युगान्डालाई नेपालले दियो मध्यम लक्ष्य- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

युगान्डालाई नेपालले दियो मध्यम लक्ष्य

विनोद पाण्डे

काठमाडौँ — नेपाली महिला क्रिकेट टोलीले युगान्डासँगको दोस्रो ट्वान्टी-२० अन्तर्राष्ट्रिय खेलमा पनि कमजोर प्रदर्शन गरेको छ । युगान्डाले टस जितेपछि पहिले ब्याटिङमा आएको नेपालले निर्धारित २० ओभरमा ७ विकेट गुमाई १ सय १ रनमात्र बनाउन सक्यो ।

तस्बिर : केशव थापा/कान्तिपुर

अघिल्लो दिन युगान्डाले नेपाललाई १२ रनले स्तब्ध पार्दै पाँच खेलको शृंखलामा अग्रता लिएको थियो । मंगलबार पनि नेपालको प्रदर्शनमा कुनै सुधार आएन र टोलीले युगान्डालाई सानो लक्ष्यमात्र दिन सक्यो । नेपालले पावर प्लेमा १ विकेट गुमाई १७ रनमात्र बनाउन सकेको थियो । नेपालले पहिलो ६ ओभरमा कुनै चौका प्रहार गर्न सकेको थिएन् ।

नेपालले पहिलो ५० रन पूरा गर्न १२ ओभर लागेको थियो । नयाँ प्रयोग गर्दै नेपालले उपकप्तान इन्दु बर्मालाई विन्दु रावलसँगैं ओपनिङमा पठाएको थियो । त्यो निर्णय घात हुन पुग्यो । इन्दु १३ बलमा ५ रन बनाई आउट भए । अप्सरी बेगम पनि ३ रनमै आउट भए ।

विन्दुले २६ रन बनाइन् । उनले ३६ बल खेल्दै २ चौका प्रहार गरिन् । यूएईमा फेयर ब्रेक खेलेर अघिल्लो दिन आएकी सीता रानामगर ६ रनमा रनआउट भइन् भने कविता जोशीले खाता खोल्न सकिनन् । सरिता मगरले २७ बलमा २ चौका प्रहार गर्दै २२ रन बनाइन् ।

कप्तान रुविना क्षेत्री इनिङ्सको अन्तिम बलमा आउट हुनु पूर्व १५ बलमा २ चौका प्रहार गर्दै १७ रन बनाइन् । डली थापा १ छक्का प्रहार गर्दै ७ बलमा ९ रन बनाई अविजित रहिन् । रुविना र डलीले अन्तिम ओभरमा १५ रन जोडेपछि नेपालको स्कोर हेर्न लायक बनेको थियो ।

युगान्डाकी जेनेट एमबाबाजीले ४ ओभरमा २६ रन खर्चेर २ विकेट लिइन् । इभ्लिन एनिइपो, कप्तान कोन्की अवेको र रिता मुसामालीले १–१ विकेट लिइन् ।

प्रकाशित : जेष्ठ ३, २०७९ १४:५९
प्रतिक्रिया
पठाउनुहोस्

गोरखाको चुमनुव्रीमा फर्जी मत खसेको भन्दै माओवादीले मतगणना गर्न दिएन

हरिराम उप्रेती

गोरखा — मतदान सकिएको चार दिनसम्म चुमनुव्री गाउँपालिकाको मतगणना सुरु हुन सकेको छैन । भौगोलिक विकटता रहेको चुमनुव्रीमा दुई दिन लगाएर आइतबार मतपेटिका संकलन भएको छ । तर, सर्वदलीय वैठकले मतगणना गर्ने निर्णय गर्न नसक्दा मतगणना सुरु हुन नसकेको हो । माओवादी केन्द्रले ल्हो मावि मतदान केन्द्रमा फर्जी मत खसेको आशंका गर्दै मतगणना गर्न मानेको छैन ।

उसले पुन मतदानको माग राख्दै मतगणना रोक्न जेष्ठ १ गते निर्वाचन अधिकृतको कार्यालयमा निवेदन दिएको थियो । चुमनुव्रीको निर्वाचन अधिकृतको कार्यालयले ल्हो मावि मतदान केन्द्रमा खटिएका कर्मचारी तथा सुरक्षा निकाय प्रमुखसँग केन्द्रको मतदान प्रक्रियाबारे स्पष्टिकरण सोधेको थियो ।

केन्द्रमा खटिएका कर्मचारीसँग लिएको स्पष्टिकरण सहितको पत्र चुमनुव्री निर्वाचन अधिकृतको कार्यालयले आवश्यक निर्देशनका लागि सोमबार निर्वाचन आयोग पठाएको थियो । कार्यालयको पत्रपछि आयोगले मतगणना सुचारु गर्न सोमबार नै निर्वाचन अधिकृतको कार्यालयलाई निर्देशन दिइसकेको छ ।

आयोगले तत्काल मतगणना सुरु गर्न निर्वाचन अधिकृतको कार्यालयलाई निर्देशन गर्दै सुरक्षा ब्यवस्था मिलाउन प्रशासनलाई भनेको छ । तर, मंगलबारसम्म मतगणना सुरु भएको छैन । मतगणना सुचारु गर्न मंगलबार पनि सर्वदलीय वैठक जारी रहेको चुमनुव्री गाउँपालिकाका निर्वाचन अधिकृत नानीवावु पोखरेलले बताए ।

‘विहान पनि वैठक बस्यो, आजबाटै मतगणना सुरु गर्न छलफलको अन्तिम तयारीमा छौँ,’ उनले भने, ‘सहमति नजिक छौँ, वैठक सकेर आजबाटै मतगणना शुरु हुन्छ ।’ ७ वडा रहेको चुमनुव्रीमा २१ मतदान केन्द्र छन् ।

प्रकाशित : जेष्ठ ३, २०७९ १४:५३
पूरा पढ्नुहोस्
प्रतिक्रिया
पठाउनुहोस्
×