आर्मी उपाधि नजिक- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

आर्मी उपाधि नजिक

आर्मीले उपाधिका लागि मनाङ र सगरमाथा युथबीचको विजेतासँग प्रतिस्पर्धा गर्ने
सुम्निमा चाम्लिङ

इटहरी — त्रिभुवन आर्मी क्लब इटहरीमा जारी १२ औं आमन्त्रण कन्ट्रोल इटहरी गोल्डकप फुटबल प्रतियोगिताको फाइनल पुगेको छ । बुधबार पहिलो सेमिफाइनलमा रोलिङ क्लब धुलाबारी झापालाई २–१ ले पराजित गर्दै आर्मी उपाधि नजिक पुगेको हो ।

रोलिङ क्लबका खेलाडीको बीचबाट बल अघि बढाउने प्रयास गर्दै त्रिभुवन आर्मी क्लबका सुमन अर्याल (हरियो ) । तस्बिर : अर्जुन सुवेदी/केटिभी

आर्मीले उपाधिका लागि मनाङ मर्स्याङ्दी र सगरमाथा युथ क्लब मोरङबीच हुने सेमिफाइनल विजेतासँग शनिबार प्रतिस्पर्धा गर्नेछ ।

बुधबार प्रतिस्पर्धात्मक खेलको पहिलो हाफमा दुवै टोलीबाट गोल हुन सकेन । आर्मीका टेकबहादुर बुढाथोकी र सन्तोष तामाङले समान एक गोल गरे । रोलिङबाट इन्ज्युरी समयमा मार्टिन एसले एक गोल फर्काए । विशाल राई, आयुश घलानजस्ता भरपर्दा खेलाडी मैदानमा उतारे पनि फिनिसिङ कमजोर हुँदा रोलिङको फाइनल यात्रा टुंगिएको छ ।

पहिलो मिनेटमा टेकबहादुर बुढाथोकीले गरेको हेड बल पोस्ट नजिकबाट बाहिरियो । नवौं मिनेटमा फ्रिकिकमा आर्मीका सन्तोष तामाङले गरेको प्रहार रोलिङका गोलरक्षक मनोज प्रधानले जोगाए । १३ औं मिनेटमा सन्तोषकै खेल गयो ।

४२ औं मिनेटमा विवेक बस्नेतले गरेको प्रहार पोस्टमाथिबाट बाहिरियो । आर्मीले पहिलो हाफमा थुप्रै अवसर गुमायो ।

दोस्रो हाफको पाँचौं मिनेटमा आर्मीका सन्तोष तामाङको फ्रिकिक प्रहारमा टेकबहादुर बुढाथोकीले गोल गरेर टिमलाई अग्रता दिलाए । २७ औं मिनेटमा टेकबहादुरको वान टच प्रहार पोस्ट बाहिर जाँदा आर्मीले थप गोल गर्ने अवसर गुमायो ।

आर्मीले गोल गरेपछि रोलिङ दबाबमा देखियो । बराबरीमा ल्याउन रोलिङले लगातार अवसर सिर्जना गरे पनि फिनिसिङ कमजोर रह्यो । दोस्रो हाफको ४४ औं मिनेटमा रोलिङका गोलरक्षक मनोज प्रधान बिट भएको अवस्थामा सन्तोष तामाङले वान टचमै गोल गर्दै टिमलाई जित नजिक पुर्‍याए ।

पहिलो हाफको २१ औं मिनेटमा रोलिङका मार्टिन एसको प्रहार आर्मीका गोलरक्षक विकेश कुथुले बचाए । ३१ औं मिनेटमा फोफना फोडेले मिलाएको पासमा मार्टिन फिनिसिङमा चुक्दा अवसर गुम्यो । ४४ औं मिनेटमा मार्टिनले गरेको प्रहार क्रसबारमा ठोक्किँदा अग्रता लिनबाट चुकेको थियो ।

दोस्रो हाफको १९ औं मिनेटमा कुलदीप कार्कीले गरेको प्रहार पोस्ट माथिबाट गयो । विशाल राईले ३१ औं मिनेटमा गरेको प्रहार आर्मीका गोलरक्षक विकेशले जोगाए । इन्ज्युरी समयमा मार्टिन एसले एक गोल फर्काए । म्याद अफ द म्याच आर्मीका टेकबहादुर बुढाथोकी भए । उनले १० हजार रुपैयाँ पुरस्कार पाए । बिहीबार मनाङविरुद्ध सगरमाथा युथ क्लब भिड्ने छन् ।

प्रकाशित : चैत्र २४, २०७८ ०७:१९
प्रतिक्रिया
पठाउनुहोस्

गाँजा रोपेर कार्यक्रम, अतिथि प्रहरी

रमेशचन्द्र अधिकारी

धनकुटा — जनप्रतिनिधि, बर्दीर्धारी प्रहरी अधिकृत र समाजका अगुवा खादा–ब्याच लगाएर बसेका छन् । कार्यक्रमको नाम– ‘गाँजाबारे बृहत् छलफल र सचेतना मेला’ । कानुनी रूपमा प्रतिबन्धित गाँजाको पक्षमा आयोजित कार्यक्रमका प्रमुख अतिथिले गाँजाकै बिरुवामा पानी हाली उद्घाटन गर्दा उपस्थित सबैले ताली बजाएर खुसियाली मनाए । 

धनकुटाको सहिदभूमि–४ अखुवाटारमा आयोजित कार्यक्रम । तस्बिर : कान्तिपुर

प्रतिबन्धित लागूऔषध गाँजा लगाउनुपर्छ भन्दै गरिएको यो ‘दुर्लभ कार्यक्रम’ कुनै बन्द कोठामा थिएन । सयौंको उपस्थितिमा खुला रूपमा धनकुटाको सहिदभूमि गाउँपालिका–२ अखुवाटारमा चैत २० देखि २२ सम्म गरिएको हो । प्रमुख अतिथि गाँजा वैधानिक अभियानका केन्द्रीय सल्लाहकार राजीव काफ्लेले गाँजाको बिरुवामा पानी हाल्दै उद्घाटन गरिरहँदा मञ्चमा रहेका जनप्रतिनिधि र प्रहरीले समेत ताली बजाएर स्वागत गरे ।

यहाँको छिन्ताङ क्षेत्रबाट हरेक वर्ष गाँजा ओसारपसारमा संलग्न ३० जनाभन्दा बढी पक्राउ पर्ने प्रहरीको तथ्यांक छ । बेलाबेला गाँजा फँडानी गर्न आउने प्रहरी नै अतिथिका रूपमा देख्दा स्थानीय अनौठो मानिरहेका थिए ।

लागूऔषध (नियन्त्रण) ऐन, २०३३ अनुसार खेती गरिएको हकमा २५ बोटसम्म ३ महिना कैद वा ३ हजार जरिवाना छ । २५ बोटभन्दा बढी भए ३ वर्ष कैद वा ५ देखि २५ हजार जरिवाना सजाय हुन्छ । यस्तै ५० ग्रामसम्म गाँजा राखे ३ महिनासम्म कैद र ३ हजारसम्म जरिवाना हुन सक्छ । तर, प्रतिबन्धित गाँजालाई वैधानिक रूपमा खुला गरिनुपर्नेमा बहस सुरु भएका छन् । प्रतिबन्ध फुकुवाको माग गर्दै संघ, प्रदेशका सांसददेखि स्थानीय जनप्रतिनिधिसम्म अभियानमा छन् ।

तीन दिनसम्म भएको गाँजा सचेतना मेलामा धनकुटा, भोजपुर र उदयपुरका जनप्रतिनिधिदेखि सुरक्षाकर्मीसमेत सामेल भएको कार्यक्रमका संयोजक तीर्थ राईले जानकारी दिए । उनका अनुसार मेलामा नेपालका विभिन्न संस्थाका गाँजा अभियन्ता सहभागी रहेर वैधानिकताको मागलाई ऐक्यबद्धता जनाएका छन् ।

सहिदभूमिको छिन्ताङ, खोकु तथा आँखीसल्ला गाँजाको उर्वर भूमि भएकाले वैधानिकता माग गर्दै अभियान सञ्चालन गरिएको राईको तर्क छ । ‘२०३३ सालअगाडि यहाँका स्थानीयले गाँजा बेच्दै जीविकोपार्जन गरेका थिए,’ उनले भने । गाउँपालिका अध्यक्ष मनोज राईले पनि गाँजाले वैधानिकता पाए किसानले फाइदा पाउने, देशकै आर्थिक वृद्धि र रोजगार सृजना हुने बताए ।

सरकारले गाँजालाई औषधिका रूपमा प्रयोग गर्न दिने गरी कानुन निर्माणको तयारी अगाडि बढाइसकेको छ । गृह मन्त्रालयले गाँजा तथा गाँजाजन्य पदार्थ (नियमन) विधेयक, २०७८ मस्यौदा तयार गरी सैद्धान्तिक सहमतिका लागि गत फागुनमा मन्त्रिपरिषद्मा पठाएको थियो । विधेयकमा गाँजा उत्पादन, संकलन, बिक्री वितरण र निकासी कसरी गर्ने र त्यसको नियमनबारे समेटिएको छ ।

धनकुटाका प्रमुख जिल्ला अधिकारी युवराज कटेलले भने गाँजालाई वैधता दिनुअघि नै सार्वजनिक रूपमा गाँजाको बिरुवा रोपेरै औपचारिक कार्यक्रम आयोजना गर्नु गैरकानुनी भएको प्रतिक्रिया दिए । ‘बहस गर्ने विषय भए पनि यसलाई खुला गरिएको ठान्न हुँदैन,’ उनले भने । मेलामा गाँजाको लोक्ताबाट बनेका झोला, लत्ताकपडा, जुत्ता, मास्कजस्ता सामग्रीको प्रदर्शनी र बिक्री स्टल राखिएको थियो ।

प्रकाशित : चैत्र २४, २०७८ ०७:०९
पूरा पढ्नुहोस्
प्रतिक्रिया
पठाउनुहोस्
×