अस्ट्रेलियन ओपन : बार्टी र कोलिन्स फाइनल भिड्ने- खेलकुद - कान्तिपुर समाचार

अस्ट्रेलियन ओपन : बार्टी र कोलिन्स फाइनल भिड्ने

एएफपी

मेलबर्न — अस्ट्रेलियाकी एस्ली बार्टीले पहिलोपल्ट अस्ट्रेलियन ओपनको फाइनल यात्रा तय गर्ने क्रममा बिहीबार म्याडिसन केयसमाथि एकपक्षीय जित निकालेकी छन् ।

उपाधिको भिडन्तमा उनको सामना अमेरिकी डेनियल कोलिन्सविरुद्ध हुनेछ । विश्व नम्बर एक बार्टी ५१ औं वरीयताकी अमेरिकी केयसमाथि ६२ मिनेटमात्र चलेको खेलमा ६–४, ६–१ को जित निकाल्न सफल रहिन् ।

बार्टी सन् १९८० यता अस्ट्रेलियन ओपनको फाइनल पुग्ने पहिलो अस्ट्रेलियन खेलाडी बनेकी छन् ।

अमेरिकी कोलिन्स भने अहिले पुनरागमनको प्रयासमा छिन्, उनी गत वर्ष मात्र चोटमुक्त हुन शल्यक्रियाबाट गुज्रिएकी थिइन् । उनले पोल्यान्डकी सातौं वरीयताकी इगा स्वाटेकलाई ६–४, ६–१ ले पराजित गरिन् । सन् २०१९ मा मेलबर्नमा सेमिफाइनलसम्म पुगेकी कोलिन्स आफ्नो पहिलो ग्रान्ड स्लाम फाइनल पुगेकी छन् ।

सन् २०१९ को फ्रेन्च ओपन र २०२१ को विम्बल्डन विजेता बार्टी उत्कृष्ट लयमा छिन् । अहिलेसम्म खेलेका ६ खेलमा केवल एकैपल्ट मात्र सर्भिस गुमाएकी छन् ।

पुरुषतर्फ शुक्रबार कीर्तिमान २१ ग्रान्ड स्लामको दौडमा रहेका स्पेनका राफेल नडालले इटालीका माटेओ बेरेटिनीविरुद्ध सेमिफाइनलमा प्रतिस्पर्धा गर्नेछन् ।

प्रकाशित : माघ १३, २०७८ २१:२२
प्रतिक्रिया
पठाउनुहोस्

विश्वकप छनोट : जापानको लगातार चौथो जित

एएफपी

साइतामा — जापानले बिहीबार चीनको चुनौती २–० ले पन्छाउँदै विश्वकप छनोटमा लगातार चौथो जित हात पारेको छ ।

युया ओसाकोले पहिलो हाफमा पेनाल्टीमा गोल गर्दै चारपल्टको एसियन च्याम्पियनलाई उत्तरी टोकियोस्थित साइतामामा अग्रता दिलाएका थिए । त्यसपछि दोस्रो हाफमा जुनया इतोले जापानको अग्रता दोब्बर बनाए ।

जितसँगै जापान समूह ‘बी’ को दोस्रो स्थानमा छ । टोलीले समूहको शीर्षस्थानमा रहेको साउदी अरेबियाविरुद्ध अर्को मंगलबार सोही रंगशालामा प्रतिस्पर्धा गर्नेछ । समूहका शीर्ष दुई टिम कतारमा हुने सिधै विश्वकपमा पुग्नेछन् र यस्तो प्रतिस्पर्धामा रहेको अस्ट्रेलिया जापानभन्दा १ अंक पछाडि छ । अस्ट्रेलियाले भियतनामलाई सहजै ४–० ले हरायो ।

चीनका डिफेन्डर वाङ सेन्चाओले जुनया इतोको क्रस रोक्ने प्रयासमा पाखुरामा बल लागेपछि जापानले १३ औं मिनेटमा पाएको पेनाल्टीमा गोल गर्दै अग्रता लिएको थियो । त्यसमा चिनियाँ गोलकिपर यान जुनलिङले सही दिशामा डाइभ गरे पनि ओसाकोले कुनै गल्ती गरेनन् । सब्स्टिच्युट युता नाकायामाको क्रसमा इतोले ६१ औं मिनेटमा गोल गर्दै घरेलु टिमलाई २–० ले अगाडि बढाए ।

कोभिड–१९ संक्रमण भएका व्यवस्थापक ग्राहम आर्नोल्डको अनुपस्थितिमा अस्ट्रेलियाले भियतनामविरुद्ध मेलबर्न धेरै मिहिनेत गर्नुपरेन । जेमी म्याक्लारेनले ३० औं मिनेटमा गोलको खाता खोलेपछि टोम रोगिक, क्रेग गुडविन र रिले म्याकग्रीले पनि बललाई पोस्टको दिशा दिए । सातै खेल हारेको भियतनाम समूहको पुछारमा छ ।

अर्को खेलमा दक्षिण कोरिया १–० ले लेबनानलाई हराएर विश्वकप नजिक पुगेको छ । सिडोनमा पाउलो बेन्टोको टिमको जितमा चो गुए–सुङले गोल गरे । सन ह्युङ–मिन र ह्वाङ ही–चानलाई चोटको कारण गुमाएको कोरियाले समूह ‘ए’ मा जितका लागि निकै मिहिनेत गर्नुपर्‍यो । टोलीले छनोटका ७ खेलबाट १७ अंक जोडेको छ ।

प्रकाशित : माघ १३, २०७८ २१:११
पूरा पढ्नुहोस्
प्रतिक्रिया
पठाउनुहोस्
×