कान्तिपुर वेबसाईट
AdvertisementAdvertisement
२५.१२°C काठमाडौं
काठमाडौंमा वायुको गुणस्तर: १३७
'ए' डिभिजन लिग

अञ्जनको गोलमा मनाङ शीर्षमा

मनाङको एएफसी कप खेल्ने सम्भावना जीवितै, आइतबार हुने मछिन्द्र र पुलिसबीचको खेलले निर्धारण गर्ने
दीपक परियार

पोखरा — घरेलु मैदानमा अञ्जन विष्टले ब्रिगेड ब्वाइजविरुद्ध गरेको निर्णायक गोल मदतमा मनाङ मर्स्याङ्दी क्लबलाई पुनः सहिद स्मारक ‘ए’ डिभिजन लिगको शीर्षस्थानमा पुर्‍याएको छ ।

अञ्जनको गोलमा मनाङ शीर्षमा

पोखरा रंगशाला फुटबल मैदानमा शनिबार अञ्जनले पहिलो हाफको इन्ज्युरी समयमा गरेको गोल नै निर्णायक भयो । ब्रिगेडसँग १–० को जितसँगै मछिन्द्रलाई पछि पार्दै मनाङ लिगको शीर्षस्थानमा उक्लिएको हो । मनाङले १६ अंक भएको छ भने मछिन्द्रसँग १४ अंक छ । यो जितले मनाङको एएफसी कप छनोट खेल्ने सम्भावना जीवितै छ ।

सातौं चरणअन्तर्गत मछिन्द्रले आइतबार पुलिससँग खेल्नेछ । यो खेलले नै मनाङ एएफसी कप छनोट खेल्ने टोली तय गर्नेछ । एन्फाले लिगको सातौं चरण सकिँदासम्म एएफसी लाइसेन्सप्राप्त क्लबमध्ये शीर्षस्थानमा हुने टिम एएफसी कपका लागि छनोट हुने निर्णय गरेको थियो । मछिन्द्रले जित पाए १७ अंक हुन्छ । यसो हुँदा मात्र मछिन्द्र छनोट हुन्छ । नत्र मनाङले बाजी मार्नेछ ।

शनिबारको खेल मनाङका लागि निकै संघर्षपूर्ण बन्यो । कम्तीमा बराबरीमा रोक्ने रणनीतिका साथ खेलेको ब्रिगेड ब्वाइजले सुरुदेखि नै आक्रामक खेल्यो । पटक–पटक गोलका अवसर सिर्जना गरे पनि उत्कृष्ट ‘फिनिसिङ’ हुन सकेन । खेलको १६ औं मिनेटमै ब्रिगेडले अग्रता लिने सुनौलो अवसर गुमायो । मनाङका आदित्य चौधरीले शिशिर लेखीलाई पेनाल्टी एरियामा लडाएपछि प्राप्त पेनाल्टी अवसर ब्रिगेडले उपयोग गर्न सकेन । शिशिरको पेनाल्टी प्रहार क्रसबार माथिबाट बाहिरियो । अग्रता लिएर मनाङमाथि दबाब सिर्जना गर्नबाट ब्रिगेड चुक्यो ।

खेलको २९ औं मिनेटमा मनाङका पुजन उपरकोटीको पास अञ्जनले प्रहार गर्दा ब्रिगेडका गोलकिपर गुरप्रित सिंहले पन्च गर्दै बचाए । ३३ औं मिनेटमा मनाङले अर्को अवसर गुमायो । ब्रिगेडका विशाल बस्नेत र इबोडेलाई बिट गर्दै मनाङका ओलावाले आफिजले गरेको प्रहार गोलकिपरले बचाए । ३९ औं मिनेटमा निशान लिम्बुको कडा प्रहार पोस्ट नजिकबाट बाहिरियो । ब्रिगेडका गोलकिपर गुरप्रितले उत्कृष्ट प्रदर्शन गरे । भारतबाट सुपर लिग र आई लिग खेलिसकेका उनले नेपालको लिगमा शनिबारै डेब्यु गरेका हुन् ।

पहिलो हाफको अतिरिक्त समय मनाङका कप्तान अञ्जनले खेर फालेनन् । दयानन्द सिंहको क्रस बल ब्रिगेडका गोलकिपर गुरप्रित पन्च गरेर क्लियर गर्न असफल भए । त्यही रिबाउन्ड बलमा अञ्जन पेनाल्टी एरियाबाट हेडबाट गोल गर्न सफल भए । घरेलु मैदानमा उनको यो तेस्रो व्यक्तिगत गोल हो । दोस्रो हाफमा समेत आक्रामक देखिएको ब्रिगेडले गोल गर्न नसक्दा लिगमा रेलिगेसनमा पर्ने सम्भावना बढी छ । मनाङका अञ्जन विष्ट म्यान अफ द म्याच र प्रवेश कुँवर उदीयमान खेलाडी घोषित भए ।

ब्रिगेडका प्रशिक्षक सनोज श्रेष्ठ आफ्ना खेलाडीको प्रदर्शनबाट सन्तुष्ट रहे । पेनाल्टी सदुपयोग गर्न नसक्नु खेलको ‘टर्निङ प्वाइन्ट’ भएको उनले स्वीकारे । पहिलो हाफमा ‘वान भर्सेस वान’ को अवस्थामा गोल गर्न चुक्नु र दोस्रो हाफमा दुई बल बारमा लागेर फर्किनु टोलीका लागि दुर्भाग्य भएको उनले बताए । ‘फुटबलमा भाग्य पनि चाहिन्छ,’ उनले भने, ‘राम्रो खेल्दाखेल्दै हार्नुपर्‍यो ।’ लिगमा मछिन्द्र, थ्रीस्टारलगायत बलिया टिमसँग खेल्न बाँकी नै रहेकाले रेलिगेसनबाट बच्न गाह्रो देख्छन् उनी ।

मनाङका प्रशिक्षक राजेन्द्र तामाङले आफ्नो योजनाभन्दा विपरीत रणनीतिमा ब्रिगेडले खेलेपछि जित कठिन भएको बताए । ‘ब्रिगेडले सुरुआतमा रक्षात्मक खेलेर पछि आक्रामक खेल्छ भन्ने थियो,’ उनले भने, ‘त्यस विपरीत हामीले रक्षात्मक खेल्नुपर्‍यो ।’

ब्रिगेडको पेनाल्टीमा गोल नहुनु, बारमा लागेर बल फर्किनु नै मनाङको भाग्य भएको उनी बताउँछन् । नयाँ वर्ष मनाउने क्रममा खेलाडीलाई आराम नपुग्दा प्रदर्शन कमजोर देखिएको उनले सुनाए । भने, ‘राम्रो/नराम्रो खेले पनि खेल जितेर ३ अंक जोड्न सक्यौं, त्यसमै खुसी छौं ।’

प्रकाशित : पुस १७, २०७८ १७:१७
प्रतिक्रिया
पठाउनुहोस्
जनताको राय

८ देशका लागि सिफारिस भएका राजदूतको नाम लाग्यो ?

x