ठूलो लक्ष्यमा इंग्ल्यान्ड सफल- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

ठूलो लक्ष्यमा इंग्ल्यान्ड सफल

‘यो जित आफैंमा अद्वितीय छ,  टेस्ट क्रिकेट कसरी परिवर्तन भइरहेको छ, त्यो सबैले बुझ्नेछन्’
द गार्डियन

एजबास्टन — हल्का चिसो र पानी पर्नसक्ने सम्भावनाबीच पाँचौं तथा अन्तिम दिन । पुनर्जन्म पाएको इंग्ल्यान्डले आफ्नो क्रिकेट इतिहासमै चौथो इनिङ्समा सबैभन्दा ठूलो लक्ष्य पछ्याएर मंगलबार ऐतिहासिक जित निकालेको छ ।

भारतविरुद्धको पाँचौं टेस्टमा इंग्ल्यान्डलाई जिताएपछि जोनी बेरिस्टो र जो रुट । तस्बिर : आईसीसी



इंग्ल्यान्डले भारतलाई ७ विकेटले हराउन ३ सय ७८ रनको लक्ष्य प्राप्त गरेको थियो । यसक्रममा टोलीको जित यस्तो थियो । मानौं, त्यसका लागि कुनै प्रकारको कडा मिहिनेत नै आवश्यक थिएन । यो जितका नायक एकपल्ट फेरि जो रुट र जोनी बेरिस्टो रहे ।

यो जितले इंग्ल्यान्ड र भारतबीचको ५ टेस्टको शृंखला २–२ को बराबरीमा छुट्यो । यसै कारण शृंखला घरेलु टिमको नाममा बस्यो । बाँकी विश्व क्रिकेटका लागि भने इंग्ल्यान्डले तय गरेको यो यात्रा अविश्वसनीय रह्यो । अविश्वसनीयभन्दा पनि स्तब्धपूर्ण । कप्तान बेन स्टोक्स र प्रशिक्षक ब्रेन्डन म्याकलम आएपछि त यो टिम चौथो इनिङ्समा विजय लक्ष्य पछ्याउन सबैभन्दा माहिर बनेको छ । जुन केही दिनअघिसम्म पनि असम्भव जस्तै देखिन्थ्यो ।

भर्खर जस्तो, इंग्ल्यान्डले न्युजिल्यान्डविरुद्धको तीन टेस्ट शृंखलामा लगातार २ सय ७७, २ सय ९९ र २ सय ९६ रनको लक्ष्य चौथो इनिङ्समा सफलतापूर्वक पछ्याएको थियो । यससँगै इंग्ल्यान्ड विश्व टेस्ट च्याम्पियनसिपमा ह्वाइटवास रच्न पनि सफल रह्यो । यतिमात्र होइन, हेडिङ्लेमा अहिलेका कप्तान स्टोक्सको बहादुरीपूर्ण ३ सय ५९ रनको लक्ष्य पछ्याए पनि ओझेलमा परेको छ । त्यो नाटकीय जित थियो । तर, एजबास्टनमा त्यस्तो केही पनि भएन ।

बरु भइदियो केभन्दा स्टोक्स बार्दलीमा बसेर खेल हेरिरहे । विकेट झरेको खण्डमा ब्याटिङका लागि मैदानमा ओर्लिन । उनको पालो नै आएन । यता मैदानमा भने रुटले नटआउट रहेर १ सय ४२ रन बनाए । त्यो पनि १ सय ७३ बलमात्र सामना गरेर । अर्का नटआउट ब्याट्सम्यान बेरिस्टोले १ सय १५ बलमा १ सय १४ रन जोडे । सन् २०२१ यता रुटको यो ११ औं शतक हो भने समग्रमा २८ औं ।

अर्कोतर्फ बेरिस्टो भने आफ्नो खेलजीवनकै सबैभन्दा उच्च लयमा छन् । उनले पछिल्ला पाँच इनिङ्समा चौथो शतक बनाए । शृंखलाको यस अगाडिका चार टेस्टमा भारत २–१ ले अगाडि थियो । भारतले लर्डस र ओभलमा भएको टेस्ट जित्ने क्रममा निकै राम्रो प्रदर्शन गरेको थियो । तर, लगभग यही टिम दुई योर्कसायर ब्याटर जोडी अगाडि फितलो देखियो । पाँचौं दिन ९० मिनेटको खेलभित्र उनीहरूले १ सय १९ रन बनाए । उनीहरूको प्रदर्शन कति धेरै उत्कृष्ट रह्यो भने भारतीय बलर लगातार लाचारजस्तै रहे ।

दुवै ब्याटरले दिनको सुरआत ७० रनको छेउछाउबाट गरेका थिए । गत साता न्युजिल्यान्डविरुद्ध लिड्समा प्राप्त जितमा यी दुई खेलाडीले जस्तो प्रदर्शन गरेका थिए, एजबास्टनमा त्यसको ठीक उल्टो रह्यो । रुट यसपल्ट बढी आक्रामक रहे । उनले १ सय ३६ बलमा नै आफ्नो शतक पूरा गरे । यसक्रममा उनले केही बहादरीपूर्ण ड्राइभ पनि खेले । उनको केही प्रहार प्रतिष्ठाको ठीक विपरीत गैरपारम्परिक रहे । यो कस्तोसम्म रह्यो भने रिर्जभ स्कुपमा पनि रुटले छक्का प्रहार गरे ।

कमालका बेरिस्टो

बेरिस्टोले सन् २०२२ का आठ टेस्टमा बनाएको यो छैटौं शतक रह्यो । यस जितका क्रममा इंग्ल्यान्डको ‘बिज बल’ रणनीतिको कमाल स्पष्ट देखियो । यो रणनीति इंग्ल्यान्डका अहिलेका प्रशिक्षक म्याकलमको नाममा राखिएको छ । यो रणनीतिमा सबैभन्दा सफल ब्याटर रहे उनै बेरिस्टो । उनले जितपछि भने, ‘यो निकै उत्साहबर्द्धक जित रह्यो । पछिल्लो समय मैले जति पनि समय मिडियासँग कुराकानी गर्ने अवसर पाएको छु, त्यो सुखद नै रहेको छ ।’

उनले थपे, ‘मलाई विश्वास छ, यो क्रम जारी रहनेछ । रुटले पनि निकै राम्रो खेलिरहेका छन् । हामी दुवैले जसरी दुई दिन खेल्यौं, यो निकै खुसी दिने खालेको छ । तीन विकेट गुमाएर ३ सय ७८ रनको लक्ष्य पछ्याउनु भनेको आफैंमा ऐतिहासिक अवसर हो । हामी यो टेस्टलाई कहिले पनि भुल्ने छैनौं । यो जित पछाडि पहिलो विकेटका लागि भएको शतकीय साझेदारी पनि जिम्मेवार छ । त्यसैले ज्याक क्राउली र एलेक्स लेसलाई धन्यवाद ।’

उनी खेलका प्लेयर अफ द म्याच पनि रहे । प्लेयर अफ द सिरिज भने इंग्ल्यान्डबाट रुट र भारतबाट जसप्रित बुमराह रहे । बुमराहकै नेतृत्वमा भारतले यो टेस्ट खेलेको थियो । खेलपछि हारमा बुमराह निराश देखिए । उनले भने, ‘टेस्ट क्रिकेट कहिले पनि सजिलो हुन्न । त्यसैले हामी यसलाई माया पनि गर्छौं । तीन दिन पछाडि रहेर पनि टेस्ट क्रिकेटमा फर्कने अवसर हुन्छ । यो टेस्टमा यस्तै भयो । चौथो दिनबाट खेल हाम्रो हातबाट बाहिरियो र इंग्ल्यान्डले त्यसको भरपूर फाइदा लियो ।’

बुमराहको कीर्तिमान

कोभिड संक्रमणका कारण पछाडि धकेलिएको एजबास्टन टेस्टपछि बुमराहले भारतका लागि नयाँ कीर्तिमान पनि बनाएका छन् । उनी इंग्ल्यान्ड भ्रमणमा जाने भारतीय टिमका लागि एक शृंखलामा सबैभन्दा बढी विकेट लिने बलर भएका छन् । उनले इंग्ल्यान्डको पहिलो इनिङ्समा तीन विकेट लिए र सन् २०१४ मा भुवनेश्वर कुमारले लिएको १९ विकेटको प्रदर्शनलाई उछिने । उनले दोस्रो इनिङ्समा थप दुई विकेट लिए र शृंखलामा लिएको विकेट संख्या २३ पुर्‍याए ।

बुमराहकै नेतृत्वमा खेलेको यस टेस्टमा भारतको पक्षमा जित भने रहेन । उनको इंग्लिस समकक्षी स्टोक्सले शृंखला जितलाई ऐतिहासिक माने । स्टोक्सले भने, ‘जतिबेला एक टिमका रूपमा लक्ष्य स्पष्ट हुन्छ, त्यतिबेला धेरै कुरामा सजिलो हुन्छ । कसरी खेल्ने हो, त्यो प्रस्ट हुन्छ । यस टेस्टमा हामी जितका लागि जस्तै लक्ष्य पनि पछ्याउने क्रममा थियौं, त्यसैले त्यही मानसिकताले खेल्यौं । यो जित आफैंमा अद्वितीय छ । टेस्ट क्रिकेट कसरी परिवर्तन भइरहेको छ, त्यो सबैले बुझ्ने छन् ।’

प्रकाशित : असार २२, २०७९ ०७:३०
प्रतिक्रिया
पठाउनुहोस्

अफ सिजनमै होटलमा भारतीय पर्यटकको भीड

कोभिडले सुनसान रुपन्देहीका होटल भारतीय पर्यटकको आगमनसँगै गुल्जार हुन थाले, लुम्बिनीमा पनि चहलपहल बढ्यो
सन्जु पौडेल

लुम्बिनी — बर्खाको समय भए पनि लुम्बिनी प्रदेशका सीमावर्ती जिल्लामा भारतीय पर्यटकको संख्या उल्लेख्य छ । कोरोना जोखिम कम भएसँगै रूपन्देहीका होटलमा भारतीयको भीड बढ्न थालेको हो । धार्मिक घुमघाम र बिदा मनाउन आउनेको संख्या यहाँ धेरै छ । प्रदेशका लुम्बिनी, स्वर्गद्वारीलगायत धार्मिकस्थल लक्ष्य गरेर घुम्न आउने धेरै छन् । 

रूपन्देहीको ओमसतिया गाउँपालिकामा रहेको होटल बोधी रेडसन । फाइल तस्बिर : कान्तिपुर



केही प्रदेशका पहाडी जिल्लामा गर्मी छल्न आउने पनि छन् । जसले गर्दा जिल्लाका होटल तथा रेस्टुराँमा भारतीय पर्यटक बास बस्ने र खाजा/खाना खानेको भीड लाग्ने गरेको छ । विगतमा सार्कबाहेकका मुलुकका पर्यटक आगमनले भरिभराउ हुने होटलमा अहिले आन्तरिक र भारतीय नागरिक धेरै आउने गरेका छन् ।

भारतीय प्रधानमन्त्री नरेन्द्र मोदी लुम्बिनी आएपछि रूपन्देहीको लुम्बिनी आउने भारतीय पर्यटकको संख्यामा उल्लेख्य वृद्धि भएको छ । ती पर्यटक भैरहवा, लुम्बिनी र बुटवलका होटलमा बास बस्ने र घुम्ने गर्दा होटल व्यवसायीलाई समेत आम्दानीको बाटो भएको छ । भारतका धेरैजसो पर्यटक जिल्लाका पौवा, पवन प्यालेस, टाइगर प्यालेस, ड्रिमल्यान्ड, हिडन प्यालेस, मौर्या, बोधी रेडसन, सिद्धार्थ कटेज, लुम्बिनी रिसोर्टलगायत होटलमा बास बस्ने गर्छन् । बास बस्ने पर्यटकले खानासमेत खाने गरी आउँदा होटल सञ्चालनमा सहयोग पुग्ने गरेको व्यवसायी बताउँछन् ।

पछिल्लो समय भारतीय नागरिक होटलमा राम्रो संख्यामा आइरहेको सिद्धार्थनगरस्थित होटल मौर्याका प्रबन्ध निर्देशक सुनील श्रेष्ठले बताए । दैनिकजसो २० जना भारतीय पर्यटक होटलमा बास बस्ने गरी आइरहेको उनले सुनाए । ‘पहिले होटलमा बास बसी आफ्ना काम वा अन्य जिल्ला जानेहरू बढी आउँथे,’ उनले भने, ‘भारतीय प्रधानमन्त्री मोदी लुम्बिनी आएपछि लुम्बिनी हेर्न आउनेहरू बढी छन् ।’ होटलमा रहेका ८० कोठामध्ये ५० कोठा बुक हुँदा धेरैजसोमा भारतीय नै हुने गरेको उनले जनाए ।

क्यासिनोसमेत सञ्चालनमा रहेको यहाँको बोधी रेडसन होटलमा आन्तरिक पर्यटकको तुलनामा दोब्बर भारतीय पर्यटक आउने गरेका छन् । यो शृंखला कोरोना महामारी साम्य भएपछि चलेको प्रबन्ध व्यवस्थापक सुदीर द्विवेदीको भनाइ छ । होटलका ५० प्रतिशत कोठा भारतीय पर्यटकले नै भरिएका छन् । काम गर्नेहरू समेत साँझ परेपछि क्यासिनोमा आउने तथा बास बसेर बिहानी खाजा लिई फर्कने गरेको उनले बताए ।

‘भैरहवामा एक रात बिताई पोखरा, काठमाडौं तथा मनकामना जानेहरू बढी आएका छन्,’ उनले भने, ‘असार लागेपछि केही कम पर्यटक आएको भए पनि कोरोना त्रास हटे भारतीय पर्यटक अझ बढ्ने निश्चित छ ।’ पाँचतारे होटल पवन प्यालेसमा भारतीयसँगै युरोपियन पर्यटकसमेत बढेको सञ्चालक पवन हलुवाईको भनाइ छ । ‘दैनिक २० वटा रुम विदेशी पर्यटकले बुक गरिरहेका छन्,’ उनले भने, ‘भारतका मात्रै आउँछन् भन्ने छैन । तेस्रो मुलुकका समेत आउँदा व्यापारमा केही सुधार आएको छ ।’ पाहुनाले होटलमै खाना खाइदिँदा झनै राम्रो भइरहेको उनले सुनाए ।

नेपालभरि धेरै शाखा रहेको होटल पौवामा भारतीय नागरिक खाजा र खाना खान आइरहेको होटलका ब्रान्ड विभाग प्रमुख विष्णु भण्डारीले बताए । यसरी आएका पाहुना विभिन्न स्थल घुमेपछि होटलमा बास बस्ने गरेका छन् । यसबाहेक सीमावर्ती भारतीय सुनौली, नौतनवाबाट दैनिकजसो आएर खाना खाएर फर्किने गरेका छन् । आइतबार भारतमा साप्ताहिक बिदा हुने भएकाले उनीहरू घुम्न यता आउने गरेको उनले जनाए ।

सुनसान बनेका रूपन्देहीका होटल भारतीय पर्यटकको आगमनसँगै गुल्जार हुन थालेका छन् । लुम्बिनीमा पनि चहलपहल बढेको छ । लुम्बिनी विकास कोषका अनुसार जेठमा मात्रै २५ हजार ६५ भारतीय पर्यटक लुम्बिनी घुम्न आएका थिए ।

प्रकाशित : असार २२, २०७९ ०७:२०
पूरा पढ्नुहोस्
प्रतिक्रिया
पठाउनुहोस्
×