आर्मीलाई चितवन गोल्डकपको उपाधि - खेलकुद - कान्तिपुर समाचार

आर्मीलाई चितवन गोल्डकपको उपाधि 

रमेशकुमार पौडेल

चितवन — त्रिभुवन आर्मी क्लब नारायणगढ क्याम्पाचौरमा सम्पन्न इसुजु चितवन गोल्डकप फुटबल प्रतियोगिता–२०७९ को विजेता भएको छ ।सोमबार सम्पन्न प्रतियोगिताको फाइनलमा आर्मीले सशस्त्र प्रहरी बल (एपीएफ)को फुटबल क्लबलाई २–० गोल अन्तरले पराजित गरेको हो ।

विजेता आर्मीले सात लाख रुपैयाँ नगद पुरस्कार पायो । उपविजेता एपिएफले तीन लाख ५० हजार रुपैयाँ प्राप्त गर्‍यो ।

उपाधि भीडन्तमा उत्रेका दुवै विभागीय टिम मध्यान्तरअघि गोलरहत बराबरीमा रहेका थिए । मध्यान्तरपछि आर्मीले दबाब बढाउँदै गयो । खेल सुरु भएको तेस्रो मिनेटमै आर्मीका सुदिल राईले गोल गरेका थिए । उनै सुदिलले खेल सकिन लगभग एक मिनेट बाँकी रहँदा गोल थपेका हुन् । फाइनल खेलको म्यान अफ दि म्याच पनि सुदिल नै भए । उनले १० हजार रुपैयाँ पुरस्कार पाए ।

प्रतियोगिताको उत्कृष्ट खेलाडी एपीएफका हरि कार्की घोषित भए । त्यसैगरी सात गोल गरेका भरतपुर फुटबल क्लबका युवा खेलाडी राज भुषालले सर्वाधिक गोलकर्ताको पुरस्कार पाए । उत्कृष्ट गोल रक्षक आर्मीका विवश चौधरी भए । प्रतियोगिताका उत्कृष्ट खेलाडीले २० हजार रुपैयाँ नगद पुरस्कार पाए । चितवन–२ का निवर्तमान सांसद कृष्णभक्त पोखरेलले विजयी टिम तथा खेलाडीहरुलाई पुरस्कार वितरण गरेका थिए ।

भरतपुर फुटबल क्लबको आयोजनामा भदौ २५ गते शनिबारदेखि प्रतियोगिता सुरु भएको थियो । प्रतियोगितामा अफ्रिकन टोली एभिनर फुटबल क्लब, भारत बिहार मोतिहारीको टोलीसहित १० टिमले प्रतिस्पर्धा गरेका थिए । यो प्रतियोगिता चितवनमा सञ्चालित अहिलेसम्मको सवैभन्दा धेरै पुरस्कार राशिको प्रतियोगिता भएको इसुजु चितवन गोल्डकप–२०७९ का संयोजक ध्रुव भुषालले बताएका छन् ।

प्रकाशित : आश्विन ३, २०७९ २०:०६
प्रतिक्रिया
पठाउनुहोस्

फाइनलमा आर्मी र एपीएफ भिड्ने

रमेशकुमार पौडेल

चितवन — जिल्लामा सर्वाधिक राशिको नगद पुरस्कार रहेको इसुजु चितवन गोल्डकप फुटबल प्रतियोगिताको उपाधिका लागि सोमबार त्रिभुवन आर्मी क्लब र सशस्त्र प्रहरी बल (एपीएफ)बीच प्रतिस्पर्धा हुने भएको छ ।

नारायणगढ क्याम्पाचौरमा जारी प्रतियोगिताको आइतबार भएको अन्तिम सेमिफाइनल खेलमा आर्मीले अफ्रिकन टोली एभिनर फुटबल क्लबलाई २–० गोल अन्तरले पराजित गर्दै फाइनलमा पुगेको हो ।

वर्षाका कारण शनिबार रोकिएर आइतबार दिउँसो भएको खेलमा आर्मीले १८ औं मिनेटमै अग्रता लियो । आर्मीका कप्तान जर्ज प्रिन्स कार्कीले उक्त गोल गरेका थिए । विवेक बस्नेतको स्थानमा मध्यान्तरअघि नै मैदान छिरेका आर्मीका सन्तोष केसीले दोस्रो गोल गरेका हुन् । उनले मध्यान्तरपछि खेलको ७६ औं मिनेटमा गोल गरेर आर्मीको जित निश्चित बनाएका हुन् । एभिनरले केही राम्रो मौका पाए पनि गोल गर्न भने चुक्यो ।

आर्मीका डिफेन्डर विमल पाण्डे म्यान अफ दिन म्याच भए । उनले १० हजार रुपैयाँ पुरस्कार पाए । उपाधिका लागि सोमबार आर्मीसँग प्रतिस्पर्धा गर्ने एपीएफले शुक्रबार मनाङ फुटबल क्लबलाई पारजित गरेको थियो ।

प्रतियोगिताका विजेताले सात लाख रुपैयाँ र उपविजेताले तीन लाख ५० हजार रुपैयाँ पाउने छ । त्यसैगरी विभिन्न विधाका उत्कृष्ट खेलाडी घोषित गरेर पुरस्कृत गरिने आयोजकहरूले बताएका छन् ।

भरतपुर फुटबल क्लबले प्रतियोगिता आयोजना गरेको हो । उपाधि विजेताले पाउने पुरस्कार राशि चितवनमा अहिलेसम्मकै सर्वाधिक राशिको हो ।

प्रकाशित : आश्विन २, २०७९ २१:१५
पूरा पढ्नुहोस्
प्रतिक्रिया
पठाउनुहोस्
×