लाइभ बेटिङ गर्ने ५० जना पक्राउ

हरेक बलपिच्छे लाइभ बेटिङ राखेको, ब्याटिङ र पूरै खेलको पनि बाजी लगाएको, पैसा अनलाइनबाटै लेनदेन गरेको पाइएपछि कीर्तिपुर प्रहरी वृत्तको सहयोगमा प्रहरीको केन्द्रीय अनुसन्धान ब्युरो (सीआईबी) ले ५० जनालाई नियन्त्रणमा लिएको थियो । त्यसमा ६ जनाको संग्लग्नता नदेखिएपछि उनीहरूलाई छाडिएको छ । बाँकी पक्राउ परेका ४४ जना सबै भारतीय भएको प्रहरीले जनाएको छ । उनीहरूको साथबाट ८० थान मोबाइल बरामद गरिएको छ ।

लाइभ बेटिङ प्रकरणको सीआईबी र साइबर ब्युरोले संयुक्त रूपमा अनुसन्धान गरिरहेको सीआईबीका प्रमुख प्रहरी अतिरिक्त महानिरीक्षक उत्तम सुवेदीले बताए । यूएईले ब्याटिङ गरिरहेको अवस्थामा सुरुआती घन्टामै दर्शकदीर्घामा रहेका शंकास्पद व्यक्तिहरूलाई प्रहरीले नियन्त्रणमा लिएको थियो । सबैलाई सीआईबीको नियन्त्रणमा राखिएको छ । सोमबार भएको पहिलो एकदिवसीय अन्तर्राष्ट्रिय खेलबाटै उनीहरूलाई निगरानीमा राखेर शुक्रबार प्रमाण भेटिएपछि पक्राउ गरिएको प्रहरीले जनाएको छ ।