नेम्वाङको उम्मेदवारी, शेर्पामाथि आरोप- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

नेम्वाङको उम्मेदवारी, शेर्पामाथि आरोप

‘अब नेपाली फुटबल अगाडि बढाउने हो भने हामीले उम्मेदवारी दिनुपर्छ’
कान्तिपुर संवाददाता

जोमसोम — अखिल नेपाल फुटबल संघ (एन्फा) को चारवर्षे कार्यकालका लागि निर्वाचन हुन ठीक एक महिनाअघि अध्यक्ष पदका लागि पंकजविक्रम नेम्वाङले शुक्रबार आफ्नो उम्मेदवारी दर्ता गराएका छन् । 

निर्वाचन असार ६ मा हुनेछ । वर्तमान वरिष्ठ उपाध्यक्ष नेम्वाङले त्यसअघि पत्रकार सम्मेलन गर्दै आफ्नो उम्मेदवारी घोषणा गरेका थिए । उनका प्रत्याशी रहने वर्तमान अध्यक्ष कर्माछिरिङ शेर्पाले भने आधिकारिक रूपमा उम्मेदवारी घोषणा गर्न बाँकी छ ।

शुक्रबार कार्यक्रमपछि नेम्वाङले सातदोबाटोस्थित एन्फा मुख्यालयमा गएर आफ्नो उम्मेदवारी दर्ता गराएका थिए । उम्मेदवारी घोषणा गर्नेक्रममा उनले वर्तमान अध्यक्ष शेर्पामाथि आर्थिक अनियमिताको आरोप लगाए । उनले भनेका छन्, ‘हामीले आर्थिक नियमावाली त बनायौं, तर आर्थिक अनियमिता बढ्दै गयो । अहिले फिफाले लेखा परीक्षक पठाएर त्यसबारे छानबिन गरिरहेको छ । अहिले एन्फामा फिफाको नाकाबन्दी चलिरहेको छ । यो अवस्था किन आयो भने अहिले एन्फामा भ्रष्टाचार चलिरहेको छ । नीतिगत भ्रष्टाचार पनि भइरहेको छ ।’

उनले थपेका छन्, ‘अब नेपाली फुटबल अगाडि बढाउने हो भने हामीले उम्मेदवारी दिनुपर्छ ।’ त्यही अवसरमा वीरबहादुर खड्काले वरिष्ठ उपाध्यक्षमा आफ्नो उम्मेदवारीको घोषणा गरे । उनले अध्यक्ष शेर्पा आफ्नो जिम्मेवारीमा पूर्णतः असफल रहेको दाबी गरे । उनले भने, ‘खेलाडीहरूले अध्यक्ष शेर्पाले फुटबल चलाउन सक्नुहुन्न, त्यसैले तपाईंहरू आउनुपर्छ भनेका छन् । त्यसैले म खेलाडीको उम्मेदवार हुँ । अध्यक्ष शेर्पालाई फुटबलको माया छैन । खेलाडीको मतलब छैन ।’

शेर्पा र नेम्वाङले एउटै मोर्चामा रहेर विगतमा तत्कालीन अध्यक्ष गणेश थापालाई आर्थिक अनियमिताको आरोप लगाउँदै एन्फाको सत्ता हत्याएका थिए । अहिले नेम्वाङले शेर्पाविरुद्ध त्यही आर्थिक अनियमितताको आरोप ‘चुनावी हतियार’ बनाएका छन् ।

अध्यक्ष शेर्पाको चर्को आलोचना गर्नेमा एन्फाका पूर्व प्रवक्ता किरण राई पनि रहे । उनले उम्मेदवारी घोषणा कार्यक्रममा भने, ‘अध्यक्ष शेर्पाले क्रमिक रूपमा गल्ती गरिरहनुभएको छ । सुध्रिने अवस्था नै रहेन । हामीले अध्यक्षलाई धेरै सहयोग गरेका थियौं । तर उहाँ पूर्णतः असफल हुनुभएको छ । खेलाडी र मुख्य प्रशिक्षकबीचको विवादलाई लिएर उहाँले राजीनामा गर्नुहुन्छ जस्तो लागेको थियो । शेर्पा नेतृत्वको पछिल्लो चार वर्ष नेपाली फुटबलका लागि कालो अवधि हो ।’

उनले अध्यक्ष शेर्पालाई आगामी निर्वाचनमा उम्मेदवारी नदिनसमेत सल्लाह दिएका छन् । उनले थपे, ‘मेरो उहाँविरुद्ध कुनै व्यक्तिगत असहमति छैन । तर, तपाईं (कर्माछिरिङ) चुनाव लड्ने सोचलाई छोड्नुहोस् । तपाईं चुनावमा नआएकै राम्रो, किनभने तपाईं असफल हुनुभएको छ । एन्फाका कर्मचारी तपाईंको नियन्त्रणमा छैनन् । तपाईंको काम भनेको कुनै मैदानमा गएर सेल्फी खिच्ने मात्र भएको छ । यो तपाईंको काम होइन ।’

उनले मुख्य प्रशिक्षक अब्दुल्लाह अल्मुताइरी विवादमा केही गर्न नसकेकाले आफूले प्रवक्ताबाट राजीनामा दिएको दाबी पनि गरे ।

प्रतिवेदन आफैंमा अन्योलपूर्ण

नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरी र खेलाडीबीचको विवादलाई लिएर अनुसन्धान गर्न गठित छानबिन समितिले पेस गरेको प्रतिवेदन आफैंमा अन्योलपूर्ण देखिएको छ ।

अखिल नेपाल फुटबल संघ (एन्फा) ले शुक्रबार प्रतिवेदन सार्वजनिक गरेको हो । सबैलाई दोष देखाएर आफैं भने अस्पष्ट देखिएको छ । एन्फा कार्यसमितिको बैठकले पूर्वखेलाडी भिक्टोर राणाको नेतृत्वमा तीन सदस्यीय छानबिन समिति गठन गरेको थियो । कमिटीका सदस्यमा पूर्वखेलाडी विदुर विष्ट र राष्ट्रिय तथा अन्तर्राष्ट्रिय खेलाडी संघका उपाध्यक्ष दीपक थापा रहेका थिए ।

एन्फा सचिवालयलाई बुझाइएको प्रतिवेदनमा प्रशिक्षक र खेलाडी दुवैलाई दोषी देखाइएको छ । तर, प्रतिवेदन विवादको ठोस कारण औंल्याउन र त्यसको समाधान देखाउन असफल देखिएको छ । प्रतिवेदनले सबै पक्षलाई सचेत गराउन मात्र भनेको छ । प्रतिवेदनमा भनिएको छ, खेलाडी बन्द प्रशिक्षणबाट भागेर गएको तथ्यमा सत्यता देखिन्न ।

मुख्य प्रशिक्षकले खेलाडीलाई बारम्बार अमर्यादित भाषामा प्रशिक्षण क्याम्पबाट बाहिर जानु भनेपछि उनीहरू टिम छाड्न बाध्य भएको देखिन्छ । तर तिनै खेलाडीले होटलको विषयलाई लिएर वादविवाद सिर्जना गरेर मुख्य प्रशिक्षकलाई अप्ठ्यारो अवस्थामा पुर्‍याउनुलाई छानबिन समितिले खेलाडीलाई दोषी मानेको छ । सहायक प्रशिक्षक, गोलरक्षक प्रशिक्षक, टिम समन्वयकर्ता र फिजियोले वैशाख १३ गते राति होटल नछाड्न गरेको आग्रह नमान्नुलाई पनि खेलाडीको गल्ती मानेको छ ।

यस्तै प्रतिवेदनमा खेलाडीले घटनाक्रमलाई लिएर पत्रकार सम्मेलन गर्नु पनि गलत भनिएको छ । अझ समितिले भनेको छ, एन्फा र राज्यले पुर्‍याउन सक्ने उचित सेवा–सुविधा प्रदान गर्दै आएकामा त्यस्ता विषयमा फेरि विवाद नगर्न खेलाडीलाई सचेत गराउन भनेको छ । खेलाडीले अमर्यादित र अनुशासनहीन कार्य गरेका धेरै उदाहरण रहेका हुनाले त्यसमा शून्य सहनशीलता अपनाउन पनि समितिको सिफारिस छ । प्रतिवेदनमा मुख्य प्रशिक्षक अल्मुताइरीलाई एकलौटी र स्वेच्छाचारी भनी औंल्याइएको छ ।

प्रशिक्षणबाहेक अन्य काममा समेत मुख्य प्रशिक्षकले हस्तक्षेप गर्ने प्रवृत्ति रहेको हुनाले त्यसलाई सच्चाउन सुझाइएको छ । खेलाडीले बन्द प्रशिक्षण छाडेर गएकामा मुख्य प्रशिक्षकको केही त्रुटि रहेको मानेको छ र एसिया कप छनोटपछि प्रशिक्षकलाई अर्को विकल्प खोज्न सुझाइएको छ । प्रतिवेदनमा राष्ट्रिय टिमका व्यवस्थापक मधुसुदन उपाध्यायको सबैभन्दा बढी आलोचना गरिएको छ । उनमा राष्ट्रिय टिमको नेतृत्व गर्ने क्षमता नै नभएको समितिले जनाएको छ ।

त्यसैले उनलाई उक्त जिम्मेवारीबाट हटाउन भनिएको छ । यस्तै सहायक प्रशिक्षक, गोलरक्षक प्रशिक्षक, टिम समन्वयकर्ता र फिजियोको कार्यक्षमता बढाउन पनि सुझाव दिएको छ । एन्फा सचिवालयलाई समितिले अन्त्यमा के सुझाएको छ भने विद्रोह गरेका १० खेलाडी र प्रशिक्षकलाई एकै स्थानमा राखेर मनमुटाव मिलाएर समझदारी कायम राख्न आवश्यक वातावरण बनाउनु भनेको छ । त्यस अर्थमा न खेलाडीलाई कारबाही गर्न भनिएको मान्न सकिन्छ, न त मुख्य प्रशिक्षकलाई नै कारबाही गर्न भनिएको मानिने छ ।

प्रकाशित : जेष्ठ ७, २०७९ ०८:०५
प्रतिक्रिया
पठाउनुहोस्

किरणबाहेकको फुटबल टोली घोषणा

कान्तिपुर संवाददाता

काठमाडौँ — कप्तान तथा गोलरक्षक किरण लिम्बूबिना नै एसिया कप छनोट तेस्रो चरणका लागि शुक्रबार नेपाली राष्ट्रिय फुटबल टिम घोषणा गरिएको छ । मुख्य प्रशिक्षक अब्दुल्लाह अल्मुताइरीले घोषणा गरेको २३ सदस्यीय टिममा किरण परेनन् । उनले पनि प्रशिक्षकविरुद्ध आवाज उठाएका खेलाडीको पक्षमा बोलेका थिए ।

ती विद्रोही १० खेलाडीको अनुपस्थितिमा टिममा चार नयाँ अनुहारले स्थान पाएका छन् । त्यसमा विकास तामाङ, शिव गुरुङ, नीरकुमार राई र रोशन रानामगर छन् । नेपालले एसिया कप छनोट तेस्रो चरणको समूह ‘ए’ का खेलमा जोर्डन, कुवेत र इन्डोनेसियाको सामना गर्नेछ । समूहका सबै छनोट खेल कुवेतमा हुनेछ ।

घोषित टिमका खेलाडीमा दीप कार्की, विशाल सुनार, टिकेन्द्रसिंह थापा, विकास खवास, विकास तामाङ, गौतम श्रेष्ठ, राजन गुरुङ, शिव गुरुङ, सुमन अर्याल, आकाश बुढामगर, एरिक विष्ट, नीरकुमार राई, पुजन उपरकोटी, रोशन रानामगर, सन्तोष तामाङ, सेसेहाङ आङदम्बे, सुनील बल, सुरजज्यू ठकुरी, आयुश घलान, दर्शन गुरुङ, जर्जप्रिन्स कार्की, मनीष डाँगी र नवयुग श्रेष्ठ छन् ।

प्रकाशित : जेष्ठ ७, २०७९ ०८:०४
पूरा पढ्नुहोस्
प्रतिक्रिया
पठाउनुहोस्
×