हजारौं खेलमा भारत विजयी
अहमदावाद — कप्तान रोहित शर्माले टिममा आफ्नो पुर्नआगमनलाई सम्झनालायक बनाउँदै अर्धशतक बनाएपछि भारतले पहिलो एकदिवसीय अन्तर्राष्ट्रियमा आइतबार वेस्ट इन्डिजलाई छ विकेटले पराजित गरेको छ । यससँगै भारतले तीन खेलको शृंखलामा १–० को अग्रता पनि लिएको छ । यो भारतको हजारौं एकदिवसीय अन्तर्राष्ट्रियमा खेल पनि थियो ।
जितका लागि १ सय ७७ रन पछ्याइरहेको भारतले २२ ओभरको खेल बाँकी छँदै जित आत्मसात् गरेको थियो । भारतले ठोस सुरुआत लिए पनि अन्त्यतिर कम समयमा छिटो छिटो केही विकेट गुमाएको थियो । रोहितले ६० रन बनाउने क्रममा केही आकर्षक सट प्रहार गरे र उनलाई २८ रन बनाएका इशान किशनले बलियो साथ दिए । त्यसपछि खेलमा वेस्ट इन्डिजका बलर अल्जरी जोसेफ छाए । उनले एकै ओभरमा रोहित र आठ रन बनाएका विराट कोहलीलाई आउट गरे । यससँगै खेलमा केही रोमाञ्चकता थपिएको थियो । तर भारतले जितका लागि भने संघर्ष गर्नु परेन् ।
घरेलु टिमका लागि सूर्यकुमार यादव ३४ रन बनाएर अविजित रहे । यस्तै डेब्यु गरिरहेका दीपक होडा पनि २६ रनमा अविजित रहे । जितपछि कप्तान रोहितले भने, ‘यो खेलमा हाम्रो जित उत्कृष्ट रहेन् । खेल सधैं उत्कृष्ट रहन सकिन्न । हामी टिममा प्रत्येक समय सुधार चाहन्छौं । व्यक्तिगत रूपमा आज सबै खेलाडीको प्रदर्शन ठीक रह्यो । त्यसैले यो जितमा हामी सबै खुसी पनि छौं ।’ कोहलीबाट रोहितले एकदिवसीय क्रिकेटको कप्तानी पाएका हुन् ।
यसअघि लेग स्पिनर युजभिन्दर चाहलले आफ्नो सयौं एकदिवसीय अन्तर्राष्ट्रिय विकेट लिए र उनले वेस्ट इन्डिज ब्याटिङ क्रमलाई ध्वस्त पारे । उनले ४९ रन खर्चेर चार विकेट लिए । वासिङटन सुन्दर पनि सफल बलर रहे । उनले ३० रनमा तीन विकेट लिए र बलरलाई मदत गरिरहेको पिचको खुबै फाइदा लिए । वेस्ट इन्डिजको भने सुरुआत राम्रो रहेन् र एक समय ७९ रन मात्र बनाउँदा उसले सात विकेट गुमाएको थियो र पूरा टिम कमजोर स्थितिमा थियो ।
तर ५७ रन बनाएका जेसन होल्डरले २९ रन बनाएका फाबिन एलेनसँग मिलेर टिमको स्कोरलाई १ सय ५० रन मात्र माथि पुर्याए । प्लेयर अफ द म्याच रहेका चाहलले भने, ‘मेरो काम विपक्षी टिमलाई दबाबमा राख्नु थियो । वासिङटनले एकै ओभरमा दुई विकेट लिए र वेस्ट इन्डिजमाथि दबाब सिर्जना गरेको थियो । उनको प्रदर्शन देखेर मलाई अझ राम्रो खेल्न प्रेरित गरेको थियो ।’ दोस्रो खेल यही मैदानमा बुधबार हुनेछ ।
प्रकाशित : माघ २४, २०७८ ०८:१५
