आर्मी क्वाटरफाइनलमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

आर्मी क्वाटरफाइनलमा

कान्तिपुर संवाददाता

काठमाडौँ — नेपाल आर्मी टिम प्रथम राष्ट्रिय खुला बास्केटबल प्रतियोगिताको पुरुषतर्फ बुधबार क्वाटरफाइनल पुगेको छ । आयोजक नखिपोट युथ क्लबको हलमा आर्मीले कीर्तिपुरलाई १०१–८५ स्कोरले हरायो । आर्मी समूह ‘बी’ को विजेता बन्यो । आर्मीका आयुश सिंहले ४४ स्कोर जोडे ।

पहिलो क्वाटरमा २६–२९ ले पछि परेको आर्मी अन्य क्वाटरमा क्रमशः २६–११, २२–२०, २७–२५ अग्रता बनाउँदै खेल जित्यो ।

त्यस्तै अर्को प्रतियोगिता नवौं ग्रिनफिल्ड अन्तरस्कुल बास्केटबलको सिनियर ब्वाइजमा ब्राइट होराइजन सेमिफाइनल पुगेको छ । होराइजनले जेनिथलाई ५८–३२ ले हरायो । ग्रिनल्यान्डले रेडियन्टलाई ४६–३० र महामञ्जुश्रीले आयोजक ग्रिनफिल्डलाई ३५–३३ ले हराएर सेमिफाइनल स्थान सुरक्षित गरे ।

जुनियर ब्वाइजमा ग्रिनफिल्ड ‘ए’ ले महामञ्जुश्रीलाई १४–८, एन्जल्स हार्टले ग्रिनफिल्ड ‘बी’ लाई १९–११, लालीगुराँस नेसनल एकेडेमीले ओराकललाई २०–८ र इडेन ब्रिज एकेडेमीले संस्कृतिलाई ४६–११ स्कोरले हराएर सेमिफाइनल यात्रा तय गरे ।

सिनियर गर्ल्समा रेडियन्टले आर्यालाई २६–१६, ग्रिनल्यान्डले ग्रिनफिल्डलाई १३–४, संस्कृतिले हिमालयनलाई १२–७ र काष्ठमण्डपले ग्रिनफिल्डलाई १७–६ ले पन्छाउँदै सेमिफाइनलमा स्थान बनाए ।

नेमोनिक र बुद्ध भिड्ने

नेमोनिक र बुद्ध एकेडेमी पाँचौं बीआईबी कप अन्तरस्कुल बास्केटबलको ब्वाइजमा फाइनल पुगेका छन् । आयोजक बौद्ध स्कुल (बीआईएस) को हलमा नेमोनिकले युरोलाई ६८–३७ ले हरायो । नेमोनिकका प्रवेश तामाङले ३८ स्कोर गरे । नीरन लामाको १७ स्कोरमा बुद्धले प्रिमियरमाथि ५३–४२ को जित पायो ।

गर्ल्समा निस्ट र डाफोडिल फाइनल पुगे । निस्टले आयोजक बीआईएसलाई ३०–२९ ले हरायो । निस्टकी पूर्णिमा बरालले १६ स्कोर जोडिन् । डाफोडिलले द चाँदबागलाई २७–२४ ले हराउँदा दावा फुटी शेर्पाले १० स्कोर गरिन् ।

प्रकाशित : भाद्र २, २०७९ ०६:४५
प्रतिक्रिया
पठाउनुहोस्

सहकारीका अध्यक्ष र कोषाध्यक्ष पक्राउ

कान्तिपुर संवाददाता

हेटौंडा — बचतकर्ताको रकम माग गरिएको समयमा फिर्ता नगर्ने हेटौंडास्थित एक सहकारीका अध्यक्ष र कोषाध्यक्षलाई प्रहरीले बुधबार पक्राउ गरेको छ ।

बचतकर्ताहरूकै उजुरीका आधारमा हेटौंडा उपमहानगरपालिका–२ स्थित जनचेतना स्वाबलम्बन बचत तथा ऋण सहकारी लिमिटेडको सञ्चालक समितिका अध्यक्ष धादिङ फूलखर्क घर भई हाल हेटौंडा–८ बस्ने ४० वर्षीय रामकृष्ण अधिकारी र कोषाध्यक्ष हेटौंडा–८ का ३२ वर्षीय राजीव तामाङलाई प्रहरीले पक्राउ गरेको हो ।

दर्जनौं बचतकर्ताले सहकारीको पासबुकसहित उजुरी दिएकाले छानबिनका लागि अध्यक्ष अधिकारी र कोषाध्यक्ष तामाङलाई पक्राउ गरेको जिल्ला प्रहरी कार्यालय मकवानपुरका प्रहरी प्रवक्ता टेकबहादुर कार्कीले बताए । सहकारीको बचत रकम हिनामिना भएपछि बचतकर्ता र नियमित पैसा संकलन गर्ने कर्मचारी समस्यामा परेका छन् । सहकारीमा बचत गर्दै आएकी हेटौंडा–१८ की कमला बिडारी, हेटौंडा–२ की बबिता श्रेष्ठलगायतले जिल्ला प्रहरी कार्यालय मकवानपुरमा सहकारी सञ्चालकविरुद्ध साउन २४ मा उजुरी दिएका थिए ।

उजुरीमा उनीहरूले आफूहरूको पैसा फिर्ता माग्दा नदिइएको उल्लेख गरेका थिए । अध्यक्ष र कोषाध्यक्षविरुद्ध प्रहरीमा जाहेरी दिनुअघि उनीहरूलाई साउन २० गते सटही हुने गरी चेक दिइएको थियो । तर चेक नसाटिएपछि उनीहरूले साउन २४ मा प्रहरीमा उजुरी दिएका हुन् ।

सहकारीले बचतकर्ताको रकम फिर्ताका लागि मेनुका श्रेष्ठ पाख्रिनको नाममा १५ लाख ४६ हजार ८३२, अनुषा राजवाहक/देविका शर्माको नाममा २५ लाख ७८ हजार ९८०, पावर्ती हमालको नाममा १६ लाख ९५ हजार, सविता स्याङतानको नाममा १० लाख ७१ हजार ४४५ र सुनिलकुमार बानियाँको नाममा ११ लाख ८० हजार रुपैयाँको ५ थान चेक काटेको थियो । तर खातामा रकम नभएकाले ती चेक साटिएनन् । अध्यक्ष र कोषाध्यक्षविरुद्ध थप बचतकर्ताले पनि उजुरी दिने तयारी गरिरहेका छन् ।

प्रकाशित : भाद्र २, २०७९ ०६:३५
पूरा पढ्नुहोस्
प्रतिक्रिया
पठाउनुहोस्
x
×