काठमाडौँ — नेपाल पुलिस क्लबका स्यान्टु श्रेष्ठ र एपीएफकी सिक्का सुवाल श्रेष्ठले ११ औं पूर्णमान वज्राचार्य स्मृति राष्ट्रिय खुला टेबलटेनिस प्रतियोगिताको उपाधि जितेका छन् ।

लैनचौरस्थित राष्ट्रिय टेबलटेनिस प्रशिक्षण केन्द्रमा शनिबार पुरुष सिंगल्स फाइनलमा तीनपटकका राष्ट्रिय च्याम्पियन स्यान्टुले आफ्नै विभागका विनेश खनियाँलाई ७–११, ११–९, ११–९, ११–६, ७–११, ११–९ को सेटमा हराए । एक सातामा स्यान्टुको यो दोस्रो उपाधि हो । उनले चैत १९ मा चौथो सम्झना कप अन्तर्राष्ट्रिय टेबलटनिसमा भारतीय खेलाडीलाई हराउँदै उपाधि जितेका थिए । आर्मीका दीप साउन र एपीएफका संयोग कपाली तेस्रो भए ।

महिलातर्फ फाइनलमा सिक्काले आर्मीकी स्वेच्छा नेम्बाङलाई ११–४, ११–४, ११–२, ११–७ को सोझो सेटमा सहजै हराइन् । सिक्काको सिनियरमा यो पहिलो एकल उपाधि हो । आर्मीकी रविना महर्जन र पुलिसकी सोनु थापा मगर तेस्रो भए । दुवैका विजेताले ५० हजार, उपविजेताले २५ हजार र तेस्रोले १०–१० हजार पुरस्कार प्राप्त गरे ।

ह्वीलचेयरको सिंगल्सतर्फ पुरुषमा अर्पण सुनुवार राईले प्रदीप भण्डारीलाई ८–११, ११–५, ११–६ तथा महिलामा लाली शेर्पाले रजनी राईलाई ११–५, ११–३ ले हराएर स्वर्ण जिते । स्टेन्डिङको महिला सिंगल्समा रायकोशा शाही मेनुका गौतमलाई ४–११, ११–७ र ११–४ ले हराएर विजेता भइन । मिडियातर्फ पुरुष सिंगल्समा हिमालय टेलिभिजनका सुमन प्रधान पहिलो, कान्तिपुर दैनिकका राजु घिसिङ दोस्रो तथा खेलपाटीका निशान राई र राजधानी दैनिकका दिलबहादुर तामाङ तेस्रो भए ।

स्कुलतर्फ आदर्श विद्यामन्दिर (एभीएम) टिम च्याम्पियन बन्यो । एभीएमले ४ स्वर्ण, ६ रजत र ५ कांस्य हात पार्‍यो । विजेतालाई अखिल नेपाल टेबलटेनिस संघका अध्यक्ष चतुरानन्द राजवैद्य, प्रायोजक केबी साम आल्मुनियका अध्यक्ष कमलकुमार बेगानी र प्रमुख कार्यकारी अधिकृत अमितकुमार बेगानी, आयोजक काठमाडौं जिल्ला टेबलटेनिस संघका अध्यक्ष धर्ममान वज्राचार्यलगायतले पुरस्कृत गरे ।