पहिलो खेल नै सेमिफाइनल आधार

नेपालजस्तै ओमानको हकमा यही लागू हुनेछ । पहिलो खेल अर्थात नेपालमाथि विजय हात पारे ओमानको सेमिफाइनल यात्रा लगभग निश्चितजस्तै हुनेछ । यस समूहमा रहेको अर्का दुई टोली फिलिपिन्स र क्यानडा हुन् । फिलिपिन्स निकै नवप्रवेशी टोली हो । यो टोलीविरुद्ध खेल्दा सबैको लक्ष्य विजयबाहेक रनरेट बढाउनु हुनेछ । नेपालले फिलिपिन्ससँग शनिबार खेल्नेछ ।

तीन वर्षपछि पहिलोपल्ट अन्तर्राष्ट्रिय क्रिकेट खेल्न लागेको फिलिपिन्सबाहेक समूह ‘बी’ बाट नेपाल, ओमान, क्यानडामध्ये जुन कुनै टोली पनि सेमिफाइनलको हकदार छन् । त्यसमा नेपाल र ओमानको सम्भावना बढी देखिएको छ । तर पहिलो खेलमै यी दुई टोली आमनेसामने हुन लागेकाले सम्हालेर खेल्नु दुवैको उद्देश्य हुनसक्छ ।

सोमबार सम्पन्न चारदेशीय ट्वान्टी–२० शृंखलामा नेपालले पहिलो खेलमा ओमानलाई नै हराएको थियो । ओमानलाई १३५–६ को स्कोरमा रोकेपछि दीपेन्द्रसिंह ऐरीको अविजित ७३ रनमा नेपालले ३ बलअगाडि लक्ष्य पूरा गरेको हो । नेपाल त्यसपछिका दुई खेलमा यूएई र आयरल्यान्डसँग पराजित भयो । नेपालपछि आयरल्यान्डसँग पराजित ओमानले अन्तिम खेलमा यूएईविरुद्ध जित पाएपछि रनरेटमा नेपाललाई पुछारतिर धकेलिदिएको थियो ।

‘हाम्रो तयारी अहिलेसम्म निकै राम्रो भयो । पछिल्ला तीन खेलमा हामीले उच्चस्तरको क्रिकेट खेल्न पायौं, यति राम्रो तयारी हामी कल्पनामात्र गर्न सक्छौं,’ नेपालका प्रशिक्षक पुबुदु दासानायकेले चारदेशीय ट्वान्टी–२० शृंखलाबारे भने, ‘नतिजाजस्तै भए पनि खेलाडीले राम्रो खेलेकाले मलाई कुनै पछुतो छैन । यो तीन खेलपछि खेलाडीको आत्मविश्वास बढेको छ ।’

कप्तान सन्दीप लामिछाने यही तयारीका आधारमा नेपाल विश्वकपमा पुग्ने दाबी गर्छन् । उनले भने, ‘टिम संयोजन र चारदेशीय ट्वान्टी–२० शृंखलाका तीन खेल हेर्दा हामी विश्वकपमा पुग्न सक्षम छौं, बाँकी धेरै हाम्रो खेलमा भरपर्छ ।’ समूह ‘ए’ मा आयरल्यान्ड, यूएई, जर्मनी र बहराइन छन् । समूहका शीर्ष दुई टोली सेमिफाइनल पुग्नेछन् । फाइनल पुग्ने टोली विश्वकपमा छानिनेछन् ।

त्यसअघिको चारदेशीय ट्वान्टी–२० शृंखला विश्वकप छनोटका लागि निकै महत्त्वपूर्ण प्रतियोगिता बनेको सन्दीप स्वीकार्छन् । ‘खेलाडीको प्रदर्शनदेखि मैदानको कन्डिसन बुझ्न यो प्रतियोगिता निकै प्रभावकारी भयो । बलिङ, ब्याटिङ र फिल्डिङ सबै क्षेत्रमा विस्तारै सुधार भइरहेको छ । त्यसैले आउने खेलहरूका लागि यो हाम्रो राम्रो तयारी थियो,’ उनले भने ।

चोटका कारण चारदेशीय ट्वान्टी–२० शृंखलामा एउटै खेल खेल्न नपाएका करण केसीले विश्वकप छनोट पनि गुमाइसकेका छन्, जुन नेपालका लागि ठूलो धक्का हो । तर प्रशिक्षक दासानायके भन्छन्, ‘१–२ खेलाडी घाइते भए पनि हामी राम्रो लयमा छौं । हाम्रा उत्कृष्ट खेलाडीहरू राम्रो स्थितिमा छन् । ब्याटिङ विस्तारै लयमा आउँदै छ, केही तयारी पूरा गर्न बाँकी छ ।’

करणको स्थानमा नेपालले गुलशन झालाई १४ सदस्यीय टोलीमा राखेको छ । बलिङ अलराउन्डर गुलशन बिहीबार रातिमात्र मस्कट पुग्ने भएकाले उनले शुक्रबार ओमानसँग खेल्ने सम्भावना कम छ । सन्दीपबाहेक नेपालबाट नियमीत स्पिनरहरू ओमानमा जम्न नसकेकाले सागर ढकालको पनि प्लेयिङ ११ मा पर्ने सम्भावना कमै छ । सागरले चारदेशीय ट्वान्टी–२० शृंखलामा ओमानसँगको खेलबाट ट्वान्टी–२० अन्तर्राष्ट्रियमा ‘डेब्यु’ गर्दा ३ ओभरमा ३६ रन खर्चिएका थिए । त्यसपछि नेपालले अर्का देव्रेहाते स्पिनर शाहब आलमलाई यूएईसँगको खेलमा प्रयोग गरेको थियो । त्यसमा शाहब पनि चुटिए । पाँचौं बलरको भूमिका नेपालबाट दीपेन्द्र, विवेक यादव र आरिफ शेखले निभाउन सक्छन् । ब्याटिङमा निकै प्रभावकारी प्रदर्शन गरेका दीपेन्द्र अफ स्पिनमा पनि उपयोगी बनेका थिए ।

चारदेशीय ट्वान्टी–२० शृंखलामा ब्याटिङमा असफल रहे पनि भेट्रानद्वय ज्ञानेन्द्र मल्ल र शरद भेषावकरमाथि प्रशिक्षक दासानायकेले विश्वास देखाउँदै आएका छन् । ओमानसँगको निकै महत्त्वपूर्ण मानिएको खेलमा दासानायकेले यी दुईमध्ये एकलाई बाहिर राख्न सक्छन् । दुवैलाई खेलाएमा विवेक प्लेयिङ ११ बाहिर हुन सक्छन् ।