२५.१२°C काठमाडौं
काठमाडौंमा वायुको गुणस्तर: १३०

सुवासको घर बनाउन १५ लाख संकलन

काठमाडौँ — १३ औं दक्षिण एसियाली खेलकुद २०१९ (साग) मा दुई स्वर्ण पदक जितेका गल्फर सुवास तामाङको घर निर्माणका लागि गोकर्ण गल्फ क्लबमा आयोजित ‘च्यारिटी गल्फ प्रतियोगिता’ बाट १५ लाख रुपैयाँ संकलन गरिएको छ ।

सुवासको घर बनाउन १५ लाख संकलन

नेपाल गल्फ संघ र गोकर्ण फरेस्ट रिसोर्टद्वारा शनिबार आयोजित प्रतियोगितामा सहभागी ७२ सोसल गल्फर र थप २० गरी ९२ जनाको सहयोगबाट १५ लाख संकलन गरिएको संघका महासचिव दीपक आचार्यले बताए । गोकर्ण गल्फ क्लबका वरिष्ठ निर्देशकसमेत रहेका उनले भने, ‘गल्फ समुदायबाट सहयोग जुटाएर सुवासको घर निर्माण गर्ने प्रयास गरेका छौं । व्यक्तिगत रूपमा निकै राम्रो सहयोग संकलन भएको छ । यसबाट चाँडै उनको घर बनाउने छौं ।’ ठमेल डेन्टल क्लिनिकले आजीवन सुवासको दाँतको उपचार गर्ने घोषणा पनि गरेको छ ।

माधव सिम्खडाले सर्वाधिक ४१ अंक जोड्दै उक्त च्यारिटी गल्फको ट्रफी कब्जा गरे । कवि थापाले ‘काउन्टब्याक’मा अर्जुन कुमारलाई पछाडि पार्दै दोस्रो स्थान हािसल गरे । दुवैले ४० अंक बनाए । पछिल्लो ९ होलमा कविले २१ अंक जोडे भने अर्जुनले १७ अंक हात पारे । टासी छिरिङ र वान्चेन धोन्डुपले सर्वाधिक ३६ ग्रस प्वाइन्ट जोडे । १२ औं होलमा बर्डी गरेको आधारमा टासी पहिलो भए । उक्त होल वान्चेनले पारमा टुंग्याए । दुवैले अन्तिम ६ होलमा समान प्रदर्शन गरे ।

महिलातर्फ गीता गुरुङ (२६ अंक) पहिलो भइन् भने सिनियरमा आरआर पाण्डे र विजयबहादुर श्रेष्ठले समान ३५ अंक जोडे । पाण्डे काउन्टब्याकका आधारमा पहिलो भए । स्टेबलफोर्ड ३/४ ह्यान्डीक्यापको आधारमा भएको प्रतियोगितामा नोर्बु श्रेष्ठले लङ्गेस्ट ड्राइभ, रवीन्द्र तिवारीले क्लोजेट टु द पिन, टासी दोङले सर्वाधिक बर्डीको पुरस्कार हात पारे ।

प्रकाशित : वैशाख २५, २०७९ ०७:२४
प्रतिक्रिया
पठाउनुहोस्
जनताको राय

सहकारी ठग्नेलाई कारबाहीको दबाब दिन प्रमुख विपक्षी दल कांग्रेसले गरेको सडक आन्दोलन घोषणालाई कसरी लिनुभएको छ ?