नेपाल र श्रीलंका भिड्दै

तीन टिम रहेको समूह ‘बी’ बाट भुटानले श्रीलंकामाथि ५–० को ऐतिहासिक जित निकाल्दै सेमिफाइनलमा स्थान पक्का गरिसकेको छ । नेपालले पहिलो खेलमा भुटानलाई ४–० ले हराएको थियो । ‘हेड–टु–हेड’ को नियम अनुसार नेपाल ३ अंक भए पनि समूहको शीर्षस्थानमा छ । नेपाल अन्तिम खेलमा श्रीलंकाविरुद्ध पाँच गोल वा त्योभन्दा ठूलो अन्तरले पराजित भएमा समूह चरणबाटै बाहिरिनेछ र यो अवस्थामा भुटान र श्रीलंका सेमिफाइनल पुग्नेछन् ।

साफ च्याम्पियनसिपका अघिल्ला पाँचमध्ये चार संस्करणको उपविजेता नेपाली महिला टिमले यसअघिका प्रतिस्पर्धामा श्रीलंकामाथि शतप्रतिशात जित हात पारेको थियो । त्यसैले नेपाललाई श्रीलंकाको चुनौती पन्छाएर सेमिफाइनलमा स्थान बनाउन गाह्रो नहुन सक्छ । नेपालविरुद्ध श्रीलंकाको प्रतिस्पर्धाले समूह विजेताको टुंगो लगाउनेछ । अर्को समूहबाट डिफेन्डिङ च्याम्पियन भारत र बंगलादेशले एक खेल बाँकी छँदै सेमिफाइनलमा स्थान सुरक्षित गरिसकेका छन् ।