अभ्यास खेलमा नेपालको हार- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

अभ्यास खेलमा नेपालको हार

विनोद पाण्डे

ह्युस्टन, अमेरिका — आईसीसी विश्वकप लिग २ को तयारीको क्रममा अमेरिकामा रहेको नेपाली क्रिकेट टोली पहिलो अभ्यास खेलमा पराजित भएको छ । नेपाली अल स्टार्सले बिहीबार नेपाललाई ४ विकेटले पराजित गरेको छ ।

तस्बिर : हेमन्त श्रेष्ठ/कान्तिपुर

अल स्टार्सका कप्तान पृथु बाँस्कोटाले टस जितेपछि ब्याटिङमा आएको नेपालले निर्धारित ५० ओभरको खेलमा ४५.५ ओभरमा ९ विकेट गुमाई १ सय ९० रनमात्र बनाउन सक्यो । ओपनर आसिफ शेख ४ बल खेली १ रनमात्र बनाएको अवस्थामा रिटायर्ड आउट भए । उनलाई बलले घुँडामा लागेको थियो । चोटपछि मैदान छाडेका आसिफ स्क्यान गराउन अस्पताल पुगेका थिए । चोटको रिपोर्ट आउन बाँकी रहेको छ ।

अर्का ओपनर कुशल भुर्तेलबाट पनि नेपाल निराश हुन पुग्यो । उनी खेलको पहिलो बलमा पाकिस्तानी मोहम्मद इल्यासबाट आउट भए । देव खनालले २० रन बनाए । एक पटक क्याच फुत्किएर पाएको जीवनदानको उनले फाइदा उठाउन सकेनन् । उनले ५६ बल खेली १ चौका प्रहार गरे ।

उपकप्तान रोहित पौडेल १६ र सुनील धमला ४ रनमा आउट भएपछि नेपाल १९औं ओभरमा ६२-४ को स्थितिमा पुगेको थियो । आरिफ शेख र विनोद भण्डारीले पाँचौं विकेटमा ४७ रनको साझेदारी गरे । पृथुले सानदार क्याच गरेपछि पेभेलियन फर्किएका विनोदले ५१ बल खेली ३ चौकासहित ५६ रन बनाए ।

आरिफले ६० रनको अविजित इनिङ्स खेले । उनले ७४ बल खेली ५ चौका प्रहार गरे । सोमपाल कामी २ रनमै आउट भए । आदिल अन्सारीले दुई छक्का प्रहार गर्दै ११ बलमा १६, करण केसीले १७ बलमा २ छक्का र १ चौका प्रहार गर्दै २१ र कप्तान सन्दीप लामिछानेले ७ रन बनाए । नेपाली अल स्टार्सबाट मार्टी केइनले ६ ओभरमा १ मेडन राख्दै ३ तथा इल्यास र आदिल भाटीले २–२ विकेट लिए ।

इन्डियन प्रिमियर लिगमा पञ्जाब किंग्स ११ र हैदराबादबाट खेलिसकेका विपुल शर्माले ५० रन बनाएपछि पेरिरी भ्यु क्रिकेट कम्प्लेक्स मैदानमा नेपाली अल स्टार्सले ३३.५ ओभरमै लक्ष्य पूरा गर्‍यो । प्लेयर अफ द म्याच शर्माले ५१ बल खेल्दै ४ चौका र २ छक्का प्रहार गरे ।

एन्ड्रेज गाउज र उदय कौलले पहिलो विकेटमा आक्रामक हिसाबले ९ ओभरभित्र ५५ रन जोडेर अल स्टार्सको विजयको आधार तयार पारेका थिए । कौल १३ रनमा आउट भए भने गाउसले ३३ बल खेली ९ चौकासहित ४५ रन बनाए । नेपालका कप्तान सन्दीप लामिछानेले कौल र गाउससहित नितीश कुमार (९), पृथु (०) र केइन (१२) लाई आउट गरी ५ विकेट लिए पनि शर्माको इनिङ्स अल स्टार्सलाई विजय दिलाउन पर्याप्त बनेको थियो ।

सन्दीपले सोक्रममा १० ओभरमा १ मेडन राख्दै ४९ रन खर्चेर ५ विकेट लिए । नेपालबाट अर्को एक ओभर किशोर महतोले लिए । अल स्टार्सका गौरव बजाजले ५८ बल खेली २ चौकासहित अविजित ४० रन बनाए । विजयी र उपविजयी टोलीलाई गैह्रआवसीय नेपाली समाजका अध्यक्ष बुद्धिसागर सुवेदी र ह्युस्टन नेपाली समाजका अध्यक्ष विष्णु नेपालले पुरस्कृत गरे ।

नेपालले शनिबार यही मैदानमा ह्युस्टन हरिकन्ससँग दोस्रो अभ्यास खेल खेल्ने छ । विश्वकप लिग २ को खेल जुन ८ बाट सुरु हुनेछ । नेपालले जुन ९ मा ओमानसँग आफ्नो पहिलो खेल खेल्ने छ । त्यस्तै जुन ११ मा अमेरिका, १४ मा ओमान र १५ अमेरिकासँग लिग २ का खेलहरू खेल्ने छ ।

प्रकाशित : जेष्ठ २०, २०७९ १२:२०
प्रतिक्रिया
पठाउनुहोस्

'माछापुच्छ्रे चढ्न हुँदैन भन्नु पुरातनपन्थी चिन्तन'

दीपक परियार

पोखरा — गण्डकी प्रदेश प्रमुख पृथ्वीमान गुरुङले माछापुच्छ्रे हिमाल आरोहण खुला गर्नुपर्ने बताएका छन् । उनले माछापुच्छ्रे चढ्न हुँदैन भन्नु पुरातनपन्थी चिन्तन मात्रै भएको बताए ।

अन्नपूर्ण आरोहण दिवस (जुन ३) को अवसरमा शुक्रबार आयोजित कार्यक्रममा उनले माछापुच्छ्रेलाई ‘भर्जिन’ राख्नुपर्छ भन्ने तर्कसँग आफू सहमत नभएको उल्लेख गरे ।

‘भर्जिन राखेर के फाइदा छ ?,’ नेपाल पर्वतारोहण संघ गण्डकी प्रदेशले कास्कीको माछापुच्छ्रे गाउँपालिकास्थित घाचोकमा आयोजना गरेको कार्यक्रममा उनले भने, ‘महत्त्वपूर्ण मानिसको जीवन हो । यसलाई जनजीविकासँग जोड्न प्रयत्न गर्नुपर्छ ।’माछापुच्छ्रे आरोहण खुला गर्न सके रोजगारी सिर्जना हुने र पर्यटन व्यवसायलाई पनि फाइदा पुग्ने उनको तर्क छ । आरोहण खुला गर्ने कुरामा सरकारलाई दबाब दिनुपर्ने र त्यसका लागि आफू समेत तयार रहेको उनले बताए ।

हिमालको फेदमा घना बस्ती बसालेका गुरुङ समुदायको पितृ देवता भएकोले माछापुच्छ्रे चढ्न नहुने किंवदन्ती छ । कार्यक्रममा नेपाल पर्यटन बोर्डका पोखरा कार्यालय प्रमुख काशीराज भण्डारीले माछापुच्छ्रे आरोहणमा रोक लगाउनुको कुनै औचित्य नभएको बताए । ‘अन्नपूर्ण र माछापुच्छ्रेको आधार शिविर भएको ठाउँलाई गुरुङ समुदायको पवित्रस्थल मानिन्छ, त्यहाँ पर्यटक पुगिसके,’ उनले भने, ‘नेपालका सबै हिमाललाई देवताका रुपमा पूजिन्छ । त्यसो भन्नुको अर्थ चढ्नै हुँदैन भन्ने होइन ।’

६ हजार ९ सय ९३ मिटर उचाइको माछापुच्छ्रेलाई ‘कुमारी हिमाल’ को रुपमा चिनिन्छ । सरकारले विसं २०२० फागुन ५ देखि यसको आरोहणमा रोक लगाएको छ । विश्वभर सुन्दर हिमालका रुपमा सूचीकृत १३ मध्ये एक माछापुच्छ्रे पनि हो । तीमध्ये उचाइको हिसाबले सबैभन्दा अग्लो हिमाल यही हो । सुन्दर हिमालको सूचीमा परेको नेपालको अर्को हिमाल आमादब्लम हो । आमादब्लममा आरोहण खुला छ । फ्रान्सेली आरोही मौरिस हर्जोगले पहिलोपल्ट सन् १९५० को जुन ३ मा आठ हजार मिटर माथिको अन्नपूर्ण प्रथम हिमाल चढेको दिनलाई अन्नपूर्ण आरोहण दिवसका रुपमा मनाइन्छ ।

तीन शिर पदमार्ग अन्वेषण

पर्वतारोहण संघले शुक्रबारबाटै माछापुच्छ्रे हिमाल नजिक रहेको धार्मिकस्थल तीन शिर पुग्ने पदमार्ग अन्वेषण तथा हिमनदी पार तालिम सुरु गरेको छ । सेतीगण्डकी, मोदी र मादी नदीको उद्गमस्थललाई तीन शिरका रुपमा पूजिन्छ । उक्त स्थानमा पुग्न घाचोकबाट २० जनाको टोलीले पदयात्रा सुरु गरेका छन् । पर्यटक गाइड, जियोमेटिक इन्जिनियर, स्थानीय जनप्रतिनिधिसहितको टोलीले बाटो पहिल्याउँदै तीन शिर पुग्ने संघका प्रदेश अध्यक्ष शेषकान्त शर्माले बताए । ‘पदयात्रा मार्ग मासिँदै गएको अवस्थामा विकल्प दिन यो पदमार्गको अन्वेषण गर्न लागिएको हो,’ उनले भने, ‘धार्मिक पर्यटकीय गन्तव्यको रुपमा विकास गर्न सकिन्छ ।’ उनका अनुसार पदमार्ग अन्वेषण सात दिनको हुने छ । टोलीले पदमार्गको नक्सांकन गर्ने छ । ४ हजार ५ सयदेखि ५ हजार मिटरसम्मका पास, बगर, भीर हुँदै टोलीले पदमार्ग पहिल्याउने छ । पर्वतारोहण संघ गण्डकीले पहिलोपल्ट तीन शिरको पदमार्ग अन्वेषण सुरु गरेको हो ।

पोखरा पर्यटन परिषद्का अध्यक्ष गोपीबहादुर भट्टराईले नेपाल आउने पदयात्री पर्यटकलाई अन्त मोड्न नदिन पदमार्गलाई बचाइराख्नुपर्ने बताए । नयाँ रुट पत्ता लगाएको अवस्थामा त्यही रुटमा डोजर लगाउने काम नगरिदिन उनले जनप्रतिनिधिलाई आग्रह गरे ।

प्रकाशित : जेष्ठ २०, २०७९ १२:०४
पूरा पढ्नुहोस्
प्रतिक्रिया
पठाउनुहोस्
×