उपाधि रक्षाको बाटोमा आर्मी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement
मकवानपुर गोल्डकप

उपाधि रक्षाको बाटोमा आर्मी

सुवास विडारी

मकवानपुर — साबिक विजेता त्रिभुवन आर्मी फुटबल क्लब हेटौंडामा जारी चौथो स्थानीय तह सहिद स्मृति मकवानपुर गोल्डकप फुटबल प्रतियोगिताको फाइनलमा पुगेको छ । हेटौंडा–५ स्थित पिप्ले क्याम्पा रंगशालामा शनिबार भएको खेलमा क्यामरुनी क्लब एभिनियर एफसीलाई पेनाल्टी शुटआउटमा ११–१० ले पराजित गर्दै विभागीय क्लब आर्मी फाइनलमा पुगेको हो । सोमबार हुने फाइनलमा आर्मीले स्थानीय टोली विजय युथ क्लबसँग उपाधिका लागि प्रतिस्पर्धा गर्नेछ ।

रोमाञ्चक र प्रतिस्पर्धात्मक बनेको दोस्रो सेमिफाइनलको निर्धारित ९० मिनेटमा १–१ गोलको बराबरीमा सकिएपछि खेलको निर्णयका लागि पेनाल्टी शुटआउटको सहारा लिइएको थियो । सुरुआतीमा ३–३ गोलको बराबरीपछि खेल सडनडेथतर्फ अगाडि बढेको थियो । ११–११ खेलाडीले पेनाल्टी प्रहार गर्दा ८–८ गोलको बराबरी भयो । त्यसपछि आर्मीले तीनै पेनाल्टीमा गोल गर्दा एभिनियरको अन्तिम पेनाल्टी सदुपयोग हुन नसक्दा पराजित हुनपुग्यो ।

सुरुआती ५–५ पेनाल्टी प्रहारमा आर्मीका दीपक गुरुङ, सीमान्त थापामगर र दिनेश हेन्जनले गोल गर्न सफल भए । कमलबहादुर थापाको प्रहार पोलमा लाग्दै बाहिरिँदा सन्तोष केसीले गोल गर्न सकेनन् । सडन डेथमा आर्मीका युद्ध शाही, विकेश कुथु, सुरज बस्नेत, विमल पाण्डेय र भरत खवासले गोल गर्दा जितेन्द्र कार्कीले गोल गर्न सकेनन् । त्यसपछि पुन: दीपक गुरुङ, दिनेश हेन्जन र सीमान्त थापा गोल गर्न सफल भए ।

आर्मीलाई खेलको ४९ औं मिनेटमा दिनेश हेन्जनले गोल गर्दै सुरुआती अग्रता दिलाएका थिए । तर, आर्मी अन्तिम समयमा सम्हालिन नसक्दा गोल खान पुगेको थियो । जिकाले इन्ज्युरी समयको तेस्रो मिनेटमा गोल गर्दै क्यामरुनी टिमलाई खेलमा फर्काएको थियो । म्यान अफ द म्याच आर्मीका दिनेश हेन्जन भए । उनले १० हजार रुपैयाँसहित ट्रफी प्राप्त गरे । एभिनियरका प्रशिक्षक आशिक थापा मगरले पटक–पटक पाएको मौकालाई सदुपयोग गर्न नसक्दा हार बेहोर्नुपरेको प्रतिक्रिया दिए । ‘खेलमा धेरै राम्रा मौका पाएका थियौं । त्यसलाई सदुपयोग गर्न सकेनौं । अन्तिम केही सेकेन्ड बाँकी हँुदा खेलमा फर्किएर पनि हार बेहोर्न बाध्य भयौं,’ उनले भने । आर्मीका प्रशिक्षक नवीन न्यौपानेले अन्तिममा डिफेन्सलाइनमा चुक्दा खेल बराबरीमा पुगेको र जितका लागि सडनडेथसम्म कुर्नुपरेको प्रतिक्रिया दिए ।

विजय युथले शुक्रबार विभागीय नेपाल पुलिस क्लबलाई १–० ले पराजित गर्दै फाइनलमा स्थान बनाएको हो । मकवानपुर जिल्ला फुटबल संघको आयोजनामा १२ टोलीको सहभागिता रहेको प्रतियोगिता विजेताले उपाधिसहित १५ लाख र उपविजेताले १० लाख रुपैयाँ प्राप्त गर्नेछन् ।

प्रकाशित : जेष्ठ २९, २०७९ ०७:०५
प्रतिक्रिया
पठाउनुहोस्

निशा र युवराजलाई स्वर्ण

कान्तिपुर संवाददाता

काठमाडौँ — नेपाल पुलिस क्लबकी खेलाडी निशा दर्नालले प्रथम राष्ट्रिय खुला तेक्वान्दो पुम्से प्रतियोगितामा शनिबार स्वर्ण पदक जितेकी छन् । उनले १८–२२ वर्ष उमेर समूहको महिला एकलमा स्वर्ण जितेकी हुन् ।

आर्मीकी स्वस्तिका तामाङले रजत तथा पुलिसका मोनिका रम्तेल र जैनव खातुनले कांस्य जितेका थिए । सोही स्पर्धाको पुरुषमा युवराज राना स्वर्ण, अस्मिन राउत रजत तथा राम गोले र लक्ष्मण गोले कांस्य पदक जित्न सफल भए । चारै खेलाडी पुलिसका हुन् ।

नेपाल तेक्वान्दो संघको आयोजनामा सातदोबाटोमा भइरहेको प्रतियोगिताको १५–१८ वर्ष पुरुष एकलमा गोदावरी फिटनेसका श्रृजल श्रेष्ठले स्वर्ण, गोदावरीकै सैरुस थापाले रजत, हात्तीवनका युकेन चौगुठी र मूलपानीका आयुश ढुंगेलले कांस्य जिते । महिलामा आर्मीकी पूर्णिमा बस्नेत, बुटवलकी एलिजा रोकाया तथा बुटवलकै नुतन गुरुङ र हात्तीवनकी रोस्लिन ओझाले क्रमश: स्वर्ण, रजत र कांस्य जिते ।

१२–१५ वर्षको पुरुष एकलमा नुवाकोटका साजन तामाङले स्वर्ण, आरबीका निश्चल धानीले रजत तथा स्युचाटारका आर्जन श्रेष्ठ र न्युजेनका सम्राट सिंहले कांस्य जितेका थिए । सोही स्पर्धाको महिलामा गोदावरीकी सरगम थापा स्वर्ण, स्वयम्भूका तारा वाइबा रजत तथा स्वयम्भूकी सुवानी तामाङ र बुटवलकी अनुष्का तामाङ कांस्य जित्न सफल भए ।

१०–१२ वर्षको पुरुष एकलमा गोदावरीका नीरव महर्जन पहिलो, स्टेपिङ स्टोनका अदृश रायन दोस्रो तथा स्युचाटारका रोदन राई र लैनचौरका इराजसिंह ठकुरी तेस्रो बने । महिलामा न्युजेनकी सृष्टि स्याङ्बो पहिलो, झापाकी खुशी गौतम दोस्रो तथा जैसीदेवलकी मुविक्ष्या गजुरेल र आर्मीकी कुसुम तामाङ तेस्रो भए ।

प्रतियोगितामा विभाग, प्रदेश र जिल्लाका ७ सय ४३ खेलाडीको सहभागिता रहेको आयोजकले जनाएको छ ।

सागरलाई स्वर्ण

आयोजक कोटेश्वर तेक्वान्दो डोजाङका सागरसिंह ठकुरीले काठमाडौं महानगर खुला तेक्वान्दो प्रतियोगितामा शनिबार स्वर्ण जितेका छन् । पेप्सीकोलास्थित आयोजक डोजाङकै हलमा सम्पन्न पुरुष ५० केजीमुनि फाइनलमा सागरले नुवाकोटका रन्जित तामाङलाई हराए । आयोजककै दीपकसिंह सितौला र सुनसरीका अफान श्रेष्ठ तेस्रो भए ।

पुरुष ३४ केजीमुनि बाँकेका जीवेशजंग शाहीले फाइनलमा चाँदनीका आशिष माझीलाई हराएर स्वर्ण जिते । नुवाकोटका अशोक तामाङ र टोखाका राजन कर्माचार्य तेस्रो भए । महिला ३१ केजीमुनि चन्द्रागिरिकी सेली गुरुङले बाँकेकी रितु राजकोटीलाई हराएर स्वर्ण जितिन् । आयोजककी रितिका थापा र एसकेबीसीकी याङजुम शेर्पा तेस्रो भए । महिला ३७ केजीमुनि बाँकेकी अनु थापाले स्वर्ण भिडन्तमा नेवारेकी आशा शाहीलाई हराइन् । एसकेबीसीकी देवुना केसी र राष्ट्रिय विभूतिकी सन्जु सापकोटा तेस्रो बने ।

प्रकाशित : जेष्ठ २९, २०७९ ०७:०४
पूरा पढ्नुहोस्
प्रतिक्रिया
पठाउनुहोस्
x
×