मेलबर्न — आयरल्यान्डले डकवर्थ लेविस नियम अनुसार बुधबार ट्वान्टी–२० विश्वकपमा इंग्ल्यान्डलाई पाँच रनले पराजित गरेको छ । वर्षाले प्रभावित खेल गुमाएपछि इंग्ल्यान्डको सेमिफाइनल पुग्ने सम्भावना कमजोर हुन सक्नेछ । वर्षाले खेल रोकिँदा इंग्ल्यान्डले पाँच विकेट गुमाएर १ सय ५ रन बनाएको थियो ।
कमजोर ब्याटिङ गरेको इंग्ल्यान्डका लागि डाबिड मलानले ३७ बलमा ३५ रन बनाए । यस्तै, मोइन अलीले १२ बलमा २४ रन बनाए । यो नतिजापछि आयरल्यान्ड सुपर–१२ को ग्रुप–१ मा पहिलो जित निकाल्न सफल रह्यो । प्रतियोगितामा उपाधिको दाa]दार मानिएको इंग्ल्यान्ड भने दुई खेलबाट दुई अंकमै सीमित रह्यो ।
पहिले ब्याटिङ गरेको आयरल्यान्डले १९।२ ओभरमा अलआउट हुन अगाडि १ सय ५७ रन बनाएको थियो । त्यसमा एन्डी बालबिरनीले ४७ बलमा ६२ रन बनाए । यस्तै, लोरकन टकरले ३४ रनको योगदान दिए । इंग्लिस बलरमध्ये मार्क उड र लायम लिभिङस्टोनले तीन/तीन विकेट लिए ।
