बंगबन्धु कप फुटबल: स्पष्ट जितको खाँचो

चोटको समस्यामा नेपाल
सुबास हुमागाईं

काठमाडौँ — बंगबन्धु कप फुटबलको डिफेन्डिङ च्याम्पियन नेपाल शनिबार प्यालेस्टाइनविरुद्ध समूहको अन्तिम खेलमा मैदान उत्रँदा प्रतियोगितामा टिक्न टोलीसामु जितको विकल्प रहने छैन । समूहको पहिलो खेलमा ताजकिस्तानसँग २–० ले पराजित भएपछि नेपालको सुरुआत कमजोर भयो ।

फाइल तस्बिर

बिहीबार प्यालेस्टाइनले ताजकिस्तानलाई २–० ले नै हराएपछि नेपालको सेमिफाइनल पुग्ने सम्भावना कठिन बनेको हो ।


पहिलो खेलमा नतिजा त नेपालको पक्षमा रहेन नै, चोटका कारण टोली थप समस्यामा परेको छ । ताजकिस्तानविरुद्धको खेलमा नेपालको पहिलो रोजाइका चार खेलाडी घाइते भए । तीन डिफेन्डरलाई त परिवर्तन नै गर्नुपरेको थियो । मिडफिल्डर नीराजन खड्का काँधको चोटका बाबजुद अन्तिम मिनेटसम्म पनि मैदानमा डटिरहे । त्यसबाहेक डिफेन्डरत्रय विराज महर्जन, अनन्त तामाङ र आदित्य चौधरी चोटका कारण मैदान छाड्न बाध्य भएका थिए ।


पहिलो हाफमा कप्तान विराजको घुँडाको चोट लागेपछि सुमन अर्याल उनको स्थानमा मैदान छिरेका थिए । दोस्रो हाफमा आदित्य पनि घाइते भए र देवेन्द्र तामाङले उनको स्थान लिए । लगत्तै अनन्तको ह्यामस्ट्रिङमा समस्या आएपछि प्रशिक्षक बालगोपाल महर्जनले फरवार्ड भरत खवासलाई मैदानमा पठाए । नेपालले अन्तिम २० मिनेट दिनेश राजवंशीलाई सेन्टर डिफेन्स र मिडफिल्डर तेज तामाङलाई राइट ब्याक पोजिसनमा खेलाएको थियो ।


प्रशिक्षक बालगोपाल महर्जनले दुई डिफेन्डरको फिटनेसबारे निर्णय हुन बाँकी रहे पनि अन्य खेलाडी तयार रहेको बताए । ‘हामीले तयारी राम्रो गरेका छौं । दुई डिफेन्डर चोटका कारण केही समस्यामा छन् । बेन्चमा उचित विकल्प तयार रहेकाले चिन्ता लिनुपर्ने देख्दिनँ,’ उनले भने, ‘हामी सक्दो राम्रो प्रदर्शन गर्दै अर्को चरण पुग्ने प्रयासमा हुनेछौं ।’


टोलीका एथलेटिक ट्रेनर विवेक अधिकारीले चोटमा लगातार सुधार भइरहेको बताए । आदित्यको चोट त्यति जटिल नभएकाले उनले पहिलो रोजाइमै खेल्नेछन् । अनन्त र विराजको हकमा भने प्रशिक्षकले खेलअघि फिटनेसको स्थिति हेरेर निर्णय लिनेछन् । नेपालले प्यालेस्टाइनविरुद्ध दिनेश, आदित्य, देवेन्द्र र सुमनको युवा समूहलाई रक्षापंक्तिको जिम्मेवारी दिने सम्भावना बढी छ ।


पहिलो खेलमा ताजकिस्तान हावी भए पनि कप्तान विराज प्यालेस्टाइनविरुद्ध सुधारिएको खेल प्रदर्शन गर्ने बताउँछन् । ‘हामीले प्यालेस्टाइनको खेल हेर्‍यौं र शारीरिक रूपमा टोली हामीभन्दा बलियो छ । हामीले पहिलो खेलपछि राम्रो तयारी गरेका छौं । उपाधि रक्षा गर्न जोसका साथ मैदानमा उत्रन्छौं,’ उनले भने ।


यस्तै प्यालेस्टाइनविरुद्ध गोलरक्षकमा पनि डेब्युको सम्भावना रहन सक्छ । पछिल्लो खेलमा विकेश कुथुले अपेक्षित प्रदर्शन गर्न नसक्दा टोलीमा केही परिवर्तन हुने सम्भावना रहेको छ । वैकल्पिक खेलाडीका रूपमा रहेका एलन न्यौपाने र विशाल श्रेष्ठ दुवैले अहिलेसम्म सिनियर टोलीबाट खेलेका छैनन् । घरेलु फुटबलमा एलन थ्रीस्टार र विशाल मनाङसँग आबद्ध छन् ।


नेपाली राष्ट्रिय फुटबल टोली डिफेन्डिङ च्याम्पियनको हैसियतमा बंगबन्धु कपमा सहभागिता जनाउन गत साता बंगलादेश गएको थियो । जाने अघिल्लो दिनसम्म पनि खेलाडी क्लबबाटै खेलिरहेका थिए । अधिकांस खेलाडी बिहान क्लबको प्रशिक्षण गर्थें भने दिउँसो राष्ट्रिय टोलीको । ५ वर्षपछि सुरु भएको राष्ट्रिय लिगलाई दोस्रो खेलमा रोक्दै एन्फाले टोलीलाई उपाधि रक्षाको लागि ढाका पठाएको हो । यसक्रममा टोलीका सबै २० खेलाडी सामेल गरेर प्रशिक्षण गर्ने वातावरण बनेको थिएन ।


उपाधि दाबेदारका रूपमा प्रतियोगितामा प्रवेश गरेको टोली समूह चरणबाट बाहिरिने डर उत्तिकै छ । नेपाललाई अर्को चरणमा पुग्ने सम्भावना जीवित राख्न प्यालेस्टाइनविरुद्ध २ गोल अन्तरले जित दर्ता गर्नुपर्नेछ । हार, बराबरी वा एक गोल अन्तरले जित हात पारे पनि नेपाल प्रतियोगिताबाट बाहिरिने छ । २–० को जित दर्ता गरे प्रतियोगिता नियमावलीअनुसार सेमिफाइनल पुग्ने टोलीको निर्णय हुनेछ ।

प्रकाशित : आश्विन २०, २०७५ ०७:४५
प्रतिक्रिया
पठाउनुहोस्
ADVERTISEMENT
ADVERTISEMENT

फितलो आर्मी, अभागी एनआरटी

सुबास हुमागाईं

काठमाडौँ — असन्तुष्ट प्रशिक्षक, खस्केको खेल स्तर, रेफ्रीको विवादास्पद निर्णय अनि आयोजना व्यवस्थापनमा समस्या । पाँच वर्षपछि फर्केको सहिद स्मारक ‘ए’ डिभिजन लिगको शनिबार पहिलो खेलपछि त्रिभुवन आर्मी र एनआरटी दुवै क्लबका प्रशिक्षक खुसी देखिएनन् ।

सहिद स्मारक लिगमा शनिबार आर्मीको प्रहार बचाउँदै एनआरटीका गोलरक्षक अजित प्रजापती । तस्बिर : हेमन्त श्रेष्ठ

तर दुवै प्रशिक्षक खुसी नहुनुको कारण नतिजा भने थिएन । आर्मीका प्रशिक्षक नवीन न्यौपाने टोलीको कमजोर प्रदर्शनले निरास देखिन्थे भने एनआरटीका महेश्वर मुल्मी रेफ्रीले गलत निर्णय दिँदै टोलीको जित खोसेको आरोप लगाउँदै मुर्मुरिए ।

खेलको दोस्रो हाफको इन्ज्युरी समयको अन्तिम मिनेटमा पेनाल्टी क्षेत्रभित्र पाएको इन्डाइरेक्ट फ्रिकिकमा गोल गर्दै आर्मीले हार टारेको थियो । थप गरिएको ५ मिनेट सकिएपछि गोलरक्षक अजित प्रजापतिले निर्धारित ६ सेकेन्डभन्दा बढी बल समातेको भन्दै रेफ्री सुदीश पाण्डेले आर्मीलाई फ्रिकिक दिएका थिए । उक्त फ्रिकिकमा आर्मीका सन्तोष तामाङले एरिक विष्टको सहायता लिँदै गोल गरे ।

सातदोबाटोस्थित एन्फा कम्प्लेक्समा भएको खेलमा एनआरटीले दुईपल्ट अग्रता लिए पनि जोगाउन सकेन । आर्मीविरुद्ध साँघुरो डिफेन्स र काउन्टर अटयाकको रणनीतिमा उत्रिएको एनआरटीले आफ्नो योजना सफल रूपमा अवलम्बन गर्न सक्यो । राजेश परियारलाई एकल फरवार्डको रूपमा खेलाएको एनआरटीले दुवै गोलमा उनको साथ पायो ।

१२ औं मिनेटमा कर्नरबाट रिबाउन्ड आएको बल राजेशले प्रहार गर्दा रोजित पुडासैनीले पोस्टको दिशा दिएर एनआरटीलाई सुरुआती अग्रता दिलाए । एनआरटीको दोस्रो गोल राजेश आफैंले गरेका थिए । मिडफिल्डमा निशान लिम्बुले गरेको फ्लिकमा उनले आर्मीका सेन्टर डिफेन्डरद्वय जितेन्द्र कार्की र विमल पाण्डेलाई बिट गर्दै वान भर्सेस वानको स्थितिमा गोल गरेका हुन् ।

त्यसअघि आर्मीले पहिलो हाफमा पेनाल्टीको मदतमा गोल गरेको थियो । कर्नरमा आएको बल क्लियर गर्ने प्रयासमा एनआरटीका डिफेन्डर सरोज तामाङको हातमा बल लागेपछि रेफ्रीले पेनाल्टीको अवसर दिए । रेफ्रीको यो निर्णयमा पनि बेन्चमा रहेका एनआरटी अफिसियलहरूले तीव्र असन्तुष्टि जनाए । आर्मीले खेलमा पकड बनाउने प्रयास गरे पनि अन्तिम पास सफल रूपमा निकाल्न नसक्दा एनआरटीलाई दबाबमा राख्न सकेन । दुवै गोल सेट पिसमा आउनुले पनि आर्मीको प्रदर्शन फितलो रहेको प्रस्ट थियो । आर्मीले सिर्जना गरेका केही मौकामा गोलरक्षक अजित प्रजापति बाधक बनिरहे ।

लिग उपाधिको दाबेदार मानिएको आर्मी र मध्यतालिकाको लक्ष्य राखेको एनआरटीबीचको खेल शीर्ष डिभिजनको जस्तो थिएन । गत वर्ष मोफसलका ७ उपाधि जित्दै नम्बर एक क्लबको रूपमा आफूलाई उभ्याएको आर्मीले ‘बी’ डिभिजनबाट बढुवा भएको एनआरटीविरुद्ध इन्ज्युरी समयको अन्तिम मिनेटको गोल सहायता लिनुपर्‍यो । राष्ट्रिय टोलीको खेलाडीको वर्चस्व रहेको आर्मीको आक्रमणधार चल्न सकेन । मिडफिल्डमा पनि बल होल्ड गर्न असफल आर्मीको डिफेन्सलाई एनआरटीको काउन्टर बचाउन हम्मे–हम्मे परेको थियो ।

गोल गरेपछि खुसी साट्दै एनआरटीका राजेश परियार (९) र निशान लिम्बु ।तस्बिर : हेमन्त श्रेष्ठ


यता ‘ए’ डिभिजन लिगको पछिल्लो संस्करणमा सहभागिता नजनाउने निर्णय गर्दै तल्लो श्रेणी झरेलगत्तै आयोजना भएको लिगमा उपस्थित एनआरटीमा फिटनेस समस्या देखियो । दोस्रो हाफमा खेलाडीहरूले सामान्य फाउलमा पनि लडेर अनावश्यक समय खर्चे । एनआरटीले गरेको तीनै परिवर्तनमा खेलाडी घाइते हुँदै मैदान छाडेका थिए भने अन्तिम समयतिर कुद्न पनि कठिन भएकाले बेन्चमा समय बाँकी रहेकोबारे संकेत दिइरहेका थिए । एनआरटीले मैदानमा उतारेका अधिकांस खेलाडीको ‘ए’ डिभिजन लिगमा नै डेब्यू थियो ।

अन्तिम समयमा रेफ्रीको निर्णयका कारण आक्रोसित एनआरटी बेन्चका अफिसियल खेल सकिएलगत्तै मैदान पसे । बेन्चसँगै रहेको दर्शकदीर्घामा रहेका समर्थक पनि सँगै मैदानतर्फ लागे । सुरक्षा व्यवस्था कमजोर हुँदा मैदानभित्र भिडभाड नै भयो । खेल सकिएलगत्तै म्यान अफ द म्याच घोषित एनआरटीका गोलरक्षक अजितलाई फिफाको दक्षिण एसिया क्षेत्रका विकास निर्देशक प्रिन्स रुफसले म्यान अफ द म्याच अवार्ड दिँदै थिए ।

अवार्ड दिइरहँदा केही अफिसियल र समर्थकले पुरस्कार दिइरहेको अवस्थामा अजितलाई तानेर लगेका थिए । एन्फा पदाधिकारीको आग्रहपछि क्लब अध्यक्षले उनलाई फिर्ता ल्याएर पुरस्कार ग्रहण गर्न दिएका थिए । व्यवस्थापनमा निकै समस्या देखिएको उद्घाटन समारोहमा चर्चित सेलिब्रेटीहरूले प्रस्तुति दिएका थिए । उचित व्यवस्थापन हुन नसक्दा खेल तोकिएको समयभन्दा आधा घण्टा ढिलो सुरु भएको थियो ।

पहिलो खेलमा बराबरीमा चित्त बुझाउँदा दु:ख लागे पनि आर्मीले राम्रो प्रदर्शन गर्न नसकेको प्रशिक्षक न्यौपानेले स्वीकारे । ‘मैले अपेक्षा गरेअनुसार एक चौथाइ पनि खेल्न सकेनन् । आक्रमणमा फितलो देखिएको टोली मिडफिल्डमा पनि बल राख्न सफल भएन । खेलाडीले बल अगाडि बढाउन हतार गर्दा योजना सफल हुन सकेन,’ उनले भने । गत वर्ष मोफसलमा उच्च प्रदर्शन गरेका विंगर दिनेश हेन्जनको अनुपस्थितिले पनि केही असर परेको उनको भनाइ थियो । ‘उनी निकै राम्रा खेलाडी हुन् । गत वर्ष मोफसलमा हामीले सफलता प्राप्त गर्दा उनले निर्णायक प्रदर्शन गरेका थिए । उनी भएको भए केही फरक हुनसक्थ्यो,’ उनले थपे । दिनेश नेपाल यू–१८ राष्ट्रिय टोलीको कप्तानी गर्दै भारतको आग्रामा आयोजित प्रतियोगितामा व्यस्त रहेकाले उपलब्ध थिएनन् ।

एनआरटीका प्रशिक्षक महेश्वर मुल्मीले आर्मीजस्तो बलियो टोलीविरुद्ध योजनाअनुरुप खेल्दाखेल्दै रेफ्रीको निर्णयका कारण हार्नुपरेको बताए । ‘आर्मी निकै बलियो टोली हो । हामीले रक्षात्मक रणनीति अपनाउँदै काउन्टर अट्याक गर्ने योजना बुनेका थियौं । त्यसैअनुसार आर्मीलाई २ गोल गयौं पनि । तर रेफ्रीको गलत निर्णयले हामीबाट जित खोसियो,’ उनले भने ।

मुल्मीले रेफ्री पाण्डेले आर्मीको साथ दिएको भन्दै पक्षपात गरेको आरोप लगाए । ‘यो शतप्रतिशत अन्याय भयो । आर्मीसँग मिलेर हाम्रोविरुद्ध निर्णय दिने कार्य भएको छ । विगत पनि उनले यस्तै विवादास्पद निर्णय गर्दै आएका छन् । उनले विवाद उत्पन्न गर्ने निर्णय दिने गर्छन्,’ मुल्मीले थपे । क्लबले अब एन्फासमक्ष लिखित उजुरी दर्ता गर्ने र एन्फाबाट उचित जवाफको अपेक्षा गरेको उनले बताए ।

प्रकाशित : आश्विन १४, २०७५ ०८:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT