२४.१२°C काठमाडौं
एक्स–गोर्खालाई महिला फुटसल
लमजुङ — बेंसीसहरमा आयोजित पहिलो महिला फुटसल प्रतियोगिताको उपाधि एक्स–गोर्खा कास्कीले जितेको छ । सोमबार फाइनलमा घरेलु टिम मिनाङ लाङ्घाली बेंसीसहर–२ लाई ३–० ले हराउँदै एक्स–गोर्खाले उपाधि जित्यो । लमजुङ फुटसलद्वारा सातबिसेको फुटसल मैदानमा आयोजित महिला फुटसलमा विजेताले ३० हजार र उपविजेताले १५ हजा रुपैयाँ पुरस्कार पाए ।
लमजुङको बाघेता क्लबलाई हराएर एक्स–गोर्खा फाइनल पुगेको थियो । मिनाङले भने फुटसल एरिना काठमाडौंमाथि जित पाएको थियो । उत्कृष्ट गोलरक्षक गोर्खाकी झरना राई, सर्वाधिक गोलकर्ता मिनाङकी सम्झना शर्मा (६ गोल) र उत्कृष्ट खेलाडी बाघेताकी मनीषा थापामगर चुनिए । सबैले जनही १ हजार पुरस्कार पाए ।
विजेतालाई जिल्ला समन्वय समितिका प्रमुख पूर्णबहादुर गुरुङ, आयोजक लमजुङ फुटसलका सञ्चालक केशबहादुर राना, बेंसीसहर नगरपालिका–७ का अध्यक्ष खुशीजंग गुरुङलगायतले पुरस्कार वितरण गरे । प्रतियोगितामा लमजुङसहित काठमाडौं, कास्की र तनहुँका टिमले भाग लिएको प्रशिक्षक इन्द्र रानाले बताए ।
