मोरिससविरुद्ध प्रयोगको रणनीतिमा अल्मुताइरी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

मोरिससविरुद्ध प्रयोगको रणनीतिमा अल्मुताइरी

कान्तिपुर संवाददाता

काठमाडौँ — नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले मोरिससविरुद्ध दुई मैत्रीपूर्ण अन्तर्राष्ट्रिय खेलमा प्रयोगको रणनीति लिएका छन् ।

अखिल नेपाल फुटबल संघ (एन्फा) ले मोरिससविरुद्ध हुने दुई अन्तर्राष्ट्रिय मैत्रीपूर्ण खेलका लागि बुधबार नेपाली राष्ट्रिय टिमको घोषणा गरेको छ । त्यसमा अल्मुताइरीले दुई फरक खेलका लागि दुई अलग्गै टिम बनाएका छन् ।

मोरिससविरुद्ध दशरथ रंगशालामा हुने पहिलो खेल शनिबार हुनेछ । दोस्रो खेल मंगलबार हुनेछ । मैत्रीपूर्ण खेललाई लिएर प्रशिक्षक अल्मुताइरीले भनेका छन्, ‘म खेलाडीलाई अन्तर्राष्ट्रिय फुटबलको अनुभव दिन चाहन्छु । यसले भविष्यमा थप बलियो टिम बनाउन मदत गर्नेछ । यस्ता मैत्रीपूर्ण खेलबाट बहुमूल्य अनुभव पनि बटुल्न सकिन्छ । यी दुई खेलमा नतिजाभन्दा पनि प्रदर्शन प्रमुख रहनेछ ।’

प्रशिक्षक अल्मुताइरीका अनुसार जुनमा नेपालले एसिया कप छनोटको तेस्रो चरण खेल्दै छ । त्यसअघि उनी सबै खेलाडीको प्रदर्शन हेर्न चाहन्छन् । उनले बन्द प्रशिक्षणमा रहेका ३४ खेलाडीलाई नै मौका दिने योजनाअनुसार यो दुई फरक टिमको घोषणा गरेको हो । दुवै टिममा परेका खेलाडी भने १२ छन् ।

पहिलो खेलका लागि घोषित टिममा किरण लिम्बु, दीप कार्की, टेकेन्द्र थापा, गौतम श्रेष्ठ, दिनेश राजवंशी, देवेन्द्र तामाङ, सुमन अर्याल, सुरज ठकुरी, सुदीप गुरुङ, सुमन लामा, तेज तामाङ, विशाल राई, सुजल श्रेष्ठ, मनीष डाँगी, अञ्जन विष्ट, आशिष लामा, दर्शक गुरुङ, विमल घर्तीमगर, सुनील बल, नितिन थापा, आकाश बुढामगर, कृतिशरत्न छेन्जु र जगजित श्रेष्ठ छन् ।

दोस्रो खेलका लागि घोषित टिममा किरण लिम्बु, विशाल श्रेष्ठ, शत्रुधन चौधरी, गौतम श्रेष्ठ, दिनेश राजवंशी, देवेन्द्र तामाङ, सुमन अर्याल, सुरजज्यू ठकुरी, पुजन उपरकोटी, सुमन लामा, तेज तामाङ, नवीन गुरुङ, सुजल श्रेष्ठ, सुवास गुरुङ, अञ्जन विष्ट, आशिष लामा, विमल घर्तीमगर, अनन्त तामाङ, आशिष राई, एरिक विष्ट, सुशील राई, प्रशान्त अवस्थी र सन्तोष तामाङ छन् ।

प्रकाशित : माघ १३, २०७८ ०८:४९
प्रतिक्रिया
पठाउनुहोस्

दशरथ रंगशालामा प्रख्यात १० जित

नेपालले सन् १९८४ देखि दशरथ रंगशालामा आधिकारिक अन्तर्राष्ट्रिय फुटबल खेल्न थालेको हो 
कान्तिपुर संवाददाता

हिमेश — नेपाली फुटबलको घर भनेर कसैलाई भनिन्छ भने त्यो दशरथ रंगशाला नै हो । समग्र नेपाली फुटबलकै पर्यायका रूपमा रहेको छ दशरथ रंगशाला । एकपछि अर्को पुस्ताका नेपाली फुटबल खेलाडी दशरथ रंगशालामै खेल्दै हुर्के र बढे ।

अधिकांश नेपाली खेलाडीलाई दशरथ रंगशालामा खेल्दाको अनुभव सोध्नुपर्छ । धेरैले भन्ने गर्छन्, ‘यो अभूतपूर्व छ ।’ अझ नेपाली राष्ट्रिय टिमका लागि खेल्नुपर्छ, दशरथ रंगशालाको जवाफ छैन ।

नेपाली राष्ट्रिय टिमले फेरि एकपल्ट दशरथ रंगशालामा खेल्दै छ यो साता । नेपालले औपचारिक खेलमा सामना गर्न लागेको पहिलो अफ्रिकी प्रतिद्वन्द्वी हो मोरिसस । मोरिससविरुद्धका दुई खेलमध्ये पहिलो प्रतिस्पर्धा शनिबार हुनेछ । इतिहास पल्टाउने हो भने नेपालले सन् १९८४ देखि दशरथ रंगशालामा आधिकारिक अन्तर्राष्ट्रिय फुटबल खेल्न थालेको हो । त्यसयता ३८ वर्ष बिते यसले अन्तर्राष्ट्रिय फुटबलको आतिथ्यता गर्न थालेको । यसबीच नेपालले आत्मसात् गरेको प्रख्यात १० जितलाई पछाडि फर्केर हेर्ने प्रयास गरेका छौं ।

१.माल्दिभ्सविरुद्ध पहिलो खेल

सन् १९८४ को सेप्टेम्बर १८ त्यो दिन हो, जुन दिन नेपालले दशरथ रंगशालामा पहिलो औपचारिक खेल खेल्यो । अवसर थियो पहिलो दक्षिण एसियाली खेलकुद । यस्तोमा नेपालको ऐतिहासिक प्रतिद्वन्द्वी थियो माल्दिभ्स । माल्दिभ्सको फुटबल त्यतिबेला त्यस्तो थिएन, जस्तो अहिले छ । उसले त प्रतियोगिता खेल्न पनि मानिरहेको थिएन । तर फकाएर नेपाल बोलाइएको थियो । माल्दिभ्सलाई नेपालले सजिलै ४–० ले हरायो । नेपालका लागि यो विजयी सुरुआत थियो ।

२.नेपालले जितेको पहिलो स्वर्ण

त्यही पहिलो दक्षिण एसियाली खेलकुदमा नेपालले फुटबलतर्फ स्वर्ण पदक पनि जितेको थियो । यसका लागि नेपालले भरिभराउ दशरथ रंगशालामा बंगलादेशलाई ४–२ ले हरायो । लिग चरणको खेलमा नेपाल बंगलादेशसँग ४–० ले पराजित भएको थियो । यस्तोमा लागिरहेको थियो बंगलादेशले कतै स्तब्धपूर्ण नतिजा त निकाल्ने होइन । तर सेप्टेम्बर २३ को त्यो खेलमा त्यस्तो केही नराम्रो भएन । नेपाल आफ्नो फुटबल इतिहासमा पहिलो स्वर्ण जित्न सफल रह्यो ।

३.ओलम्पिक छनोटमा दोस्रो चरण

नेपालले सन् १९८७ को ओलम्पिक छनोटको पहिलो चरणमा पाकिस्तानको आतिथ्यता गरेको थियो । त्यसमा दुवै खेल दशरथ रंगशालामै भएको थियो । पहिलो खेल गोलरहित बराबरीमा टुंगिएपछि दोस्रो खेलमा भने नेपाल १–० ले विजयी रह्यो । अप्रिल २८ मा प्राप्त उक्त जितमा गोल गर्ने खेलाडी थिए, धीरेन्द्र प्रधान । यो गोलको सबैभन्दा ठूलो विशेषता हो, कर्नरबाट भएको प्रहार सिधै पोस्टमा । यो जितसँगै नेपाल पहिलोपल्ट ओलम्पिक छनोटको दोस्रो चरण पुग्न पनि सफल रह्यो ।

४.भुटानविरुद्ध सात गोल

नेपाली फुटबलले अन्तर्राष्ट्रिय फुटबलमा प्राप्त गरेको यो नै अहिलेसम्मको सबैभन्दा ठूलो अन्तरको जित हो, त्यो भनेको भुटानविरुद्धको ७–० । अवसर थियो, सन् १९९९ को दक्षिण एसियाली खेलकुद । सेप्टेम्बर २६ को त्यो दिन नेपालले लामो समयपछि अन्तर्राष्ट्रिय फुटबलमा फर्केको भुटानलाई एकपछि अर्को गोल गरेको थियो । भुटान नेपालका लागि त्यस्तो एक प्रतिद्वन्द्वी हो, जसका विरुद्ध नेपालले अहिलेसम्म हार बेहार्नुपरेको छैन । सायद यस ७ गोलको हारले भुटानलाई सधैं पिरोल्ने गर्छ ।

५.माल्दिभ्सविरुद्ध अर्को जित

नेपालले यही दक्षिण एसियाली खेलकुदकै क्रममा अर्को जित निकाल्न सफल रह्यो । फरक के भने यतिबेलासम्म माल्दिभ्स फुटबलमा बलियो भइसकेको थियो । त्यसैले यसको विशेष अर्थ छ । अक्टोबर २, १९९९ मा प्राप्त २–१ को यस जित किन पनि ऐतिहासिक छ भने यही सफलतापछि नेपाल फुटबलतर्फ फाइनल पुग्ने निश्चित भएको थियो । माल्दिभ्सले यस अगाडि दाबी गरेको थियो, हामी फाइनल पुग्दैछौं भनेर । तर नेपालले त्यसमा बाधा तेर्स्याउन कुनै कसर छाडेन ।

६.अफगानिस्तानमाथि नेपाल हाबी

अफगानिस्तान भर्खर–भर्खर अन्तर्राष्ट्रिय फुटबलमा फर्केको थियो । यसक्रममा सन् २००३ मा एसिया कप छनोटको प्रारम्भिक चरण खेल्न काठमाडौं ओर्लेको थियो । त्यसअगाडि दशरथ रंगशालामा अफगानी टिमविरुद्ध नानाथरिका हल्ला चलेको थियो । जस्तो कि उक्त टिममा जर्मनीमा व्यावसायिक खेल खेलेका खेलाडी छन् । तर, त्यही टिमविरुद्ध नेपालले मार्च १८ मा भएको खेलमा सानदार जित निकाल्न सफल रह्यो । जितको अन्तर थियो ४–० ।

७.टिमोर लिस्टेमाथि ५ गोल

भुटानविरुद्धको सात गोलमा नेपालको प्रदर्शन जस्तो थियो । सन् २०११ मा विश्वकप छनोटको प्रारम्भिक चरणमा टिमोर लिस्टेमाथि प्राप्त ५–० को जित पनि लगभग उस्तै थियो । तर, परिस्थिति भने केही फरक थियो । यो छनोट दुई लेगमा भएको थियो । दुवै दशरथ रंगशालामै भयो । पहिलो लेग नेपालले आफ्नो घरेलु मैदानमा खेलेको खेलका रूपमा थियो । त्यसमा नेपाल २–१ ले विजयी रह्यो । एक ‘अवे गोल’ उपहार पनि दियो । यस्तोमा जुलाई २ को दोस्रो लेगमा केही नराम्रो होला भन्ने चिन्ता थियो । तर त्यस्तो केही भएन । उल्टै राम्रो जित निस्कियो ।

८.नेपालको आधा दर्जन गोल

भुटान र टिमोर लिस्टेविरुद्ध प्राप्त जितसरहकै अर्को सफलता नेपालले नर्थन आइल्यान्ड मारियानाविरुद्ध सन् २०१३ मा प्राप्त गरेको थियो । मार्च २ को यस जितमा गोल अन्तर थियो आधा दर्जन । नेपालको ६–० जितको सबैभन्दा ठूलो विशेषता रह्यो, भरत खवासको ह्याट्रिक । नेपालका लागि दशरथ रंगशालामा सम्भव एकमात्र अन्तर्राष्ट्रिय फुटबलमा प्राप्त एकमात्र तीन गोलको प्रदर्शन यही हो । यसका लागि भरत जहिल्यै पनि सम्झिरहने नाम रहने छ ।

९.भारतलाई हराएर सेमिफाइनल यात्रा

सन् २०१३ को साफ च्याम्पियनसिपमा नेपालले आफ्नो समूहबाट सेमिफाइनल प्रवेशका लागि अन्तिम लिग (भारतविरुद्धको खेल) गुमाउन सक्ने स्थिति थिएन । तर सेप्टेम्बर ५ को यो खेलमा भारतमाथि नेपाल ऐतिहासिक २–१ को जित निकाल्न सफल रह्यो । यो खेल हेर्न फेरि एकपल्ट दशरथ रंगशाला भरिभराउ थियो । यो नेपालको अहिलेसम्मकै सबैभन्दा सम्झनलायक जितमध्ये एक रहने छ । नेपालका लागि गोल गर्ने दुई खेलाडी थिए अनिल गुरुङ र जुमनु राई ।

१०. दोस्रो ठूलो सफलता

नेपालले दशरथ रंगशालामा सन् १९८४ मा भएको दक्षिण एसियाली खेलकुदमा जितेको स्वर्णपछि त्यस्तै सफलता फेरि दोहोर्‍याउन सकेको थिएन । यसका लागि नेपालले कुर्नुपरेको थियो, साढे तीन दशकभन्दा बढी समय । सन् २०२१ को मार्च २९ मा नेपालले थ्री नेसन्स कपको फाइनलमा बंगलादेशलाई हराएको थियो । जितको अन्तर थियो २–१ । यससँगै नेपाल एक अर्को उपाधि जित्न सफल भयो । र, यससँगै बालगोपाल महर्जन नेपाली फुटबल इतिहासकै सफल प्रशिक्षकमध्ये एक बने ।


प्रकाशित : माघ १३, २०७८ ०८:४९
पूरा पढ्नुहोस्
प्रतिक्रिया
पठाउनुहोस्
×