आर्मी र ललितपुर हाइ च्याम्पियन

नखिपोटस्थित आयोजक नखिपोट युथ क्लबको हलमा शनिबार सम्पन्न फाइनलमा आर्मीले रोयललाई ७७–६५ स्कोरले पराजित गर्‍यो । आर्मीका आयुश सिंहले १९ स्कोर जोडे ।

पहिलो क्वाटरमा १०–८ को अग्रता लिएको आर्मी दोस्रोमा २५–२६ ले पछि पर्‍यो । बाँकी दुई क्वाटरमा अग्रता बनाउँदै आर्मीले उपाधि जित्यो । आर्मीले तेस्रोमा २०–१३ र चौथोमा २२–१८ को प्रदर्शन गर्‍यो । आर्मीले ५० हजार र रोयलले २५ हजार रुपैयाँ पुरस्कार पाए ।

महिलातर्फ ललितपुर हाइले आयोजक नखिपोटलाई ३७–३५ को साँघुरो अन्तरमा हरायो । ललितपुरकी अस्मिता थापाले १५ स्कोर जोडिन् । ललितपुरले ९–८ को अग्रताबाट पहिलो क्वाटर आफ्नो पक्षमा पारेको थियो । दोस्रो क्वाटरमा नखिपोट ११–५ को अग्रता बनाएपछि ५ स्कोरले अगाडि रह्यो । तेस्रो क्वाटरको खेलमा ललितपुरले १४–६ को प्रदर्शन गर्नु जितको आधार बन्यो । अन्तिम क्वाटरमा नखिपोटले १०–९ को अग्रता लिए पनि समग्रमा २ अंकले उपाधि गुमायो । ललितपुरले ३० र नखिपोटले १५ हजार रुपैयाँ पुरस्कार पाए ।

आर्मीका आयुश सिंह र ललितपुरकी अस्मिता थापा मोस्ट भ्यालुएबल प्लेयर घोषित भए । दुवैले जनही ५ हजारसहित गिफ्ट ह्याम्पर प्राप्त गरे ।

विजेतालाई प्रदेश सांसद राजकाजी महर्जन, नेपाल बास्केटबल संघका महासचिव नरेन्द्र थापा, नखिपोट युथ क्लबका अध्यक्ष गंगा सुनवारलगायतले पुरस्कृत गरे । साताव्यापी प्रतियोगिताको पुरुषमा १२ र महिलामा ४ टिम सहभागी थिए ।