जापान र साउदी अरेबिया विश्वकपमा छनोट
सिड्नी — सब्टिच्युट कोरु मितोमाले खेलको अन्त्यतिर दुई गोल गरेपछि जापानले बिहीबार अस्ट्रेलियालाई २–० ले हराएर विश्वकपका लागि लगातार सातौं पल्ट छनोट भएको छ । यो जितले साउदी अरेबिया पनि विश्वकपमा छनोट भएको छ ।
अस्ट्रेलियाका लागि यो निकै ठूलो धक्का रहेको छ र अब उसले कतारमा हुने विश्वकपमा छनोट हुनका लागि कठिन प्ले अफको बाटोबाट गुज्रिनु पर्नेछ । सिड्नीमा भएको खेल गोलरहित बराबरीतर्फ अग्रसर भइरहेको बेला मितोमाले ८९ औं मिनेटमा नजिकको दूरीबाट गोल गरे ।
लगतै इन्ज्युरी समयमा उनले दोस्रो गोल थपे र यससँगै जापानी टिममा खुसीयाली छाएको छ । यो जितपछि जापान समूह बी को छनोटमा २१ अंकसहित शीर्ष स्थानमा रह्यो र अस्ट्रेलियाको भन्दा छ अंक बढी हो । साउदीको भने १९ अंक छ ।
प्रतिक्रिया