बास्केटबल लिग हुने

कोभिड–१९ महामारीयता पहिलोपल्ट आयोजना गर्न लागेको एनबीएलमा पुरुषतर्फ डिफेन्डिङ च्याम्पियन टाइम्स इन्टरनेसनल, पहिलो संस्करणको विजेता गोल्डेनगेट, दुईपल्ट फाइनल खेलेको आर्मीसहित रोयल बास्केटबल क्लब, बूढानीलकण्ठ नगरपालिका, कीर्तिपुर बास्केटबल क्लब, विशाल मिलन केन्द्र र क्याम्पियन सोलोले प्रतिस्पर्धा गर्नेछन् । क्याम्पियन सोलो नयाँ टिम हो । महिलातर्फ डिफेन्डिङ च्याम्पियन पुलिस, ललितपुर हाई क्लब, रोयल बास्केटबल र आईएस नेपालको सहभागिता निश्चित भएको आइतबार पत्रकार सम्मेलनमा जानकारी दिइयो ।

एनबीएलमा ‘होम एन्ड अवे’ का आधारमा ‘डबल लिग’ हुनेछ र लिग चरणका शीर्ष चार टिम प्लेअफमा छनोट हुनेछन् । प्लेअफ ‘बेस्ट अफ थ्री’ का आधारमा हुनेछ भने फाइनल एक खेलमै टुंगिनेछ । पुरुषतर्फ ५ सय ५६ र महिलातर्फ २० खल हुनेछन् । एनबीएलका विजेताले २ लाख र उपविजेताले १ लाख तथा महिलातर्फका विजेताले १ लाख र उपविजेताले ५० हजार रुपैयाँ हात पार्नेछन् । उत्कृष्ट प्रशिक्षक, उदीयमान खेलाडी, दुवै विधाका मोस्ट भ्यालुएबल प्लेयर (एमभीपी) र हरेक खेलका एमभीपी पनि पुरस्कृत हुनेछन् ।

नेपाल बास्केटबल संघको स्वीकृतिमा टर्नपाइक इभेन्टले फ्रेन्चाइज प्रतियोगिता (लिग) आयोजना गर्ने घोषणा गरिसकेको अवस्थामा एनबीएलका उपाध्यक्ष अरुण कार्कीले भने, ‘कुनै द्वन्द्वबिना हामी जानेछौं । नेपाल सरकारसँग स्वीकृति लिएकाले निजी रूपमा हामी पनि गर्नेछौं (एनबीएल) । संघको प्राविधिक सहयोगलाई सधैं स्वागत गर्नेछौं ।’ संघसँग स्वीकृतिका लागि अनुरोध गरे पनि कुनै प्रतिक्रिया नआएको उल्लेख गरे । ‘यो (एनबीएल) निजी लिग हो, त्यो (फ्रेन्चाइज लिग) संघले गर्छ । जहाँसम्म लाग्छ द्वन्द्व हँॅुदैन, यी दुई लिग पूरै फरक हुन्,’ राष्ट्रिय टिमका कप्तान सदीश प्रधानले भने, ‘संघले केही अब्जेक्ट नगरोस्, खेलाडीले खेलिरहन पाओस् । जति धेरै खेल्न पायो, खेलाडीलाई त्यति राम्रो हो ।’

एनबीएल सञ्चालनमा ९० लाखदेखि १ करोडसम्म खर्च लाग्ने बताइएको छ ।