मेडलाई विश्वकपप्रति सम्मान छैन

उनी आर्सनलकी सहकर्मी भिभिन मेडेमासँगको सम्बन्धमा छिन् । हालै बेलायती मिडियासँग कुराकानी गर्दै उनले कतारमा समलैंगिक सम्बन्ध प्रतिबन्धमा रहनु आफ्नो विश्वास र आस्था विपरीत रहेको बताइन् ।

मेडले भनिन्, ‘यसपल्टको विश्वकपप्रति मेरो समर्थन छैन, यो प्रतियोगितालाई प्रचारप्रसार गर्न मैले कुनै भूमिका खेल्ने छैन । वास्तवमा म निकै निराश छु । पक्कै पनि यो फुटबलको प्रतियोगिता हो, तर कतारमा हुने विश्वकपप्रति मेरो पटक्कै सम्मान भन्ने नै छैन ।’

मेडसँगै धेरै अन्तर्राष्ट्रिय फुटबल खेलाडीले नैतिक रूपमा यसपल्टको विश्वकपप्रति आफ्नो विमति रहेको बताएका छन् । इंग्लिस कप्तान ह्यारी केनसँगै सात युरोपेली देशका कप्तानले विश्वकपका खेलमा क्रममा कुनै प्रकारको विभेदविरुद्धको ‘आर्मब्यान्ड’ लगाएर खेल्ने बताइसकेका छन् । मेड भन्छिन्, ‘इंग्लिस पुरुष टिमप्रति मेरो समर्थन रहने छ । तर जतिबेला कतारमा विश्वकप आयोजना गर्ने निर्णय भयो, त्यही बेलादेखि मलाई यो ठीक लागेको थिएन ।’

उनले थपिन्, ‘हामी अहिले २१ औं शताब्दीमा छौं । हामी त्यहीसँग मायामा पर्छौं, जसलाई साँच्चै माया लाग्छ । माया कसलाई हुन्छ, त्यसले केही फरक पर्दैन ।’ मेडले मेडेमासँगको आफ्नो सम्बन्ध कहिले पनि लुकाएकी छैनन् । यसै वर्षको वुमेन्स युरोपेली च्याम्पियन्सिपमा २७ वर्षीया मेडले गोल्डेन बुट अवार्डसँगै उत्कृष्ट खेलाडीको अवार्ड जितेकी थिइन् ।