प्रिन्सका लागि संघ सक्रिय हुने- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

प्रिन्सका लागि संघ सक्रिय हुने

कान्तिपुर संवाददाता

काठमाडौँ — विश्व ब्याडमिन्टन महासंघको यू–१९ वरीयताको शीर्षस्थानमा परेपछि नेपाल ब्याडमिन्टन संघले बिहीबार प्रिन्स दाहाललाई औपचारिक रूपमा बधाई दिएको छ ।

संघले भनेको छ, प्रिन्सको खेल विकासका लागि संघ थप सक्रिय रहनेछ । संघका अध्यक्ष रामजीबहादुर श्रेष्ठले विज्ञप्ति जारी गर्दै प्रिन्सलाई बढीभन्दा बढी अन्तर्राष्ट्रिय प्रतियोगितामा सहभागिता गराउन प्रयास गरिने जनाएका छन् ।

संघले प्रिन्सलाई ओलम्पिक छात्रवृत्ति मिलाउन प्रयास गर्ने बताएको छ । अहिले तत्काल प्रिन्सले एसिया ओलम्पिकअन्तर्गत वार्षिक तीन हजार डलरको छात्रवृत्ति भने प्राप्त गरिसकेका छन् । यसवापतको रकम संघमार्फत वर्षको अन्त्यमा प्राप्त हुनेछ । त्यसअगाडि संघले प्रिन्सलाई अन्तर्राष्ट्रिय सहभागिता दिलाउन खर्च गर्नेछ ।

यस्तै सघंले प्रिन्सको भविष्य र वृद्धि विकासका लागि राष्ट्रिय खेलकुद परिषद्, नेपाल ओलम्पिक कमिटी, ब्याडमिन्टन एसिया र विश्व ब्याडमिन्टन महासंघसँग सहकार्यको प्रयास गर्नेछ । नेपाली कर्पाेरेट क्षेत्रसँग पनि प्रिन्सको खेल विकासका लागि प्रायोजन अनुबन्धका लागि प्रयास गर्ने भएको छ ।


प्रकाशित : पुस २९, २०७८ २२:१०
प्रतिक्रिया
पठाउनुहोस्

नौ कर्मचारीमा कोरोना, नापी कार्यालय बन्द

कान्तिपुर संवाददाता

पूर्वी नवलपरासी — नापी कार्यालय कावासोतीका ९ जना कर्मचारीलाई कोरोना संक्रमण भएपछि कार्यालय बन्द भएको छ । त्यहाँ कार्यरत १२ कर्मचारीमध्ये ९ जनालाई बुधबार कोरोना संक्रमण पुष्टि भएको हो । बिहीबार बिहान १० बजेबाट कार्यालय बन्द गरेर २ कर्मचारीले कार्यालय कुरेका छन् ।

नापी अधिकृत भोला कोहारका अनुसार १२ कर्मचारीमध्ये एकैपल्ट ९ जनामा कारोना संक्रमण पुष्टि भएपछि कार्यालय सञ्चालन हुन सक्ने अवस्था रहेन । ‘बन्द गरेर सतर्कता अपनाएका छौं,’ उनले भने, ‘बन्द नगरे सेवाग्राही सबैलाई सर्छ ।’ बाँकी कर्मचारीको परीक्षणका लागि नमुना पठाइएको छ ।

बिहीबार प्रहरी उपरीक्षक प्रकाश मल्लले कर्मचारीलाई कोरोना देखिएको जानकारी पाएपछि सुरक्षाकर्मी खटाइएको र सतर्कता बढाइएको जानकारी दिए । नापी कार्यालयले कर्मचारीमा कोरोना पुष्टि भएको जानकारी गराएको र कार्यालयलाई संक्रमणरहीत गर्न स्वास्थ्यकर्मी परिचालन गरिएको छ । सोमबार केही कर्मचारीलाई बिसन्चो भएको पाइएपछि परीक्षण गर्दा एकैपल्ट ९ जनामा संक्रमण पुष्टि भएको थियो । चिकित्सकको सल्लाहअनुसार कार्यालय खोलिने कोहारले बताए ।

प्रकाशित : पुस २९, २०७८ २२:०४
पूरा पढ्नुहोस्
प्रतिक्रिया
पठाउनुहोस्
×