सैनिक महाविद्यालयलाई साम्स उपाधि- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

सैनिक महाविद्यालयलाई साम्स उपाधि

ज्योति कटुवाल

सुर्खेत — आयोजक सैनिक महाविद्यालयले शनिबार साम्स फुटबल २०७९ प्रतियोगिताको उपाधि जितेको छ । फाइनलमा इगरब्रिज माध्यमिक विद्यालयलाई ४–० को फराकिलो गोलले पराजित गर्दै महाविद्यालय विजयी बनेको हो । सैनिक आवासीयसँग पराजित इगरब्रिज माविले दोस्रो स्थान हात पार्‍यो । 

प्रतियोगितमा सैनिक आवासीय महाविद्यालयका खेलाडीहरु युवक थापा बेस्ट गोल किपर, वीरेन्द्र थापा उत्कृष्ट खेलाडी घोषित भए भने सुशील वली ७ गोल गर्दै सर्वाधिक गोल गर्ने खेलाडीभित्र पुरस्कृत भए । यस्तै इगरब्रिजका चेतन थापा ‘राइजिङ्ग प्लेयर अफ द टुर्नामेन्ट’ घोषित भएका छन् ।

कार्यक्रममा पश्चिम कमाण्ड सेनापति उपरथी हिरलाल जोसीले प्रतियोगितामा प्रथम हुनेलाई नगद १० हजार र द्वितीय हुने समूहलाई ५ हजार रुपैयाँ चेकसहित मेडल र प्रमाणपत्र प्रदान गरेका थिए ।

असोज ५ गतेदेखि सुरु भएको अन्तर माध्यमिक विद्यालयस्तरीय फुटबल प्रतियोगितामा जिल्लाका १० वटा विद्यालयका १२ टिम सहभागी भएको आयोजक सैनिक आवासीय महाविद्यालयका सम्पर्क अधिकृत सेनानी गणेश अधिकारीले जनाए । ‘महाविद्यालयले खेलकुद गतिविधिलाई समुदायमाझ पराकिलो बनाउने उद्देश्यले यो वर्षदेखि साम्स कपको सुरुवात गरिएको हो,’ उनले भने, ‘यो खेल प्रत्येक वर्ष दसैंअगाडि सञ्चालन हुनेछ ।’


प्रकाशित : आश्विन ८, २०७९ २२:३२
प्रतिक्रिया
पठाउनुहोस्

नवौं राष्ट्रिय खेलकुदको ट्रफी विराटनगरमा

कान्तिपुर संवाददाता

विराटनगर — नवौं राष्ट्रिय खेलकुदको ट्रफी टुरअन्तर्गत शनिबार प्रदेश १ को विराटनगरस्थित शहिद रंगशालामा मुख्यमन्त्री राजेन्द्रकुमार राईले ट्रफी प्रदर्शन गरेका थिए ।

राष्ट्रिय खेलकुदको नवौं संस्करण गण्डकी प्रदेशमा असोज २८ देखि कात्तिक ३ सम्म सञ्चालन हुनेछ । राष्ट्रिय खेलकुदको ट्रफी टुर पहिलो पटक गरिएको हो । ट्रफी प्रदर्शनी गर्दा ट्रफी टुर कार्यदलका संयोजक ओलम्पियन दीपक विष्ट, सदस्य नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ, राष्ट्रिय महिला भलिबलकी कप्तान अरुणा शाही र अल्ट्रा धाविका मीरा राई पनि उपस्थित थिए ।

ट्रफी प्रदर्शनीका क्रममा खेलाडीका लागि प्रदेश सरकारले कन्जुस्याइँ नगर्ने उल्लेख गर्दै मुख्यमन्त्री राईले नवौं राष्ट्रिय खेलकुद सफलताका लागि प्रदेश टोलीलाई शुभकामना दिए । प्रदेश १ का सामाजिक तथा खेलकुदमन्त्री राजन राईले नवौं राष्ट्रिय खेलकुदमा पदक विजेता खेलाडीलाई विगतमा भन्दा पुरस्कार रकम बढ्ने जानकारी दिए ।

प्रदेश खेलकुद विकास बोर्डका सदस्य सचिव हंशराज वाग्लेले ३५ खेलमा ७ सय ६ खेलाडी तथा प्रशिक्षक र व्यवस्थापक गरी ८ सय २० जनाको सहभागिता रहने जानकारी दिए । प्रदेश छनोटमा ४ हजार १ सय ५२ खेलाडीको सहभागिता रहेको वाग्लेले बताए ।

ट्रफीलाई असोज ९ गते सशस्त्र प्रहरी बल (एपीएफ) को हल्चोकस्थित मुख्यालय, असोज ११ गते कर्णाली प्रदेशको सुर्खेत र असोज १३ गते मधेश प्रदेशको रामजानकी मन्दिर पुर्‍याइने छ । अन्तिममा ट्रफीलाई राष्ट्रिय खेलकुदको मुख्य आयोजनास्थल पोखरामा पुर्‍याइने छ । यसअघि ट्रफीलाई सुदूरपश्चिमको धनगढी, लुम्बिनी प्रदेशको बुटवल र बागमती प्रदेशको हेटौंडा, नेपाली सेना र नेपाल प्रहरीको मुख्यालयमा प्रदर्शन गरिएको थियो । नवौं राष्ट्रिय खेलकुदमा सात प्रदेश, तीन विभाग र एनआरएनए गरि ११ टोलीको सहभागिता रहनेछ ।

प्रकाशित : आश्विन ८, २०७९ २१:५९
पूरा पढ्नुहोस्
प्रतिक्रिया
पठाउनुहोस्
×