अर्जुनको इनिङ्सले जोगिएन गण्डकी प्रदेश- खेलकुद - कान्तिपुर समाचार

अर्जुनको इनिङ्सले जोगिएन गण्डकी प्रदेश

कान्तिपुर संवाददाता

काठमाडौँ — वाग्मती प्रदेशले वाइवाइ यू–१९ राष्ट्रिय क्रिकेट प्रतियोगिताको पहिलो दिनमा गण्डकी प्रदेशको चुनौतीलाई ७४ रनले पन्छाएको छ । अर्जुन कुमालले सानदार इनिङ्स खेल्नेक्रममा ९८ रन बनाए पनि २ सय ९४ रनको लक्ष्य पाएको गण्डकी ४५.४ ओभरमा २ सय १९ रनमा अलआउट भयो ।


कीर्तिपुरस्थित त्रिवि क्रिकेट मैदानमा अर्जुनले १ सय १९ बलको इनिङ्समा ९ चौका र १ छक्का प्रहार गरे । शतक नजिक पुगेका उनी ओमकार यादवको बलमा योगेश भाटद्वारा समातिए । गण्डकीको इनिङ्समा योगेशले कुल ४ क्याच लिए ।

अर्जुनले सोहेल कुँवरसँग पहिलो विकेटमा ९ ओभरभित्र ४८ रन जोडेका थिए, त्यसमा सोहेलको योगदान ९ रनमात्र थियो । गोविन्द बिक १३ र दीपक डुम्रे ३ रनमा आउट भए । सिब्रिन श्रेष्ठले २१, करण पंगेनी र कप्तान सुवास भण्डारीले समान १३ रन बनाए पनि गण्डकी लक्ष्य छेउछाउ पुग्न सकेन । वाग्मतीबाट कप्तान अशोक पौडेलले १० ओभरमा ६४ रन खर्चेर ३ विकेट लिए । सक्रिय कार्की, ओमकार र प्रतीक श्रेष्ठले २–२ तथा अभिषेक कोइरालाले १ विकेट लिए ।

यसअघि उत्तम थापामगर र योगेशको अर्धशतकमा निर्धारित ५० ओभरमा वाग्मती ४८.१ ओभरमा २ सय ९३ रनमा अलआउट भएको थियो । प्लेयर अफ द म्याच उत्तमले ७० बल खेल्दै १० चौका र ३ छक्का प्रहार गर्दै ८७ रन बनाए । ओपनरद्वय सक्षम बस्ताकोटी १८ र लक्की कठायत १२ रन तथा त्यसपछि दीपन बानियाँ ६ र अशोक ९ रनमा आउट भएपछि उत्तम र योगेशले पाँचौं विकेटमा ७७ रनको साझेदारी गरे ।

प्रदेश छनोटमा उत्कृष्ट फर्ममा रहेका योगेशले ४२ बल खेल्दै ५ चौका र ३ छक्कासहित ५२ रन बनाए । तल्लोक्रममा ओमकारले २० बलमा ४ चौका र १ छक्कासहित ३७, आथर्व पौडेलले २९ बलमा २१ र अभिषेकले १४ बलमा २ चौका र ३ छक्का प्रहार गर्दै ३२ रन बनाएपछि वाग्मतीले मजबुत स्कोर बनाएको थियो ।

गण्डकीबाट निर्तेश गिरी र सुदीप अर्यालले ३–३ विकेट लिए । निर्तेशले १० ओभरमा १ मेडन राख्दै ५३ र सुदीपले ९.१ ओभरमा ६२ रन खर्चे । सुवास, अर्जुन र सिब्रिनले १–१ विकेट लिए ।

प्रकाशित : मंसिर ८, २०७९ ०८:३०
प्रतिक्रिया
पठाउनुहोस्

जिरोडले गरे कीर्तिमान बराबरी

एएफपी

दोहा — ओलिभर जिरोडले सबैभन्दा बढी गोल गर्ने थिएरी हेनरीको कीर्तिमान बराबरी गरेको खेलमा विश्व च्याम्पियन फ्रान्सले मंगलबार राति अस्ट्रेलियालाई ४–१ ले पराजित गर्‍यो । क्राएग गुडविनको गोलमा अस्ट्रेलियाले नवौं मिनेटमा अल जनाब रंगशालामा आश्चर्यजनक अग्रता लियो ।

विश्वकप सुरु हुनुअघि नै एनगोले कान्टे, पाउल पोग्बा, करिम बेन्जेमा जस्ता महत्त्वपूर्ण खेलाडी गुमाइसकेको फ्रान्सले अस्ट्रेलियाको अग्रतासँगै घाइते भएका लुकास हर्नान्डेजलाई पनि गुमाउन पुग्यो ।

एड्रियन रेबियोटको गोलमार्फत फ्रान्सले २७ औं मिनेटमा खेल बराबरीमा ल्याएको थियो । जिरोडले फ्रान्सलाई ३२ औं मिनेटमा २–१ को अग्रता दिलाए । यो उनको ५० औं अन्तर्राष्ट्रिय गोल थियो । केलियन एमबाप्पेले ६८ औं मिनेटमा गरेको गोलमा विजयतर्फ अगाडि बढेको फ्रान्सका लागि त्यसको तीन मिनेटपछि जिरोडले गोल गर्दै सर्वाधिक ५१ गोल गरेको हेनरीको कीर्तिमान बराबरी गरे । एसी मिलानबाट खेल्ने ३६ वर्षे जिरोडले फ्रान्सका लागि १ सय १५ क्याप जितिसकेका छन् । यसक्रममा उनी फ्रान्सबाट विश्वकपमा गोल गर्ने सबैभन्दा पाका खेलाडी भए । बेन्जेमा फिट भएको भए चार वर्षअगाडि फ्रान्सलाई विश्वकप जिताउँदाका महत्त्वपूर्ण सदस्य जिरोडले प्लेयिङबाट खेल्ने सम्भावना कम थियो ।

प्रकाशित : मंसिर ८, २०७९ ०८:२६
पूरा पढ्नुहोस्
प्रतिक्रिया
पठाउनुहोस्
×