रेलिगेसन होड रोमाञ्चक
काठमाडौँ — फ्रेन्ड्स क्लब ९ खेलसम्म जितविहीन थियो । तीन खेल बराबरी गरेको टोलीले ६ गोलमात्रै गरेको थियो । फ्रेन्ड्सले दसौं खेलमा आएर शुक्रबार ब्रिगेड ब्वाइजविरुद्ध ५ गोल गर्यो । पहिलो जितसँगै फ्रेन्ड्सले सहिद स्मारक ‘ए’ डिभिजन लिग २०७८ मा रेलिगेसनबाट बच्ने सम्भावना देखाएको छ ।
‘लिगमा यो हाम्रो पहिलो खोप हो,’ फ्रेन्ड्सका प्रशिक्षक मृगेन्द्र मिश्रले ब्रिगेड ब्वाइजमाथि ५–२ को जितपछि भने, ‘अब दोस्रो खोप र बुस्टर डोज लगाउनुपर्नेछ ।’ उनले भनेका ‘खोप’ को सिधा अर्थ जित हो, जसले फ्रेन्ड्सलाई रेलिगेसनबाट बचाउन सक्छ । सिजनको पहिलो जितसँगै फ्रेन्ड्सले ६ अंक जोड्दै रेलिगेसन क्षेत्र पनि छाड्यो । उति नै अंक भए पनि ब्रिगेड ब्वाइज ‘हेड टु हेड’ मा पछाडि परेपछि रेलिगेसन क्षेत्रमा झरेको छ । च्यासल युवा क्लब ५ अंक लिएर पुछारमा छ ।
रेलिगेसन क्षेत्र नजिकको क्लब हो जावलाखेल । जावलाखेलले आर्मीविरुद्ध बराबरी खेलेपछि फ्रेन्ड्स र ब्रिगेड ब्वइजसँगको दूरी ३ अंक बनायो । त्यसैले च्यासल, ब्रिगेड ब्वाइज, फ्रेन्ड्ससँगै ‘बी’ डिभिजनमा झर्नबाट बच्ने प्रयासमा जावलाखेलले पनि संघर्ष गर्नुपर्ने देखिएको छ । यसमा तीन टिमको प्रदर्शन सुधारोन्मुख रहँदा ब्रिगेड ब्वाइजको प्रदर्शन भने खस्किँदै गएको छ, झनझन समस्यामा गुजि्रँदै गएको छ । टोलीका प्रशिक्षक सनोज श्रेष्ठले फ्रेन्ड्सविरुद्धको प्रदर्शन यो लिगकै सबैभन्दा खराब भएको बताए ।
अब फ्रेन्ड्सले जावलाखेल, च्यासल र हिमालयन शेर्पाविरुद्ध खेल्नेछ । रेलिगेसन टार्न यी तीनै खेल महत्त्वपूर्ण रहेको प्रशिक्षक मिश्रले बताए । ‘हामीलाई ए डिभिजनमा सुरक्षित रहन बाँकी खेल जित्नैपर्ने अवस्था छ । हामीले दोस्रो खोप र बुस्टर डोज लगाउन बाँकी छ र लगाउने छौं पनि,’ उनले दावासाथ भने । ब्रिगेड ब्वाइजले च्यासल, सातदोबाटो र थ्रीस्टारविरुद्ध खेल्न बाँकी छ । जावलाखेलले फ्रेन्ड्स, हिमालयन शेर्पा र संकटाविरुद्ध खेल्नेछ । च्यासलको मछिन्द्र, ब्रिगेड ब्वाइज, फ्रेन्ड्स र सातदोबाटोसँगको खेल बाँकी छ ।
एकै खेलमा ७ गोल
‘ए’ डिभिजन लिग २०७८ मा ६५ खेल सकिएको छ । यसमा सबैभन्दा बढी गोल भएको छ फ्रेन्ड्सविरुद्ध ब्रिगेड ब्वाइजको प्रतिस्पर्धामा । फ्रेन्ड्सको ५–२ को जितमा कुल ७ गोल भए, जसले यसअघिको ६ गोल (छैटौं चरणमा एपीएफ ३–३ एनआरटी) को तथ्यांकलाई पछाडि पारेको हो ।
फ्रेन्ड्सको जितमा सुशील शाह र जमोल एन्थोनी फ्रान्कोइसले समान दुई गोल गरे । श्यामबाबु क्यापछाकीको नाममा एक गोल रह्यो । अनुभवी डिफेन्डर सुरज बिक र विंगर प्रकाश बुढाथोकीलाई चोटका कारण गुमाएको फ्रेन्ड्सले आकाश थापा, विकास थापा र सुशीलको आगमनसँगै जितको अनुभव गरेको हो । फ्रेन्ड्सको सुधारिएको खेलसामु ब्रिगेड ब्वाइज भने झनै खस्किएको देखियो । यस्तोमा ड्याडी जुनियर वाम्बा र अनिल गुरुङले सान्त्वना गोल गरे ।
फ्रिकिकमा सुशीलले उत्कृष्ट गोल गर्दै १४ औं मिनेटमा फ्रेन्ड्सलाई अग्रता दिलाएका थिए । तर, ड्याडी जुनियरले पनि फ्रिकिकमै सिधै गोल गर्दै २५ औं मिनेटमा ब्रिगेड ब्वाइजलाई १–१ को बराबरीमा पुर्याए । त्यसपछि काउन्टर एट्याकमा विकासको पासमा श्यामबाबुले गोल गर्दै २८ औं मिनेटमा फ्रेन्ड्सलाई २–१ ले अघि बढाए । त्यो ‘मुभ’मा गोलकर्ता अफसाइड भएको दाबी गर्दै ब्रिगेड ब्वाइजले चर्को विरोध गर्यो । यसक्रममा सब्स्टिच्युट खेलाडी रजत तिवारीले रातो कार्ड बेहोर्दै ‘बेञ्च’ छाड्नुपर्यो भने रेफ्री प्रज्वल क्षत्रीले एन्जल श्रेष्ठ र सहायक प्रशिक्षक समीर विष्टलाई पनि पहेँलो कार्ड देखाए । पहिलो हाफको इन्ज्युरी समयमा निसेन श्रेष्ठको फ्रिकिकमा जमोल एन्थोनीले हेडद्वारा गोल गरेपछि फ्रेन्ड्स ३–१ ले अघि बढ्यो । उनले व्यक्तिगत दोस्रो गोल ७६ औं मिनेटमा गरे । सुशीलले ६८ औं मिनेटमा गरेको गोल निकै आकर्षक रह्यो, जसमा फ्रेन्ड्सले ५–१ को अग्रता बनायो । जमोल र सुशीलको पछिल्ला गोलमा प्रिजेन तामाङले पास दिएका थिए ।
कुनै बेलाका स्टार खेलाडी अनिल गुरुङले ८६ औं मिनेटमा पेनाल्टीमार्फत् ‘ए’ डिभिजन लिगमा आठ वर्षयता पहिलो गोल गरेपछि ब्रिगेड ब्वाइजले अन्तर छोट्याएको थियो । प्रिजेनले रुडी जोनाथनलाई फाउल गर्दै पेनाल्टी क्षेत्रमा लडाएपछि ब्रिगेड ब्वाइजले पेनाल्टी प्रहार गर्ने अवसर पाएको थियो । दोस्रो हाफमा मैदानमा प्रवेश गरेका अनिलको प्रहारमा राहुल रामचन्द्र यादवले सही अनुमान गरे पनि बल रोक्न सकेनन् । पछिल्ला दुई सिजन ब्रिगेड ब्वाइजमा रहेका अनिलले मनाङ मर्स्याङ्दीबाट खेल्दा २०७० सालमा थ्रीस्टारविरुद्ध गोल गरेयताको खडेरी फ्रेन्ड्सविरुद्ध आएर तोडेका हुन् ।
आर्मी १–१ जावलाखेल
यो सिजनकै उत्कृष्ट प्रदर्शन गरेर पनि जावलाखेल युवा क्लब सात मिनेटको इन्ज्युरी समयको अन्तिम मिनेट सम्हालिन नसक्दा आर्मीसँग १–१ को बराबरीमा रोकियो । दिनको दोस्रो खेलमा जगजित श्रेष्ठले उपलब्ध गराएको बललाई सुमन अर्यालले सहजै गोलमा परिणत गर्दै आर्मीलाई यो सिजनको पहिलो हारबाट जोगाएका थिए । त्यो नै खेलमा आर्मीको अन्तिम प्रहार थियो । त्यसअघि ५३ औं मिनेटमा ओन्गुना एन्केन्गे जुनियरले आकर्षक गोल गर्दै जावलाखेललाई अग्रता दिलाए । उनी रूपबहादुर लामालाई बल दिएर अघि बढेका थिए । रूपले उनैलाई बल दिए र त्यसैमा आर्मीका डिफेन्डर दीपक गुरुङलाई छक्याउँदै प्रतिस्पर्धी चार खेलाडीको बीचबाट बललाई पोस्टको दिशा दिएर जावलाखेललाई अगाडि बढाएका थिए ।
रेलिगेसन टार्ने अभियानमा जावलाखेलले पहिलो हाफमा उत्कृष्ट प्रदर्शन गरेको थियो । केही अवसर सिर्जना पनि गर्यो । एन्केन्गे जुनियरले २४ र २९ औं मिनेटमा प्रहार गरेको बलमा आर्मीका गोलकिपर विकेश कुथुले राम्रो बचाउ गरे । उनले ३० औं मिनेटमा हेडद्वारा प्रहार गरेको बल भने पोस्टबाहिर गयो । कप्तान भरत खवासले ३२ औं मिनेटमा प्रहार गरेको बललाई जावलाखेलका गोलकिपर टिकेन्द्र थापाले आकर्षक रूपमा नियन्त्रण गरे । इन्ज्युरी समयको दोस्रो मिनेटमा सन्तोष तामाङको प्रहारमा पनि टिकेन्द्र बल रोक्दै राम्रो बचाउ गर्दै जावलाखेलको संकटा टारेका थिए । त्यो रिबाउन्डमा पाएको बल राजीव गुरुङले पोस्टबाहिर प्रहार गरे ।
दोस्रो हाफको अन्तिम २० मिनेट जावलाखेललाई दबाबमा राखेर पनि आर्मीले गोललाई खास अवसर सिर्जना गर्न सकेन । मिडफिल्डमा जावलाखेल नै हाबी भयो । आर्मीले चोटको कारण गुमाएका दिनेश हेन्जन र पदम तामाङको अभाव मैदानमा प्रस्टै देखियो । प्रदर्शनको आधारमा तीन अंकको हकदार जावलाखेल देखिएको थियो । एन्केन्गे जुनियर, निकोलस फर्नान्डेज र रूपबहादुरलाई आर्मीका डिफेन्सले रोक्न सकेका थिएनन् ।
जावलाखेलका प्रशिक्षक किशोर केसीले भने, ‘हामी जित नजिक पुगेका थियौं । अग्रता जोगाउन रक्षात्मक रणनीति लिएका थियौं । तर, अन्त्यतिर सम्हालिन नसक्दा बराबरीमा रोकियौं ।’ जित निकाल्न सकेको भए जावलाखेल रेलिगेसनबाट सुरक्षित अवस्थातिर उक्लिने थियो । जावलाखेल ९ अंकसहित ११ औं स्थानमा छ ।
यसपालि १० खेलमा छैटौं बराबरी गरेपछि आर्मीले दोस्रो स्थानमा उक्लिने अवसर गुमायो । १८ अंकसहित तेस्रोमा रहेको आर्मीलाई एक खेल कम खेलेको थ्रीस्टार (१६ अंक) ले उछिन्न सक्नेछ । मछिन्द्र (२३) र मनाङ मर्स्याङ्दी (१९) शीर्ष दुईमा छन् । दुवैले ९–९ खेल खेलेका छन् ।
प्रकाशित : माघ २९, २०७८ ०७:०६
