको थियो ।

प्रतियोगिताका आयोजक र व्यवस्थापकले खेलाडी तथा अफिसियल बसेका होटल र खेलाडी ओसारपसार गर्ने यातायात व्यवसायीलाई र अफिसियललाई करिब १५ लाख रुपैयाँ तिर्न बाँकी रहेको धितालले बताए । प्रतियोगिताका अफिसियल होटल इस्टर्न स्टार तथा खेलाडीहरू दिव्यरत्न, ड्राइगनलगायतका होटलमा बसेका थिए ।

धिताल सुरक्षाका लागि सोमबार साँझ आफै जिल्ला प्रहरी कार्यालय मोरङमा आएको मुद्दा शाखाका डीएसपी टीकाबहादुर कार्कीले बताए । मंगलबार होटल र यातायात व्यवसायीसहित आयोजक र व्यवस्थापकबीच मोरङ प्रहरी कार्यालयमा भएको सर्वपक्षीय सहमति पछि यसको विवाद तत्काल साम्य भएको छ ।

सहमतिअनुसार होटल र यातायात व्यवसायीलाई तिर्नुपर्ने रकमको ४० प्रतिशत १२ दिनभित्र र बाँकी रहेको ६० प्रतिशत रकम थप १८ दिनभित्र चुक्ता गर्ने सहमति भएको छ । सहमति पत्रमा आयोजकका तर्फबाट क्रिकेट संघ प्रदेश १ का सचिव मनोज कटुवाल र व्यवस्थापक धितालले हस्ताक्षर गरेको प्रहरीले बताएको छ । धितालले मंगलबार नै केही होटल र यातायात व्यवसायीलाई ब्याकडेटको चेक दिएको बताइएको छ ।

प्रकाशित : मंसिर १४, २०७९ ०७:४४
प्रतिक्रिया
पठाउनुहोस्

नेदरल्यान्ड्स र सेनेगल अन्तिम १६ मा

लिभरपुलका डिफेन्डर भर्जिल भान डाइकको कप्तानीमा रहेको डच टिम ८ वर्षपछि विश्वकपमा पुनरागमन गर्दा उत्कृष्ट नतिजा दिलाउन चाहन्छ
राजु घिसिङ

दोहा — समूह ‘ए’ को अन्तिम खेलमा जित निकाल्दै नेदरल्यान्ड्स र सेनेगल मंगलबार विश्वकप २०२२ को अन्तिम १६ मा प्रवेश गरेका छन् । नेदरल्यान्ड्सले आयोजक कतारमाथि अल बायत रंगशालामा २–० ले हरायो भने खलिफा अन्तर्राष्ट्रिय रंगशालामा सेनेगल दक्षिण अमेरिकी टिम इक्वेडरमाथि २–१ को जित रच्दै यसपालि समूह चरण पार गर्ने पहिलो अफ्रिकी टिम बनेको हो ।


डच टिम २ जित र एक बराबरीसँगै ७ अंक बनाएर समूह विजेता हुँदै अन्तिम १६ मा पुग्यो । सेनेगल २ जित र एक हारसहित ६ अंक बनाएर समूहमा उपविजेता हुँदै नकआउट चरणमा प्रवेश गर्‍यो । अन्तिम खेलमा हार टार्न सके नकआउट पुग्ने अवस्थामा रहेको इक्वेडर आफूअनुकूल नतिजा निकाल्न असफल भएपछि प्रतियोगिताबाट बाहिरिने पहिलो दक्षिण अमेरिकी टिम बन्यो ।

सुरुबाटै कतारलाई दाबमा राखेको नेदरल्यान्ड्सले गोलका अवसर पनि सिर्जना गर्‍यो । सहज तीन अवसरमा राम्रो फिनिसिङ गर्न असफल भए पनि डच टिमले कोडी गाक्पोको गोलमा पहिलो हाफमै अग्रता लियो । उनले डेवी क्लासेनको पासमा बल अघि बढाउँदै पेनाल्टी क्षेत्रको ठीकभित्रबाट बललाई २६ औं मिनेटमा आकर्षक गोलमा परिणत गर्दै कतार संस्करणमा आफ्नो गोल संख्या ३ पुर्‍याए । २३ वर्षीय यी फरवार्डले सेनेगलविरुद्ध २–० को जित र इक्वेडरविरुद्ध १–१ को बराबरीमा पनि गोल गरेका थिए ।

बर्सिलोनाका मिडफिल्डर फ्रान्क डी जोङले ४९ औं मिनेटमा गोल गर्दै डच टिमलाई २–० ले अगाडि बढाए । क्लासेनको क्रसमा मेम्फिस डिपेले प्रहार गरेको बल कतारका गोलकिपर बरसम मेसालले रोके पनि त्यसमा नजिकै रहेका डी जोङले सहजै बललाई पोस्टको दिशा दिँदै नेदरल्यान्ड्सलाई जिततर्फ अग्रसर बनाए ।

स्टेभेन बर्गिसले ६८ औं मिनेटमा गोल गरे पनि भिडियो असिस्टेन्ट रेफ्री (भार) ले उक्त मुभमा गाक्पोको हातले बल छोएको देखिएपछि उक्त गोलले मान्यता पाएन । उनले इन्ज्युरी समयमा प्रहार गरेको बल क्रसबारमा लागेर बाहरिएको थियो ।

डच टिमले विश्वकपमा एसियाली टिमविरुद्ध जितको शृंखला कायम राख्दै ६ खेल पुर्‍यायो । नेदरल्यान्ड्सले विश्वकपको समूह चरणमा अपरािजत यात्रा १६ खेल पनि बनायो । सन् १९७४, १९७८ र २०१० को उपविजेता नेदरल्यान्ड्स चार वर्षअघि रुसमा भएको विश्वकपमा युरोपेली छनोटमै रोकिएको थियो । लिभरपुलका डिफेन्डर भर्जिल भान डाइकको कप्तानीमा रहेको टिम ८ वर्षपछि विश्वकपमा पुनरागमन गर्दा उत्कृष्ट नतिजा दिलाउन चाहन्छ । डच टिम ब्राजिल (२०१४) मा तेस्रो भएको थियो ।

उद्घाटन खेलमा इक्वेडरविरुद्ध २–० र अफ्रिकी टिम सेनेगलविरुद्ध ३–१ ले हारेपछि कतार ९२ वर्ष लामो विश्वकप इतिहासमै सबैभन्दा छिटो प्रतियोगिताबाट बाहिरिने टिम भएको थियो । त्यसपछि नेदरल्यान्ड्सले कतारको विश्वकप डेब्युमा लगातार तीन हारको नतिजा थमाइदिएको हो । कतार समूह चरणबाटै बाहिरिने दोस्रो आयोजक टिम हो । यसअघि यो खराब रेकर्ड दक्षिण अफ्रिका (सन् २०१०) ले मात्रै बनाएको थियो । आयोजक टिमको औपचारिक बिदाइमा अल बायत रंगशालामा ६६ हजार ७ सय ८४ दर्शकको उपस्थिति देखाइए पनि प्यारापिटका थुप्रै सिट खाली नै देखिन्थ्यो ।

सन् २०२२ को उद्घाटन खेलमा डिफेन्डिङ च्याम्पियन फ्रान्सलाई हराएर सनसनी मच्चाएको सेनेगल टिमका हिरो एलिउ सिसे अहिलेको टिममा मुख्य प्रशिक्षक छन् । त्यसयता सेनेगलले पहिलोपल्ट विश्वकपको नकआउटमा स्थान बनाएको हो ।

काउलीबेलीको निर्णायक गोल

स्माइल सरले ४४ औं मिनेटमा पेनाल्टीमा गोल गर्दै सेनेगललाई अग्रता दिलाएका थिए । तर, मोइसेस काइसेडोले ६७ औं मिनेटमा गोल गरेर बराबरी गर्दै इक्वेडरको नकआउट प्रवेशको सम्भावना कायम राखेका थिए । प्रिमियर लिग क्लब चेल्सीका डिफेन्डर कालिडोउ कोउलिबेलीले ७० औं मिनेटमा निर्णायक गोल गरेर सेनेगललाई अन्तिम १६ मा पुर्‍याए ।

प्रकाशित : मंसिर १४, २०७९ ०७:४२
पूरा पढ्नुहोस्
प्रतिक्रिया
पठाउनुहोस्
×